Khair, audition ke baad sab class mein baithe the. Sinha Sir trigonometric identities padha rahe the. Tabhi kucch ladke jaane kis baat par chhup chhup kar hans rahe the. Vaise to Sinha Sir school ke sabse strict teacher the magar jab se vo log eleventh standard me aaye the, students ki himmat badhne lagi thi. Equation solve karte karte jab Mohit ne peeche dekha, to vahaan ladkon aapas me koi paper chit paas kar rahe the aur use dekh dekhkar hans rahe the. Mohit jab class me hota tha to uska focus padhai ke alawa aur kahin nahin hota tha fir bhi jab paanch minute baad vo mudi hui chit Mohit ke paas pahunchi to usne chupke se desk ke neeche use khol kar dekha. Chit mein ek football bani huyi thi aur us par ek ladki ka chehra tha. Football se mote mote haath aur pair bhi nikle huye the. Aur bagal mein likha tha: Samiksha itni chocolatey kyon hai????

Mohit ne aankhein band ki aur teen gehri saansein li. Vo bachpan se isi school mein padha tha to sabki handwriting use acche se pata thi. Slow motion mein chalte huye vo middle bench mein baithe Akash ke paas gaya aur ek zor ka mukka uski naak par jad diya. Akash ki naak se khoon behne laga. Ye dekhte hi Aakash ki toli Mohit par toot padi. Akash ke 5-6 doston ka to Mohit ne peet peetkar bharta bana diya magar ab class ke ladkon ke saamne Mohit kamzor parne laga tha.

Sinha Sir bas, "Stop this. Tum sabko Principal Sir se punishment milegi." Bas yahi baar baar chilla rahe the. Mohit ab buri tarah pit raha tha. Tabhi Rajat apni seat se utha aur apni pant ke buckle se belt nikaalkar zor se Mohit par chadhe ladke par maara. Fir to Mohit ne bhi apna belt nikaal liya aur class ke ladkon ko dono ne tabiyat se dhoya.

Fir Ek ghante baad Principal office ke andar:

Akash aur uske dost roni surat banakar: Maine to kucch kiya bhi nahin tha magar ye Mohit meri seat par aakar binaa baat ke hi peetne laga. Dekhiye kitna khoon nikal raha hai.

Principal Sir ne Mohit se kaha, "To Mohit, can you please tell me tumne Akash aur uske doston ko itni buri tarah kyon maara?"

Mohit chup rehkar Aakash ko ghoorta raha.

Principal Sir: Mere paas poora din nahin hai Mohit.

Mohit: Sorry Sir. Main nahi bata sakta ki maine Aakash ko kyon maara magar itna zaroor kahoonga ki vo isse zyaada pitayi deserve karta tha.

Principal: Theek hai. To tumhe pachaas baar cane se maar aur ground ke 100 rounds lagane honge. Is that clear? Aur cane ke liye sabse patli lakdi tum hi lekar aaoge. Is that clear?

Mohit: Yes Sir

Tabhi Rajat bola, "Ek minute Sir. Ham dono ne ek hi galti ki hai to punishment bhi hamme baraabar baraabar batni chahiye."

Tabhi Mohit fusfusaya, "Tumhe to pata bhi nahi Rajat ki matter kya hai?"

Rajat Mohit ki or dekhkar bola, "Matter jo bhi ho. Vaise agar tumne kaha h ki Aakash aur uske dost ye deserve karte the to I fully trust you. Aur tum chahe sahi ho ya galat, tumhe main akele to chhorne nahin vala."

Principal Sir: Theek hai Rajat. Vaise tumhare jaise disciplined student se aisi harkatein maine expect nahin ki thi magar tumhe bhi 50 canes aur ground ke 100 chakkar.

Fir Mohit aur Rajat ki band mutthi par unhi ki laayi cane se pachaas baar Sinha Sir ne poori taakat se maara.