Mohit ka homework lagbhag khatm hi hone wala tha ki darwaze ki ghanti baji. Mohit ne darwaza khola aur apni Mummy ka bag uthaya.

"Aaj bhai ka birthday hai, mummy," Mohit ne dheeme se kahaa.

Uski mummy ne kaha, "Pata tumhare Mama-Mami sab tumhe pooch rahe the. Keh rahe the ki Mohit ko saath kyon nahi laayi?"

"Aaj Bhai ka birthday hai Mummy," Mohit ne chillate huye kaha, "Apke ansunaa kar dene se ye baat badal nahin jayegi."

"Us ladke se koi lena dena nahi hai hamara. Kaayar tha vo..."

"Aapka nahin hoga unse koi lena-dena Mummy, vo mere bhai the aur rahenge chahe unhe aap kaayar kahein ya apni zindagi khud khatam karne wala darpok insaan." Mohit ne kahaa.

"To apne Papa ko bhi yaad kar le lage haath," Mohit ki maa ne taana kasaa, "Vo bhi to tere baap the aur rahenge bhale hi unhone apni premika ke saath khaai me koodkar jaan hi kyon na de di ho jab Tera bhai bas paanch saal ka aur tu sirf teen saal ka tha..."

"Mummy!"

Tabhi darwaze ki ghanti baji.

"Main dekhta hoon,' kehkar Mohit darwaza kholne chala gaya. Saamne dekha to Sonu khadi huyi thi.

"O Chudail. Abhi raat nahin huyi hai. Jab raat ho tab bhatakna..."

"Mohit!" Sonu bade pyaar se boli.

"Sonu!" Mohit ne Sonu ki nakal utarte huye kahaa.

"Mera TV antenna sahi kar do, please."

Mohit ne uske sir ko thoda thonka aur baal ki lat khadi kar di aur bola, "Arey isme to abhi bhi signal nahin aa raha."

"Please."

"Kya bola tumne? Kucch sunai nahi diya?" Mohit ne kaan saaf karne ka naatak karte huye kaha.

"Please Mohit. Meri help kar do."

"Tumhare ghar me to cable hai vaise. Antenna ka kya karna hai tumhe?"

"Vo kal aandhi chali thi na to cable ke taar toot Gaye the. Antenna sahi ho jayega to Chitrahaar to dekh hi sakti hoon. Aur usme ho sakta hai Silk route ka Gaana sunne bhi mil jaye.."

"Haan jisse tum band ke lead singer Mohit Chauhan ko taad sako. Aunty ko bataoon main ki tumhare tests me marks kyon kam aane lage?"

"Dekho tum Luna ko dekhne har shaam paanch baje..."

"Lekin main har exam mein top karta hoon..."

"Haan, theek hai..."

Sonu ke ghar se zor zor jhagadne ki aawazein aa rahi thi.

"Unka roz ka hai, mummy papa ki taraf dhyaan mat do, mera Chitrahaar choot jayega," Sonu boli.

Mohit chhat par tanki par khade hokar antenna ghumakar bola, "Aaya?"

Sonu andar se chillai, "Nahin."

Mohit ne antenna doosri taraf ghumaya aur chillakar bola, "Ab aaya?"

"Haan...magar picture saaf nahin hai."

Aur kul aadhe ghante ki mehnat ke Baad TV sahi se chal paaya.

School me annual function ke audition chal rahe the to saare students Auditorium me jamaa the.

Aur ab, next...Mohit Mishra

Mohit ko dance bilkul nahi aata tha- ye baat Sonu acche se jaanti thi. Pakka apna mazaak udwayega ye.

Mohit stage par aaya aur dance teacher ne tape play kiya. Aur jo gaana baja- Jawaani jaaneman haseen dilruba mile to dil jawaan...

"Ye mera gaana nahin h madam?" Mohit ka chehra laal tha.

"To fir apki cassette apni marzi ka Gaana baja rahi h? Faltu ka time nahin h mere paas. Isi gaane par dance karo ab." Dance teacher ne daantte huye kahaa.

"Magar ma'am..."

Aur gaana bajne laga Jawaani Jaaneman...

Tabhi Rajat stage par aaya aur bola hamara group dance hai madam, aur fir Rajat ne jo break dance kiya, bhai saahab, school ki saari ladkiyaan sirf Rajat Rajat hi chilla rahi thin. Rajat I love you. Sonu zor se chillayi. Aur Mohit ne bhi Rajat ke steps ki nakal karke theek thaak dance kar hi liya. Agar kahin vo kucch galat bhi karta, to Rajat use sambhaal leta.