Jab Ashish hosh mei aaya toh usse khayal aaya wo uss kamre mei akela hai. Matlab Ruhana jaa chuki hai wahan se aur Vineet bhi, aab tak toh sab usse dhundh rahe honge, Mishra ji toh shayad uska gala hi daba de aisi harkat ke liye. Par yahan se bahar toh jana hi tha, uss band pade ghar mei toh wo reh na sakta.

Jaise taise khud ko utha ke bahar nikla, uski motorcycle abhi tak wahin thi. Ashish ne usse uthaya aur apne ghar ki aur chala, apne rumaal se muh dhak ke. Par thodi hi dur jaane pe usne do logon ko baat karte suna, wo Ruhana ke padoshi the aur ek wo doctor jisne Ruhana ka check up kiya.

Dono baat kar rahe the ki kaise ek awara ladke ne Ruhana sang jabardasti karne ki koshish ki aur kaise uski jacket mili unhe jiske sahare Mishra ji ne police mei shikayat darj karwai.

Ashish samajh gaya wo log Vineet ki baat kar rahe hai kyunki usse toh sab jante hai, agar uski baat hoti toh wo uska naam le ke baat karte par yahan ye log bas ladka - ladka kar ke baat kar rahe hai jiska saaf matlab hai sab ka shaq Vineet pe gaya hai. Par Ruhana ne kissi ko sach nahi bataya kya? Ya wo darr ke bol hi na pai hai? Agar aisa hai toh usse jald hi jaa ke Ruhana ko chup karwana hoga.

Jhat se Ashish Ruhana ke ghar ki aur mudd gaya par jab wahan pahuncha toh darwaje pe hi Mishra ji dikh gaye jo kafi pareshan lag rahe the.

Ashish ne ek side mei apni motorcycle roki aur sehmi kadam se unke pass gaya. Jaise hi Mishra ji ne usse dekha achanak se bhadak gaye. Aab tak unhe Ashish ka khayal na aaya tha par jab usse dekha toh dhyan aaya ki ye toh unki beti ke saath hi tha, fir aisa kaise ho gaya.

''Uncle meri baat toh suniye!!" Ashish ne gujarish ki.

''Kya sunu main? Tum saath the na uske fir ye sab kaise ho gaya? Wo ladka itna kuch kaise kar gaya tumhare rehte? Bolo Ashish, kahan the tum aab tak?" Mishra ji barshe.

''Main kya karta uncle wo achanak se aa gaya aur mujh pe hamla kar diya usne. Main aab tak behosh pada tha, abhi hosh aaya toh sabse pehle yahin bhag ke aaya hoon main.'' Bechara bante hue Ashish bola, apni baat sabit karne ko uske pass sabut bhi tha - - uske sar ki chot.

Mishra ji aur bhadak gaye Vineet pe. Mann kiya gala di daba de uska par wo koi khooni ya darinde nahi jo kissi ko aisi saja de aur fir ye kanoon ke bhi khilaf hai.

Mishra ji ne ek lambi sans li aur Ashish se andar aane ka aghra kiya taki uski marham patti kar sake. Pehle toh jhooth mooth ka Ashish ne inkaar kiya fir maan gaya, akhir wo aaya bhi toh andar jaane ke liye tha.

Idhar dusri aur char diwari mei band, chup chap Vineet baitha hua tha par mann mei hulchal machi hui thi. Samajh nahi paa raha tha ki akhir ek jacket ke adhaar pe police ne usse hi kyun pakad liya wo bhi ilzaam lagate hue. Kaide se unhe Ashish ko pakadna chahiye tha kyunki Ruhana toh uske saath gayi thi par yahan police ne usse hi pakad liya jabki usne toh bachaya hai ladki ko.

Khair, aab toh jab Ruhana hosh mei aayegi tab hi kuch ho sakta hai lekin inn police walon ne toh pehle hi peet bhi liya hai usse, huhh!! Ek baar baat galat sabit ho fir unse bhi nipat liya jaayega.

Par uss se pehle wo apni maa se kaise nazar milayega? Apne pita ko kaise samjhayega aur kaise mohalle walo ko chup karwayega? Badnaam toh wo aise bhi hai lekin aaj beizzat ho gaya hai, mohalle mei uske saath uske parivaar wale ka bhi muh kala ho chuka hai. Galti toh khair uski hi hai, Vineet itna toh samajh raha tha. Agar wo iss tarah se ladkiyon ke piche na bhagya toh shayad aisa hota hi nahi kabhi, toh log uss pe shaq hi na karte par yahan pura mamla hi alag hai.

Vineet ne ek gehri saans bhari aur apni aankhe mund li, jaane aab aage kya hoga yahi soch usse khaye jaa rahi hai.

...

Yahan Shakuntala ka dil ghadi ki badhti har sui ke saath baitha jaa raha tha. Ruhana ko aab tak hosh na aaya tha aur teen ghante beet chuke hai.

Unhone fir ek baar Ruhana ke muh pe paani nara, ye soch ke ki shayad iss baar thande paani ke chitte unki beti mei le aaye. Sukra hai bhagwan ne iss baar unki sun bhi li. Dard se sar e haath rakhti hui Ruhana ne apni aankhe kholi toh samne apni dari sehmi mata ko aankho mei ansu liye bethi paya.

Ruhana ne dusre hi pal unhe gale se laga liya aur ro padi, dard se jyada abhi bhi darr tha unhe - Ashish ki harkaton ka darr.

Shakuntala ne apni beti ko kas ke seene se laga liya.

''Daari nahi beta aab sab thik hai, tum bilkul thik ho,aab kuch nahi hoga tumhe!!" Shakuntala ne apni beti ko santuana diya.

''Mumma usse fir kabhi ghar mei maat ghushne dena!!" Sisakti hui jaise taise Ruhana boli.

''Ghar mei toh kya aab wo kabhi iss seher mei bhi nahi dikhega. Police ne pakad liya hai usse, aab toh usko kadi se kadi saza hogi!!" Dant peesti hui Shakuntala ne jawab diya aur Ruhana ko khud se alag kiya.

''Dekho, aab uss se darne ki koi jarurat nahi tumhe. Main aur tumhare papa hai na, hum kuch nahi hone denge tumhe. Bas aab tum uske khilaf gawahi de dena daroga ji ko fir wo jail ke andar hoga. Awara kahin ka!!" Muh banati hui Shakuntala ne Ruhana se kaha.

Ruhana aab tak aaram se baithi bhi na thi ki fir Shakuntala ne apni baat keh di jo sunke Ruhana ko jor ka jhatka laga aur wo samajh gayi kissi aur galti kissi aur ke sar pe chadh chuki hai aur gunahgar bahar ghoom raha hai. Pehle toh Ruhana sehmi par khayal aaya ki usse abhi himmat dikhani hogi taki wo badmash bach na jaaye aur uske mata pita ko bhi uska sach pata chale.

...

To be continued...