Bargi Dam ki pahadi par teen log baithe huye the. Aur sath hi ek thaile me rakhe the Uncle chips ke khaali packet. Aur doosre thaile me the shikanji ki bottles.

"Ham log yahaan chips khaa rahe hain... Deepak Chatterji ki bhoot ko bura to nahin lagega?" Mohit ne maasoomiyat se kaha.

"Vaise bura maanne ki baat to hai," Sonu sochte huye boli, "Bhoot kucch khaa pee to sakte nahi. Kahin vo ye na soch rahe ham zinda log chips khakar, shikanji peekar jala rahe hain."

Mohit ne turant Chips ka packet door rakh diya.

Rajat bola, "Khaoge nahi to weakness lagegi."

Magar Mohit ne na hi kucch khaya na hi kucch piya.

Teeno ne kucch din Antakshari khelkar time pass kiya fir pahadi par se hi patthar beenkar chapete ka khel khela. Fir Sonu aur Rajat dono Mohit ke kandhe par sar rakhkar so gaye.

Suraj ab dhalne laga tha aur Mohit ko ek gehri udaasi gherne lagi thi. Use ehsaas ho chuka tha ki kucch sawaalon ke jawaab kabhi nahi milte chahe insaan kitni bhi koshish kar le. Vo kabhi nahi jaan payega ki uske bhai ke dimag me kya chal raha tha jab vo building se Zameen ki or aa raha tha. Kya use dar lag raha tha? Ya fir ye kadam uthane ka pacchtava? Kya usne ek bhi baar Bhagwan ji se prarthana ki thi ki bas ek baar use bachaa lein fir kabhi vo aisi galti nahi karega? Ya fir uske dil me itna dard tha ki maut ki god bhi use zindagi se suhaani lag rahi thi. Fir Mohit kabhi apne bhai ki vo aawaz nahin sun payega jab vo use vo gaane sunakar subah neend se jagata tha jinse Mohit ko chiddh chootti thi.

Mohit ne pehle to apne muh par haath rakhkar apni siskiyaan dabane ki koshish kari magar uske oopar uthte neeche girte kandhon se Sonu aur Rajat ki neend khul gayi. Un dono ne kucch nahi kaha, na hi Mohit ko koi dilaasa dene ki koshish ki. Bas dono uske gale se lipat gaye.

Jab Bargi dam se vo Jabalpur ki bas pakadne jaa rahe the, to Mohit aur Sonu peeche choot gaye. Mohit ne Sonu ka haath kas ke pakda hua tha.

Achanak chalte chalte Mohit ruk gaya aur Sonu ka haath apne haath me lekar bola, "Sonu tum to kabhi mujhe chhorkar nahi jaogi?"

Sonu ne na me sar hilaaya.

Mohit bola, "Pakka na?"

Jawaab me Sonu ne Mohit ki aankhon ko apne haathon se band karke Mohit ke hothon par kiss kiya. Pehle to Mohit hakka Bakka reh gaya fir usne Sonu ko apni taraf kheenchkar use kiss kiya.

"Sonu! Mohit!" Rajat ne aawaz di.

Jab teeno bus par chadhe to Sonu ne chillakar Mohit ko aawaz di, "Mohit. Kitne lips fat gaye hain tere? Lipguard chahiye?"

Mohit ne hoth bheench liye magar sharm se laal uske chehre ko chhipane ka koi tareeka nahi tha.

Sonu jaakar Rajat ke bagal wali seat par baith gayi aur apni hatheliyon ko apni god me rakhkar unhe dekhte huye boli, "I love Mohit."

Rajat ne chaunkte huye dekha, fir khud ko sambhalkar bhare gale se bola, "Matlab...kab...Mera matlab sahi h...acche lagoge tum dono saath me."

"Tum Mohit ko sach kab bataoge?" Sonu boli.

"Mera kaun sa sach hai Mohit ko bataane ko?"

"Kab tak chhupaoge apni feelings ko Rajat? Agar ab bhi chup rahe to Zindagi bhar pacchtane ke alawa kucch nahi milega."

Rajat poore safar chup hi raha.

Jab bus stop par teeno utre, to Rajat bola, "Mohit, ek second."

Mohit chillaya, "Sonu ruko, Rajat bulaa raha hai."

Sonu ne bina peeche mude kahaa, "Aj nahi, Mohit. Aaj Rajat ko sirf tumse baat karni chahiye."

Mohit Rajat ke saamne khada ho gaya. Rajat chup hi raha.

Mohit bola, "Ab kucch bologe bhi. Yaar, pata hai mujhe, tum Sonu ko like karte ho."

Rajat ne uski baat kaatkar kaha, "I love you."

"Kya?"

"I love you, Mohit."

Mohit hanste huye bola, "Are vo to main bhi love you. Itna senti kyon ho rahe ho?"

Rajat ne Mohit ki aankhon me dekhkar kaha, "I love you, not as a friend. I love you bilkul vaise hi jaise tum Sonu se pyaar karte ho. Mujhe pata hai ki aaj ke baad tum meri shakal bhi dekhna nahi chahoge, par yahi sach hai."

Mohit thodi der chup raha. Rajat vaapis jaane laga. Mohit ne kaha, "Rajat ruko!" Aur Mohit Rajat ke paas aakar peeche se uske gale lag gaya.

-----------

2005

Ek suit pehne ladka railway station par kisi ka intezaar kar raha tha. Usne apne sunglasses utaare. Tabhi neeli saari pehne ek ladki train se neeche utri. Uske maathe par ek chhoti si neeli bindi, aur maang me sindoor tha.

Us ladke ne ladki ka suitcase utha liya.

Ladki hanskar boli, "Aur DM Sahab! Laal batti vali gaadi lekar aaye ho kya?"

"Sonu madam, main personal reasons ke liye kabhi sarkaari facilities use nahin karta. Aur apni dharmpatni ko receive karne ke liye meri puraani bike hi kaafi hai. Tumhara agle TV show ka screenplay complete ho gaya?"

"Nahin. Ab yahin complete karoongi. Likhte likhte haath bhi to dard karne lagte hain. Aaj vo aa raha hai, Mohit."

Mohit bola, "Haan! Aaj finally us raat ke baad pehli baar ham log usse milenge. Hotshot entrepreneur hain Sirji, India ki highest turnover vali company ke founder. Maje me zindgi kat rahi hai ladke ki. Ladkiyan marti hain Rajat Malhotra par. Saale ka naam hi stylish hai..."

Sonu ne aas paas kucch soonghne ki koshish karte huye kaha, "Mohit zara dekho ye jalne ki mehek kahaan se aa rahi hai?"

"Apne best friend ke super successful hone se jo na jale, use dost kehlane ka koi haq nahi. Aur ab jo chahe vo us par mare, Rajat Malhotra ka pehla pyaar to Mohit Mishra hi hai..."

"Aur Mohit Mishra ka pehla pyaar kon hai?"

"Luna."

"Maar khaoge tum mere haath se." Kehkar Sonu ne zor ka mukka Mohit ke pet me maara.

Kaisi lagi ye kahaani? Please comments me zaroor bataiyega.