Agle din school me Sonu Mohit ko dekhkar bhi avoid karti rahi. Library mein uski dost Neeta kone mein baithkar table ke neeche Filmfare magazine se Akshay Kumar ki photo vala panna faad rahi thi.

Neeta: "Samiksha, Librarian ma'am is taraf dekhen ya yahaan aye to mujhe ishara zaroor karna."

Sonu: "Yaar mujhe kitaabon ke panne fatte dekhkar accha nahi lagta. Tu poster kharid le Na Akshay ke agar tujhe vo itna hi pasand hai vo."

Neeta: "Arey! Is tarah rules todkar free ki cheez paane ka mazaa hi alag hai."

Tabhi Library madam khadi huyi aur Neeta ne jhat se doosri magazine utha li aur Filmfare Sonu ke paas rakh di.

Librarian ma'am: "Go back to your class. Sinha Sir ne tum logon ka Maths register check kar diya hai."

Saare students line mein lagkar chupchaap vaapis class mein gaye. Sinha Sir ek ek student ko bulakar uska register vaapis kar rahe the.

"Akash!"

"Thank you Sir."

"Rajat! Good work!"

"Thank you Sir."

"Mohit!"

"Thank you Sir!"

"Neeta."

"Thank you Sir."

"Samiksha! Tum vahin ruko! Tumhara register to class mein sabse best hai!"

Samiksha ne socha, "Maine to kucch problems bhi unsolved cchorr di thi. Fir Sir kaise..." Fir bhi usne zor se kahaa, "Thank you Sir."

Mohit ne ek eyebrow uthakar Sonu ki or dekha.

Sinha Sir: "To Samiksha ne register itne acche se maintain kiya hai ki aap sabko isse seekhna chahiye. To main register ke kucch pages padhta hoon."

Sinha Sir ne gala saaf kiya aur Samiksha ki notebook padhne lage:

"Sonu school se laut hi rahi thi ki achaanak se zoron ki baarish hone lagi."

Sonu ko kaato to khoon nahi. Vo mimiyate huye boli, "Sir. Please aage mat padhiye. Vo galti se maine apni Maths register ki jagah apni fanfiction vala register submit kar diya."

Sinha Sir bole, "Are are! Poori 11-A ko jaanne to do tumne Maths ki problems solve ki hain. To Samiksha ne aage likha hai:

Apne school bag ko Sar ke oopar rakhkar Sonu ghar ki or jaa hi rahi thi ki ek tez Raftaar ki gaadi uske bagal se keechad udaati huyi nikal gayi. Sonu ke kapde keechad se lath path ho gaye. Tabhi vahaan Mohit kaala suit pant pehne chhate ke saath aaya."

Sab Mohit ki taraf dekhne lage. Mohit apne shareer ko jitna cchota bana sakta tha utna kursi ke sahaare baith gaya ye sochkar koi uska laal par chuka chehra na dekh sake.

"Sonu ko dekhte hi usne apna coat Sonu ke oopar daala, aur apna chhata door fenka. Usne Sonu ka haath pakda aur use apni taraf kheenchkar apni baahon mein bhar liya...

Mohit Beta! 6 feet lambe ho tum gardan, kandhe kitne bhi mod lo tumhari shakal nahin cchupegi."

Saari class zor zor se hans rahi thi.

Aakash bola, "Are vaah Mohit! Tum to ham sabse aage nikle. Seedha..."

Tabhi Sonu chillayi, "Are maine is Mohit ke baare me nahi likha. Maine to Silk route Band ke singer Mohit Chauhan ke liye fanfiction likha tha."

Sinha Sir ne continue rakha, "Mohit ne Sonu ko apni baahon mein bhar liya aur usse kaha: mere paas aao. Sonu apna chehra uske kareeb lekar aayi. Mohit fusfusaya: Aur paas. Sonu uske aur kareeb aayi aur fir Mohit uske kaan ke kareeb apne hoth laakar bola: Dooba dooba rehta hoon baaton me teri, deewana ban gaya hoon main chaahat mein teri."

Saari class saath me gaane lagi: "Dooba dooba rehta hoon..."

Mohit ko samajh nahin aa raha tha ki dharti ke kis kone mein jaakar cchupe. Sonu ne use kahin ka nahin cchorra tha. Itna mazaak zindagi me kabhi uska nahin banaa tha aur Aakash jaise ladke to uske gusse ke dar se usse door hi rehti thi...Sonu! Aaj to vo Sonu ka gala dabaakar uske chhote chhote tukde Box mein rakhkar usi Silk route Band ke Mohit Chauhan ko as a gift bhejega.