- تصويتك ع البارت يدل على اعجابك به ويدفعني للاستمرار لا تبخلوا علينا ♥️ + كومنت يسعدني وما يضر 👏🏻.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الدكتور : اي والله وتقدر تشوفه بعد ما يخلص الفحص ..

ابو راكان ع طول طاح سجود شكر لله و يبكي ......

الدكتور : الحمدلله ع سلامته .. الله كتب له عمر جديد  ..

ابو راكان بالكاد  ماسك نفسه لا يطيح من  الفرحه : الله يسلمك يا دكتور ..

الدكتور مسكه  مع  ذراعه : اقعدع الكرسي وراك ...

ابو راكان قعد : لو سمحت ابي اشوفه اللحين ..

الدكتور : ما ألومك متشفق على شوفة ضناك بس الصبرحتى نتطمن عليه اكثر ..

ابو راكان : طيب وينه ابي اشوفه لو من بعيد ..

الدكتور : بعد شوي رح يودونه غرفه 112 بالدور الثالث انتظره هناك شوي و يجيبونه ..

ابو راكان : ان شاء الله ..  

بالنسبه لراكان  خلص الفحص ونقلوه على غرفته ... و ابوه كان برى الغرفه في انتظاره ....

في بيت الريم .. تركي جاهم ركض لانه دكتور كانوا معتمدين عليه بعد الله بعلاجها  و يفهمهم وش فيهاا .....

سمر تبكي : ت تركي تكفى وش فيها اختي ؟!

تركي يقيس نبضهاا وحط اصبعه ع فمها : ما تتنفس لازم ناخذها المستشفى بسسرعه ...

طلال واقف مصدوم .. مو قادر يتكلم او ينطق بحرف .. كل  اللي خطر في باله انها ماتت ! ما  عاد رح يشوفها مره ثانيه !!

سمر واقفه وايدينها ع فمها تبكي من قلب هي بعد خايفه تكون ماتت ...!

تركي صرخ ع سمر يصوت عالي : لييييييييييييه وااااقفه بسرعه جيبي عباتهاا بسسرعه ..

راحت سمر ركض تدورالعباه و بسرعه لبستها اياها لبس اي كلام و تركي حملها ع ذراعيه  و مر من جنب طلال اللي لازال واقف متأثر من  اللي صار ... و سمر اخذت عباتها هي الثانيه و لحقتهم ....

و بخلال دقاييق معدوده وصلوا المستشفى ....

طبعا تركي اخذها للمستشفى اللي هو يشتغل فيها وكلمهم يجهزوا غرفة الطوارىء ....

اول ما وصل كان الممرضين والممرضات فعلا بانتظاره و مجهزين السرير .. ع طول تركي طلعها من السياره و حطهاا ع السرير .. دخلوها بسرعه للطوارىء ...

سمر دموع خوف : تركي تكفى قولي وش فيهاا ؟!

تركي ~ شكلها جلطه دماغيه بس ما اقدر اقولها و تخاف اكثر من كذا .. : ما فيها الا العافيه ان شاء الله انتي اهدي و ادعي لهااا ..

سمر : يارب ...

في بيت الريم .. ظل طلال لحاله وبغرفة الريم قعد ع سريرها يبكي ....

طلال ~ و اذا ماتت كيف بعتذر لها ؟! >> قفل جواله كان خايف يسمع خبر انها توفت ...

كان ابو راكان ينتظر شوفة ولده ع احر من الجمر .. واخيرا جابوه .. استوقفهم بالممر و هو ع السرير و مسك يد ولده .. لكن كانت ردت فعله غير متوقعه .. بسرعه سحب ايده وسأله ........

راكان : من انت ؟!

ابو راكان يناظره مصدوم : اش فيك ؟ انا ابوك !! ما عرفتني ؟!

راكان كانت نظراته غريبه و مو فاهم شي حوله و باين انه خايف ....

الممرضه : عفوا رح ندخله غرفته ..

ابو راكان : ايييه تفضلوا ... >> ما قدر يدخل غرفته و يسأله كان  خايف ان ولده فقد الذاكره .. لذلك قعد برى ..

طلعت الممرضه ناداها ......

ابو راكان : لو سمحتي !! نادي لي الدكتور المشرف على حالته ضروري ..

الممرضه : هواساسا جاي بالطريق ..

ابو راكان : زين شكرا لك ..

الممرضه : العفو ..

من جهه ثانيه و بنفس المستشفى بالطابق الاول .. طلعت الدكتوره .....

تركي : طمنينا يا دكتوره !!

سمر واقفه تسمعهاا و قاابضه ايدينها خايفه من اللي رح تسمعه ....

الدكتوره : والله ما ادري اش اقولك ..

سمر انهارت وطاحت بالارض : لااااااااااا ماااتتت ...!!!!

مسكها تركي من ذراعها وحاول يهديها و ساعدته الدكتوره ....

الدكتوره : ما ماتت البنت الله يهديك ما ماتت ..

سمر حست براحه شوي : اجل اش فيها اختي ؟!

تركي : تعالي اقعدي خليني افهم حالتها من الدكتوره و اجي اشرح لك ..

سمر : لا لا خلني ابي اعرف وش فيها تكفى يا اخوي تكفى ..

تركي : طيب يا دكتوره علمينا وش فيها ؟!

الدكتوره : التشخيص الأولي لحالتها انها دخلت بغيبوبه ..

سمر تجهش بالبكي : اهىء .. رح تمووووووت !!

تركي عصب : يا بنت الحلال امشي معي اقعدي بفهم الحاله و اعلمكك ..

ما تحملت سمر الكلام و فعلاا راحت قعدت و هي تبكي كانت حالتها جداً صعبه تخيلتها ع شفا الموت ...

تركي : اعتذر منك يا دكتوره ..

الدكتوره : مو مشكله يا دكتور تركي ما ألومها الله يكون في عونهاا ..

تركي : امين ويعيننا كلنا.. انا توقعت انها جلطه  دماغيه بس ما كنت متاكد ..

الدكتوره : هذا التشخيص الاولي .. نعتقد انها دخلت الغيبوبه بسبب الجلطه الدماغيه بس للحين ما  تأكدنا .. نحتاج فحوصات اكثرحتى نعرف لو كانت فعلاً جلطه دماغيه او شي ثاني .. واش السبب اللي خلاها تدخل غيبوبه ..

تركي  : حتى انا ماني فاهم .. ما تعرضت لأي شي ممكن يسبب لها الجلطه ..

الدكتوره : يعني ما تعرضت لحادث ما ؟ او ضربه ع المخ ؟

تركي : لا والله ما اظن ..

الدكتوره : هل عندها صرع ؟

تركي : لا ابدا ..

الدكتوره : طيب كيف طاحت عليكم ؟ يعني كيف كان وضعها ؟ هل لاحظتوا انها حست بالدوخه قبل و لا طاحت فجأه ؟

تركي باستحياء : والله مدري عنها .. انا رجعت من دوامي نمت .. اكيد اختي تعرف وش اللي صار معها بالضبط .. خليها تهدا شوي و هي تحكي لك ...

الدكتوره : ان شاء الله الله يقومها بالسلامه ..

تركي : اللهم امين ..

كانت رح تمشي ناداهاا ....

تركي : عفوا .. متى رح تصحا ؟!

الدكتوره : والله ما اقدر اعطيك موعد محدد .. هذا بعلم الغيب .. يمكن تصحا بعد ساعات او ايام او لا قدر الله بعد شهور ..

تركي : لاحول و لاقوة الا بالله ..

الدكتوره : الله يصبركم .. ادعوا لها ..

تركي ~ الله لايفجعنا بغالي ... و امي اللحين كيف اقولها ...

راح قعد مع سمر و علمها بالتفاصيل و طول الوقت كانت سمر تبكي و كأن البنت ماتت !! ..

تركي : خلاص يا بنت الحلال لا تبكين ادعي لها تراها ما ماتت الحمدلله و  رح تصحا ان شاء الله ..

سمر : اهىء م م ما اقدر اتخيل البيت بدونهاا ...

تركي : الله يصلحك تموتيها و هي عايشه  .. اذكري الله !!

سمر: لا إله إلا الله ..

تركي : صح نسيت اخوي طلال لازم اقوله عن الوضع .. وامي بروح لها اللحين بنفسي و اقولها اللي صار ...

سمر : ابي ادخل اشوفها ..

تركي : ما رح يسمحون لك اللحين .. هي بالعنايه المركزه .. اقعدي هنا شوي لين اكلم اخوي واقابل امي ونرجع بعدها كلنا للبيت ..

سمر بصوت حزين : لازم اشوفها ..

تركي رفعت ضغطه : استغفرالله بس ...

دق على اخوه  طلال جواله مقفل ....

تركي ~ وش صاير معه ذا بعد جواله مغلق !؟ .. ( راح باتجاه الغرفه اللي امه فيها .. وهو يردد ) الله يعيني كيف بقول لامي ..

وصل الدكتور لغرفة راكان بس قبل لا يدخل تكلم الاب معه شوي .....

ابو راكان : يا دكتور الولد ما عرفني .. معقول فقد الذاكره ؟!

الدكتور : هو كان في غيبوبه سنه ممكن تصير انه يفقد الذاكره .. و لا تنسى ان راسه هو كان اكبر متضرر من الحادث ..

ابو راكان بنبرة حزن : لا حول و لا قوة الا بالله .. يعني معقول مارح يعرفني لا انا و لا امه و لا اخواته ؟!

الدكتور : خل املك بالله قوي .. ولدك توه صحا بعد ما فقدنا الامل فيه و هذي لحالها معجزه واللحين حالته مستقره و ما عادت حياته بخطر.. واذا كان فعلاً فقد ذاكرته ممكن يكون مؤقت و مع الوقت رح يسترجعها .. انت تفائل ..

ابو راكان : ان شاء الله مثل ما تقول ..

الدكتور : تعال معي ادخل نسأله مره ثانيه و نتأكد ..

ودخلوا لغرفته .. كان منسدح و وجهه للجدار ...

الدكتور : مرحبا راكان .. احب اطمنك ان صحتك تمام ولله الحمد بس يبي لك اعادة تأهيل .. و الكسور اللي تعرضت لها الحمدلله جُبرت في السنه اللي انت كنت غايب فيها عن الوعي ..

راكان يبكي بصوت مكتوم ~ اش يقول هذا ماني فاهم شي !؟؟؟

الدكتور : راكان ممكن تلف علينا شوي..؟

راكان غطى وجهه باللحاف .... ولا رد عليهم ..

الدكتور : راكان !!

راكان ....... لا رد

الدكتور : اش رايك يا ابو راكان نخليه يرتاح اليوم و بكره تشوفه ..؟

ابو راكان : ان شاء الله على خير ..

طلعوا من الغرفه ........

الدكتور : لازم نصبر عليه شوي بعدين نتأكد من حالته ...

ابو راكان : دام اني شفته يتحرك و ناظرني خلاص انا ارتحت .. يالله ابي اروح البيت ابشر امه المسكينه كل يوم كانت تدعي له ..

الدكتور : الحمدلله ربك كريم استجاب لدعواتها ..

ابو راكان : ايه و نعم بالله ..

اما بالنسبه لراكان كان عايش بحاله ضياع مع نفسه ....

راكان ~ ميييييين انا ؟؟؟ انا مو كذا ؟! اش صار معي ؟ هذا مو انا !! مين هذول الناس ؟؟ عقلي بينفجر ما استوعبت اللي انا فيه ؟ ياربي وش اللي حصل معي ؟ هل توفيت ..؟ هل انا بحياه ثانيه ؟؟ وين اهلي ؟ احس بالخوف !! .. >> كان يبكي من الرهبه ...

وصل تركي غرفة امه .. متردد كثير ما يدري وش يقولهاا .. واخرشي فكر انه ما يقول اي شي حتى تطلع امه من المستشفى ويوصلون البيت وترتاح .. دق باب الغرفه ودخل .....

تركي : السلام عليكم ..

ام تركي باستغراب : عليكم السلام .. اش جابك من بدري ؟ معقول كلموك المستشفى وقالوا انه خلاص نقدر نطلع ؟!

تركي ارتبك : لا لا والله .. بس دوامي بعد شوي قلت اجي بدري عشان اشوفكم ..

ام تركي : اهاا .. ابشرك اخوك عامر صار بخير .. شوفه ما شاء الله صاحي و يلعب .. و قعدت ادق ع اخوك طلال جواله مقفل .. كنت ابيه يجي يرجعنا البيت قبل يداومم .. ( بقلق ) يا الله عسى ما يكون صاير له شي بس !!

تركي : لا تطمني ما فيه شي انا جيت من البيت وهو موجود فيه .. يمكن شحن جواله خلص و ما شحنه عشان كذا جواله مقفل .. واذا ع الرجعه انا برجعكم للبيت ...

ام تركي : ايييه مره تعبت ابي ارجع البيت وانام وارتاح امس طول الليل ما نمت ..

تركي استغرب : ليه عامر اتعبك ؟

ام تركي بحزن : لا والله بالعكس كان نايم براحه .. انا اللي ما قدرت انام كان قلبي ناغزني مدري ليه جت الريم على بالي .. احس اني بالسنوات الاخيره قسيت عليها كثير .. واخرها امس كل ما اتذكر وجهها وهي منزلته للارض وتبكي وانا اهاوشها اعتب على نفسي مع اني كنت ادري مالها ذنب باللي صار لاخوك لكن ما ادري ليه هاوشتها كذا .. طيبتها يمكن تقهرني لانها تذكرني بابوك .. بس مالي عذر اعاملها كذا ..

تركي كان يستمع لها بصمت بالكاد ماسك دموعه لا تنزل  ... والام مستمره بالكلام ......

ام تركي تنهدت بتعب : تصدق اني ما كلمتها من لما رجعتوا البيت وهي دقت علي مرتين كنت معصبه منها و ما رديت .. اخر الليل مسكت الجوال ابي اكلمها اطمنها علينا لان اعرف اختك ذي تقلق كثير بس هونت قلت اكيد انها نايمه .. ارسلت لها مسج انو اخوها صار تمام ورح نطلع الفجر وقلت لها تحضر لنا احلا فطور للعايله ...>> قامت تلبس عباتها و تلم اغراضهاا .. وقعدت عامر ع السرير و وقفت مقابله وصارت تلبسه نعاله ( وانتوا بكرامه ) ...

تركي ما تحمل ونزلت دموعه ...

امه كانت مشغوله مع عامر تلبسه ومعطيه تركي ظهرها....

ام تركي : و اللحين يالله ابيك تودينا البيت ما نبي نتأخر على الريم ....>> طبعا نزلت عامر ع الارض ومسكت يده ..

تركي رفع ذراعه لعيونه يمسح دموعه .. يبكي بدون صوت ما تحمل الموقف وتأثر من كلام امه وقعد ع اقرب كرسي وراه .....

ام تركي ألتفتت عليه : يا الله نمـ ......!! ( ركضت له بقلق و خوف و وقفت عند راسه وحطت يدها ع شعره بحنيه .. و هو قاعد ع الكرسي ) يمه تركي بسم الله عليك وش فيك ..؟ ليه الدموع هذي ؟؟؟

تركي سكت ما تكلم ......

ام تركي : حبيبي لا تخوفني عليك اش فيك ؟ انت تعبان ؟

تركي يمسح دموعه اللي ماهي راضيه توقف : لااا يمه .. بس .. بس الريم .. الريم بغيبوبه ....

ام تركي ابتسمت ثم ضحكت وضربته ع كتفه بخفه : ههههههههه ترااا مزحك ثقيل .. ليه تقول عن اختك كذا ..؟ عيب عليك والله ..

تركي عيونه للارض ويبكي .....

ام تركي قعدت ع الارض عند رجوله مصدومه ثم نزلت دموعها : انت تمزح صح ؟ اكيد تمزح .. قولي انك تمزح لا تخرع قلبي مارح اتحمل !!

تركي وقف ورفع امه وقعدها ع الكرسي مكانه يحاول يفهمها ويهديها ....

وصل ابو راكان البيت .. وجهه كله فرح و سعاااده ..ولحق ع الفطور مع عايلته .. وهو يفطر و مستانس قال لهم الخبر الحلووو .....
ابو راكان : اسمعوني كلكم عندي خبر حلو ...

ام راكان : انت من دخلت و الابتسامه شاقه وجهك .. بشرنا اش هالخبر ؟

لينا تهمس لاختها : شكله جاك عريس ي ليوون ...

ليان غصت بلقمته : كح كح ...

لينا : ههههههههههه بسم الله عليك ..

ام راكان ألتفتت للبنات : اش فيكم انتوا بعد ؟

لينا كاتمه ضحكتها : ولا شي يمه ..

ابو راكان : المهم اسمعوني راكان الحمدلله صحا من غيبوبته اليوم ..

ام راكان قعدت ثواني م استوعبت الخبر لحد ما طاحت دموعها فرح  : ججججد والله !!

ابو راكان : اي والله توني راجع من المستشفى بعد ما كلمني الدكتور نص الليل وطلب اني اجي ..

ام راكان تمسح دموع الفرح : وليه ما اخذتني معك ابي اشوفه ؟

ابو راكان  : ما علمني الدكتور .. بيني وبينك  حسبت ان الله اخذ امانته حتى رحت المستشفى وانا خايف من اللي رح اسمعه لكن الحمدلله طلع شي معجزه والله منّ علينا بشفاءه ..

ام راكان ماهي واسعتها الفرحه : الحمدلله ....

لينا بدون اي ردة فعل قامت عن الكل وصعدت غرفتهاا ...>> محد كان حولها ابوها و امها مشغولين بالفرح ع ولدهم .. الوحيده اللي انتبهت ليان ..

ليان ابتسمت : الحمدلله ع سلامته ..

ام راكان : يالله يالله قوموا .. نبي نروح له ابي اشوفه ...

ابو راكان اختفت ابتسامته : بسسسس .....!

ام راكان خافت : بس ايشش؟!

ابو راكان : الظاهر ان عنده فقدان ذاكره ..

ام راكان انصدمت : اييييش ؟! يعني ما يعرفنا ؟!

ليان تسمعهم بصمت و منصدمه مثل امهاا ...!

ابو راكان : اييه شافني و لا عرفني ..

ام راكان رجعت تبكي : يا الله يارب ارحم حال ولدي يالله يارب لا تجعله ينساني انا من ولدته و ربيته و تعبت عليه ...

ابو راكان : امين ..

ام راكان : ابي اروح اشوفه  حتى لو ما يعرفني .. ابي اتطمن عليه و أمسك ايدينه و امسح ع شعره .. ابي اضمه قد ايش اشتقت له  .. تكفى يا  ابوه ودني له ..

ابو راكان : انا اقول لو تخلينه بكره افضل ..

ام راكان تنرفزت و وقفت  و ضربت بايدينها ع الطاوله بقوه : توديني ولا انتظر السواق يجي و يوديني ؟ ولا اقولك ليه انتظر السواق اطلب تاكسي و اروح .. مافيني صبر متلهفه ع شوفته ...

ابو راكان ابتسم : كنت عارف مافيك صبر .. خلاص رح اوديك ..

ام راكان ناظرت ليان و هي مره مبسوطه : يالله نادي اختك و تعالوا معنا ..

ابو راكان : انا اقول خلي البنات وقت ثاني ..

ليان : ايه يمه خليه وقت ثاني بعدين عندنا دوام بعد شوي ..

ام راكان : يووه صح نسسسيت.. يالله اجل انا بروح ألبس عباتي..

ابو راكان : و انا انتظرك بالسياره  برى ..

ع طول ليان قامت وراحت لاختها تعلمها بالتفاصيل اللي ما سمعتهاا ......

نرجع للمستشفى ..

طلبت ام تركي من ولدها انه يوديها تشوف الريم قبل يرجعون البيت .. وكانت حالتها يرثى لها ...

تركي : لا م نقدر يا يمه لانها في العناية المركزه وممنوع احد يقرب منها..

ام تركي : طلبتك ي تركي خلني اشوفها لو من بعيد..

تركي : طيب بحاول اخليك تشوفيهاا ..

تقابلت ام تركي مع سمر اللي كانت قاعده بمقاعد الانتظار لحالها و تبكي .. راحت لها امها وضمتهاا ....

سمردموعها اربع اربع : يمممممممه اختي تموووووووت !!

ام تركي ضمتها بقوه وهي بعد تبكي : لا تقولي كذاا !

تركي : يممه! سمر! وش فيكم تبكون و كأن البنت توفت لا سمح الله؟ اذكروا الله تراها عايشه ادعوا لها ...

ام تركي وقفت بكي : صادق هي ما ماتت .. يالله ودني لها !

تركي : دقيقه اشوف الوضع و اجي .. خليك مع سمرهديها من جينا و  هي تبكي..

ام تركي : طيب لا تتأخر علينا ..

تركي : ابشري ..

قعدت ام تركي مع سمر تسألها وش صار للريم .. وسمر كانت تحكي لها و تبكي بالكاد هدتها امهاا .....

راح تركي للدكتوره يسألها عن امكانية انهم يشوفوا الريم ... وقالت يقدرون لكن من خلف الزجاج .....

وصل ابو راكان و زوجته للمستشفى .... قابلوا الدكتور قبل التوجه لغرفة راكان .....

ابو راكان : معليش يا دكتور هذي ام الولد أصرت انها تشوفه اليوم ما قدرت امنعها ..

الدكتور : مو مشكله من حقها بعد كل شي هي امه .. بس اعتقد انه اللحين نايم ..

ام راكان : دكتورتكفى خلني اشوفه حتى لو انه نايم ابي أمسك ايدينه ابي احس فيه ..

الدكتور : حااضر يا ام راكان .. تعالوا معي ..

ابو راكان : ارتاح يا دكتور انا أدل غرفته ..

الدكتور : ان شاء الله واذا احتجتوا اي شي اضغط  الزر اللي بالجدار فوق سريره ..

ابو راكان : ابشر ..

مشت ام راكان متوجهه لغرفته و ماهي واسعتها الدنيا من الفرحه .... وهي بطريقها شافت بالممر وحده قاعده تهدي في بنتها .. لفتوا نظرها و قامت تناظرهم و تمشي .. فجأه سمعت الحرمه تصرخ ع البنت .......

..... : خلاااااااص لييييه تبكين اختك بغيبوبه ما ماتت !!

هنا  وقفت ام راكان وشدها الكلام اللي سمعته ....

ام راكان : ابو راكان دقيقه بس انتظرني هناك شوي و ارجع ..

ابو راكان باستغراب : وييييين ؟!

ام راكان ما ردت عليه و راحت للام وبنتها ..... : عفوا .. السلام عليكم ..

ام تركي : هلا اختي عليكم السلام ..

ام راكان : معليش وانا امشي سمعتك وانتي تقولين ان اخت البنت بغيبوبه ..

ام تركي بصوت حزين : ايييه بنتي !

ام راكان : اول شي الله يشفيها يارب و تقوم بالسلامه .. ثاني شي لا تيأسوا من رحمة الله لو اقولك قصة ولدي اللي دخل بغيبوبه ما تصدقين ..

سمر وقفت بكي و ركزت مع هالحرمه الغريبه ...

ام تركي شدتها بالكلام : اش صار ؟

ام راكان : تخيلي صار له سنه بغيبوبه والاطباء قالوا خلاص ماله امل افصلوا عنه الاجهزه و انا رفضت والحمدلله اني رفضت .. اليوم بشرونا انه صحا من غيبوبته و انا اللحين رايحه اشوفه ..

ام تركي دمعت عيونها : الحمدلله ياربي الحمدلله .. يارب ان بنتي ما تطول وتصحا

بسرعه ...

سمر تمسح دموعها : يعني لها امل ؟

ام راكان : الامل بالله ما ينقطع يا بنتي .. تفائلي .. واعذروني على اني تدخلت فيكم .. بس حبيت اعطيكم امل ..

ام تركي : لا بالعكس الف شكر لك لانك علمتينا بقصتك فعلا عطيتينا امل بعد الله ..

ام راكان : العفو .. وعسى الله يستجيب دعواتكم وتصحا بنتكم بالسلامه ..

ام تركي : اللهم امين ..

ام راكان : يالله عن اذنكم بروح اشوف ولدي ..

ام تركي : اذنك معك ..

بعد ما راحت من عندهم .....

ام تركي : الحرمه هذي طمنتني الله يسعدها .. يووووه نسيت اسألها عن اسمها ..

ثم جا تركي و اخذهم يشوفوا الريم .... طبعا شافوها من خلف الزجاج و الاجهزه ع جسدها و راسها ... ما اقدر اوصف كيف كانت حالتهم صعبه وهم يناظروها من بعيد ... بعد ما شافوها انطلقوا للبيت .. الكل كان حزين ....

نرجع لـ آل  راكان ....

ابو راكان : مين هذيك المره اللي قبل شوي كلمتيها ؟

ام راكان : وحده ما اعرفها ..

ابو راكان : اش قلتي لها طيب ؟

ام راكان : بعدين اقولك .. المهم ابي اشوف ولدي اللحين ..

ابو راكان : يالله وصلنا هذي غرفته ...

دقووا الباب .. ثم دخلوا ... الام ع طول مسكت ايده وباسته ع راسه ... و مسحت ع شعره ... أما هو كان نايم .. و الاب واقف و يناظرهم من بعيد والابتسامه شاقه حلقه واثنينهم الدنيا ماهي واسعتهم من الفرحه ...

ام راكان : فديتك يا اكبر و اغلى عيالي .. الحمدلله والشكر لله اللي رجعك للحياه وانت كنت ع شفا الموت ...

ابو راكان تنهد وهو مبتسم : ايييييه والله الحمدلله ..

ام راكان ناظرت الغرفه : يا ابو راكان الغرفه مو عاجبتني صغيره ما تناسبه .. لا تنسى تنقله جناح VIP ابي ولدي يرتاح ..

ابو راكان : اكيد خلي الموضوع علي .. انا من اول قايلهم بس ما كان فيه غرفه متاحه .. لكن رح ارجع اكلمهم مره ثانيه لا تشيلين هم ..

ام راكان ابتسمت : الله يخليك لنا و لا يحرمنا منك ..

ابو راكان : امين و لا يحرمني منك يا زوجتي الغاليه ..

ام راكان يدها اليمين تمسح ع شعره ويدها اليسار حاطتها ع يده ...

راكان فتح عيونه انصدم : ء ء من انتي ؟!

ام راكان طاحت دموعها : يا عمري يا راكان انا امك ناظرني زين متأكده رح تعرفني ..

راكان سحب يده : وخري عني انتوا مين ؟ انا وين ؟ انتوا مو اهلي !!

ام راكان تبكي بحرقه : انااا امك اللي جبتك ...

راكان يبكي : لا انتي مو امي .. امي روان اسمها روان و ابوي ابوي خالد بن تركي بن طلال انتوا مين ابعدوا عني !!

ابو راكان و ام راكان يناظروه مصدومين ....

ام راكان دموعها م وقفت وحست بخوف : اش قاعد يقول الولد ؟؟ من الناس اللي يقول عنهم ... ( ركضت عند الاب ) ولدك اش فيه كأنه مجنون !!؟

ابو راكان عجز عن الكلام .....

راكان تلحف من جديد و غطا وجهه عنهم وكان يبكي ~ من هذول من هذول ؟ انا ليه صرت كذا ؟ وش قاعد يصير معي ما فهمت شي .. ؟!

ابو راكان مسك الام و طلعها برى : والله ماني عارف وش اقول .. لكن انتي استهدي بالله لا تبكين قلت لك انه فاقد الذاكره ..

ام راكان : ذكر اسماء ناس مدري من وين و تبرى منا !!! .. نظراته ما كأنه يعرفنا او شافنا بحياته !!

ابو راكان : خلينا نسأل الدكتور و نفهم منه ...

طبعا راحوا و علموا الدكتور بكل اللي صار .. و سألوه اش تفسيره للي صار .. قال لهم انه ممكن لما كان في غيبوبه كان يشوف نوع من الحلم و فيه هذي الاسماء واشتبك الحلم مع الواقع و ما صار يفرق بينهم .. وطمنهم انه شي طبيعي و يحدث احيانا ويحتاجون انهم يصبرون عليه و يسايرونه ...

في بيت اهل راكان .. التؤأم كانوا لحالهم ينتظرون الاخبار من امهم وكيف كانت مواجهتها مع راكان .... طبعا الثنتين كانوا قاعدات بغرفة لينا ....

لينا : متأكده من الكلام اللي قلتيه ؟

ليان : اقولك سامعه ابوي بإذني يقول انه فقد الذاكره ...

لينا : يعني اللحين ما رح يتذكر كل البلاوي اللي سواها فينا ؟

ليان : الظاهر كذا ..

لينا ابتسمت بخبث : والله ياني تحمست ..

ليان باستغراب : وش اللي تحمستي له ..؟

لينا : بس اقول شكله حان وقت الانتقام ..

ليان : اي انتقام الله يهديك .. اللحين هو مريض خليه بحاله !

لينا : لا ياحبيبتي والله ما انسى لما كان يهددنا انا و اياك و يجبرنا نطلع معه و مع اخوياه .. و يقعد يطقطق علينا و يمصخرنا يعنني القوي.. و لا كل ما طفش جا طاح فينا ضرب الين تورم ظهري .. يستغل سفر امي و ابوي الكثير بسبب شغلهم و يسوي سواته .. بالله عمرك شفتي اخ مصور اخواته و يهددهم لا يعلمون اهلهم ! ما اعتقد شفتي و لا رح تشوفين ..

ليان : لا تذكريني  بهذيك الايام .. جد فكرت وقتها بالانتحار ..

لينا : ايه كله منه يكرهك بحياته .. و فوق هذا عنده ميزانيه ضخمه في حسابه بالبنك .. وموظف خدامات له لحاله يتعاونون فينا انا وياك و ياخذونا معه غصب لأماكن احنا ما نبيها ..

ليان : انا متأكده ان اخوي كان مريض نفسي .. كنت بقول لامي تعالجه بس خفت يدري و ياويلي منه والله ..

لينا : لا ياحبيبتي لا مريض نفسي و لا شي هذا كله من تدليع اهلك له .. كلهم كانوا خاتم بيده .. لما انا وياك رفضنا نكون تحت طوعه لجأ للتهديد .. لكن الله يمهل و لا يهمل .. والله اني تمنيته يموت ..

ليان : اوووف ليناااا خلاص !! ان شاء الله انه تغير اللحين .. فوق هذا فقد ذاكرته احس ما منه خوف ...

لينا : لا مو خلاص يا حبيبتي شايله هم رجعته للبيت .. عاد هالمره انا مقرره ما اسكت له و الله ما ارجع اعيش حياة الذل و الاهانه بشوف لي طريقه تفكني شره ..

ليان : ياربي .. خليه يجي على الخير اللحين و نشوفه بعدين نفكر نسامحه او لا ..

لينا يدها ع خصرها : عني ما رح اسامحه .. (ضربت ع راس ليان بخفه ) وانتي اتركي عنك الطيبه اللي بدون سنع و المثاليات الزايده ...

ليان طبعا كانت واقفه  قدام الشباك : شششعري يا بنت ! .. تدرين وش احلا شي بغرفتك ؟ انها تطل ع الشارع يعني يمديك تشوفين من يجي و من يروح ..

لينا : اي طبعا انا طلبت هالغرفه مخصوص لهالشي .. احب اعرف الداخل و الطالع من بيتنا ..

ليان : هههههههه ايه طبعا لانك ملقوفه ...

لينا : هههههااي طالعه عليك !

ليان ناظرت الشارع : هاااه هااه هذاهم وصلوا ..

لينا قامت تناظر معها : عسى الاخ راكان مو معهم ؟

ليان : لا مستحيل قلت لك ما رح يطلعونه اليوم ...

لينا : يكون احسن ماني مستعده اشوف وجهه ..

شافوهم نازلين و راكان مو معهم طبعا لينا استانست اما ليان كانت مشاعرها متضاربه ما بين مبسوطه وخايفه .. نزلوا ركض يشوفوا اش صار مع امهم لما شافت راكان.. لكن الام كانت حدها متضايقه ما تكلمت ولا قالت شي ع طول صعدت غرفتها .. ف قعدوا مع ابوهم و علمهم بالسالفه .....

وصلت عائلة ام تركي للبيت ... سمر ركضت غرفتها و قفلت عليها الباب .. و ام تركي دخلت عامر و نيمته بالغرفه ...

ام تركي : تركي وين طلال مو بالبيت بعد ؟ معقوله داوم جواله من اليوم مقفول !!

تركي : والله مدري ي يمه ..

ام تركي : ارجوك روح دوامه اسأل عنه خايفه لا يصير له شي هو بعد الثاني .. المصايب هاليومين ما فارقتنا ..

تركي : ما اقدر يمه لازم ارجع المستشفى اغلب مرضاي تأجلت مواعيدهم بسبب اللي صار معنا اليوم .. و فوق هذا دوام طلال بعيد و بطريق غير طريقي ..

ام تركي : طيب هو يدري باللي صار مع اختك ؟

تركي : ايه كان معنا بالغرفه لما طاحت الريم ..

ام تركي باستغراب و قلق : معقول يدري و لا جا للمستشفى ؟! معقول يدري و يروح دوامه و لا كأن شي صار ؟

تركي : والله اتوقع اي شي منه .. المهم انتي لا تقلقي .. انا بداوم اللحين و اذا جا العصر وقت رجعت طلال و لا رجع للبيت كلميني بدوره و اسأل اخوياه عنه ..

ام تركي : ان شاء الله انه يرجع ..

تركي : ان شاء الله يا الغاليه يالله روحي ارتاحي و لا تشغلي بالك ...

ومشى تركي متوجه لدوامه بنفس المستشفى ......

بالنسبه لطلال .... ما داوم و لا كان له نفس دوام .. و لازال مقفل جواله خايف يسمع خبر شين .. راح ع البحر و قعد مع نفسه حزين و يفكر ليه صار مع اخته كذا .. لما تخيل حياته بدون وجودها حس بالغربه مو متعود .. يحس انه متحسف ع كل جرح جرحها اياه ....

طلال ~ يارب انت اعلم بما في ننفسي و انت اعلم بقدر حبي لاختي .. انت اعلم بأن هذي شخصيتي و هذا انا .. يارب انت اعلم اني تعودت اعاملها بهالاسلوب .. و انت اعلم بإني كل يوم قبل انام افكر اعتذر لها ولما اصحا الصباح انحرج و ارجع بنفس اسلوبي معها .. يارب هي اختي يا ما اعانتني لما احتجتها حتى و انا مقصر بحقها يا رب لاني مقصر لا تاخذها منا يارب ارجوك .. يارب ابي اعتذر منها بصدق ابيها تسامحني .. ارجوك يارب لا تاخذها منا ارجوك ....

اخيييرااا قرر يفتح جواله و هو خايف من الاخبار اللي رح تجيه .... فتح الجوال و كان فيه عدة مكالمات من امه و اخوه .. و مسجات .. قرا مسج تركي ...

تركي : " انت وينك اختك بغيبوبه تعال للمستشفى .."

طلال ~ غيبوبه ؟!!!!! .. اش السبب ؟!

ما تحمل و دق ع تركي يسأله ....

طلال : الو ..

تركي : هلا .. انت وينك من اليوم امي ميته قلق عليك ...

طلال بخوف : الريم وش فيها ؟

تركي : مثل ما قلت لك غيبوبه ..

طلال : اي طيب ليش ؟

تركي : للحين ما ندري وش السبب ..

طلال : هي رح تصحا منها صح ؟

تركي : نقول ان شاء الله ..

طلال : متى طيب رح تصحا ؟

تركي : العلم عند الله وانا اخوك .. المهم دق على امي خل.... >> قفل الجواال ...

تركي يناظر شاشه الجوال منصدم ~ وش فيه هذا ؟ .. اجل انا بدق على امي اطمنها عليه ..

بالنسبه لطلال قعد يفتر طول اليوم بالشوارع و رجع اخر الليل ونام ... ما كان له خلق يشوف احد او يكلم احد .... الكل في هاليوم كان حزين وتعبان .. والكل ما كان لهم خلق شي حتى الاكل .....

في صباح اليوم التالي .. صحت ام تركي و صحت عيالها للدوام .. سمر رفضت تداوم و لا زالت بالغرفه حزينه بالذات كل ما تناظر سرير الريم تحس بالوحده بدونها .. اما طلال صحا قبل يصحا الجميع و طلع محد شافه .. وامهم نفسها برضو مالها خلق تداوم .. الوحيد اللي طلع لدوامه تركي لانه دكتور لازم يشوف مرضاه و في نفس الوقت يتطمن ع حالة اخته كل ساعه ....

في المستشفى .. تم نقل راكان لغرف كبار الشخصيات اخيرا .. و جاه الدكتور يتكلم معه عن تطورات حالته الصحيه .....

الدكتور : صباح الخير ..

راكان مغطي وجهه باللحاف كالعاده : ص صباح النور..

الدكتور : كيفك اليوم يا بطل ..؟

راكان : الحمدلله ..

الدكتور : ممكن تشيل اللحاف وتناظرني ؟

راكان ببطء شال اللحاف عنه : نعم ؟

قعد الدكتور ع الكنبه اللي جنب سريره وحط رجل ع رجل و هو ماسك تقرير حالته ويكلمه ......

الدكتور : الله ينعم عليك .. قول لي تحس بألم في مكان بجسمك ؟

راكان : ما احس بشي ..

الدكتور : حلو .. نتيجة فحصك كانت جدا ايجابيه الحمدلله و الكسور اللي كانت برجلك أنجبرت .. صحتك الحمدلله ممتازه بس لازم نسوي لك اعادة تأهيل حتى تقدر تمشي و تمارس حياتك الطبيعيه كالمعتاد ..

راكان مستغرب : تأهيل ؟!

الدكتور : اي نعم .. لازم تعمل شوية تمارين حتى ترجع عضلاتك تتحرك .. انت كنت نايم سنه .. اكيد عضلاتك رح يصير فيها فتور خصوصا انك كنت متعرض لكسور  ..

راكان : اها .. صح حاولت امشي ما قدرت اتحرك ...

الدكتور : لسا جسمك متعود ع السبات .. رح نبدأ في تأهيلك ان شاء الله و انا متأكد انك ما رح تاخذ وقت حتى ترجع زي اول و احسن ..

راكان : طيب ابي ابي ابدا اللحين .. ابي امشي بسرعه ..

الدكتور ابتسم : حبيت الحماس اللي عندك .. خلاص رح نبدا ان شاء الله اليوم الساعه 2 مساءاً .. بعد ساعتين من الان رح تجيك طبيبه نفسيه تشخص حالتك النفسيه .. طبعا انت عارف اننا نعتقد انك فاقد الذاكره ...؟

راكان بسرعه وبصوت عالي قال : لاااااا .. ( بعدين سكت ) ..

الدكتور استغرب : ايش اللي لا ؟!

راكان ~ انا اثق اني ما فقدت الذاكره و لاشي بس حياتي تغيرت فجأه كيف وشلون ما ادري .. وفكرت كثير امس ان الناس حولي ما رح يصدقوني .. لذلك قررت اسايرهم باللي يقولونه لي و ادور عن اهلي و عن الحقيقه بنفسي .. ما ابيهم يعتقدون اني انجنيت و يحولوني من طبيب لطبيب .. رح اعالج مشكلتي بنفسي .. وهذا قراري ..

الدكتور : وين سرحت ؟

راكان : لا .. و لا مكان ..

الدكتور : طيب اخليك اللحين ترتاح لحد ما تجيك الطبيبه النفسيه ..

وفعلاً بعد ساعتين جته الطبيبه النفسيه .... كانت لابسه البرقع دخلت سلمت و قعدت معه ..

الدكتوره : مرحبا معك الدكتوره نجوى ..

راكان انصدم لما سمع صوتها وشافها : اهـ .. اهلين ..

د/نجوى : اش اخبارك ؟

راكان ~ ما لازم اتوتر مابي يبين علي شي انا اللحين شخص ثاني مابيهم يعتبروني انجنيت ويحبسوني بمستشفى المجانين ! : تمام ..

د/نجوى : رح اسألك عدة اسأله وانت تجاوبني اتفقنا ؟

راكان : طيب ..

د/نجوى : تعرف اش اسمك ؟

راكان : مدري بس ينادوني راكان ..

د/نجوى : تعرف اسم امك و ابوك ؟

راكان : لا

د/نجوى : تعرف من يكونوا روان و خالد ؟

راكان : لا ..

د/ نجوى : ليه ذكرت هالاسم امس ؟

راكان : فجأه جا في بالي ..

د/نجوى : اهاا .. طيب اذا تعرف اي شي عن نفسك او عايلتك او اصحابك قول لي ؟

راكان : ما اعرف شي .. عن راكان ما اعرف شي !

د/نجوى بنظرة استغراب : عن راكان ؟!!

راكان : اللي هو انا هم ينادوني راكان ..

د/نجوى : وانت اش تعتقد ؟ هل تظن انك مو راكان ؟

راكان : ما ادري قلت ما اعرف شي ..

د/نجوى : ما تعرف ولا ما تذكر لانها تفرق ؟

راكان : ما اذكر من انا و من اهلي ما اذكر اي شي .. خلاص لا تسأليني اكثر من كذا تعبت ...

د/نجوى : ان شاء الله .. و اعذرني اذا اتعبتك بس كان لازم ..

راكان : خلاص اطلعي ابي انام ..

د/نجوى : ان شاء الله ما تشوف شر ...

راكان ~ اوووف اش هذا ؟! مثل ما عرفتها مو سهله .. كانت رح تخليني اتكلم بشي ما ابي اقوله .. النفسيين لازم انتبه منهم و الله ما اخليكم تحبسوني بمستشفى المجانين ...

انتهت دوامات المدارس ع الساعه وحده الظهر تقريبا و في هالوقت جوال سمر كان يدق ما يسكت .. وسمر بعد ما بكت كثير نامت ... وطبعا صحت ع ازعاج الجوال اللي ما سكت ....

سمر بعصبيه : الوووو خير اش هالازعاج ..؟!

مي : سمووووور قلبي وينك ما تردين لا ع رسايل و لا ع اتصال .. اقلقتيني و فوق ذا انتي ما تغيبي ابدا غبتي اليوم ..؟ اش صاير معك طمنيني عنك ؟!

سمر ما قدرت تمسك نفسها و بكت : اختي يا مي اختي الريم ...

مي : بسم الله ليه تبكين ؟ خرعتيني وش صار ؟

سمر : اختي دخلت غيبوبه امس ؟!

مي مصدومه : لاااااا تقولينهاا .. يا ربي .. ماني مصدقه طيب ليه ؟

سمر : ما ادري ما ادري بس اخاف تموت ..

مي : لا تفاولين عليها اش فيك انتي .. ؟ ابي اجيك البيت اتطمن عليك ..

سمر : لا لا .. لا تجين جد مالي خلق احد .. وهالاسبوع ما رح اداوم .. ابي اتطمن على اختي ..

مي : ياا عمري .. الله يقومها بالسلامه يارب ..

سمر : امين ..

في المستشفى كانت فترة الاستراحه ... وقت الغدا عندهم في هالاثناء تركي كان قاعد مع خطيبته الدكتوره نجوى ...

نجوى : مافي اي خبر عن اختك ؟

تركي : لا والله محد فاهم ليه صار معها كذا ؟ احس اني بنجن ..

نجوى : طول بالك ي قلبي .. رح تقوم بالسلامه ان شاء الله ..

تركي تنهد بتعب : الله يسسمع منك ..

نجوى : وشلون الاهل بالبيت ؟

تركي : والله  حالتهم صعبه وكأنها لا سمح الله توفت ..

نجوى : لازم ازورهم اليوم و اتطمن عليهم .. امي بعد قالت تبي تجيكم ..

تركي : انا اقول خليها بكره احسن .. جد مالهم خلق شي .. و لو تبين الصدق حتى انا مالي خلق شي .. ودي بس تنتهي قصة الريم على خير ..

نجوى حطت يدها ع يده تهديه : بإذن الله رح تنتهي على خير ..

تركي سحب يده بسرعه : يا بنت الحلال مو قدام الناس ..

نجوى بحزن : عادي انت خطيبي ..!

تركي : خطيبك بس ما ملكنا انتي مو زوجتي للحين ! ما يصير ..

نجوى : يا الله منك تعقد الامور دايما !!

تركي وقف : يالله انتهت الاستراحه .. بمر اتطمن ع الريم و بعدها بروح مكتبي ..

نجوى : وانا بعد بروح عندي مريض لازم اهتم فيه ..

تركي قعد بسرعه : مريض ؟!!!

نجوى : ايه وش فيك ؟

تركي : مو اتفقنا ما تعالجي رجال ..

نجوى : بس انه مراهق صغير ! من عمر سمر ..

تركي : هذا تسمينه صغير ؟!!!

نجوى ضحكت : هههههه  فديت اللي يغارون بس ..

تركي وقف : من قال اغار .. واصلا مب فاضي لهالسوالف .. خلي الامور تركد شوي بعدين اتفاهم معك ..

نجوى : هههههههههه فديتك ..

تركي حس بالاحراج و مشى عنهاا .....

وفي نفس الوقت جت الممرضه لغرفة راكان و قعدته ع الكرسي المتحرك متوجهين لغرفة التأهيل ....

وأثناء ما كانوا يمشون بالممر .. كان راكان يناظر المستشفى بكل مكان .....

راكان ~ المستشفى هذي مو غريبه علي !! .. لا يكون بس ......

ناظر قدامه وشاف شخص يمشي من بعيد وكأنه شخص جداً مألوف له ... كانوا يقربون من بعض الى ان تقابلوا وجها لوجه .. راكان عينه عليه ما شالها عنه ..

تركي بعد يناظره مستغرب ~ اش فيه هالولد يناظرني كذا ؟

فجأه راكان قام يبكي .... تركي كان مار من جنبه و رايح بطريقه بس لما سمعه يبكي وقف ......

تركي سأل الممرضه : what happened to him? ( اش فيه ؟ )

الممرضه ارتبكت : I don't know ( مدري )

تركي بفضول قرب منه : عفواً اش فيك ؟ هل تحس بألم في مكان بجسمك ؟

راكان وهو يبكي رفع راسه يناظره : تـ تـ تركي ... >> وكمل بكي ..

تركي انصدم ~ كيف عرف اسمي ؟ معقول مداه يقراه من البطاقه و الخط صغير ؟!!!

الممرضه : sorry we should go  ( عفوا لازم نمشي )..

تركي ~ صار عنده فضول بخصوص الولد : ok go..

وصل راكان غرفة التأهيل ودكتور العلاج الطبيعي كان بنتظاره .. مسح دموعه و حاول يتصرف على طبيعته .. و بدأ علاجه التأهيلي اخيرا ......

لما رجع غرفته جاه الدكتور يتطمن على حالته ....

الدكتور : بشر كيف كان العلاج الطبيعي معك ؟

راكان : الحمدلله سويت تمارين ..

الدكتور : رح تستمر عليها الى ان تصير كويس ..

راكان : يعني اذا صرت امشي و تحسنت اقدر اطلع من المستشفى ؟

الدكتور : ايه ان شاء الله ..

راكان : طيب يا دكتور قول لأهلي يعطوني جوالي .. احتاجه ضروري ..

الدكتور : لا ما ينفع لا تنسى انت كان عندك جلطه دماغيه .. خلك ع الاقل لما تطلع بعدين استخدم جوال ع راحتك ..

راكان ~ وش ذا التعقيد ؟ .. كنت ابي اشوف سنابي و اهلي بشوف وش اللي قاعد يصير معي ؟!

وفعلاً مر اسبوع ... راكان كان مثابر على العلاج و التأهيل يبي يطلع من المستشفى بأسرع وقت .. امه وو ابوه كل يوم يزورونه بدا يتقبلهم شوي شوي بالرغم عنه حتى لا يظنون ان عقله به شي .. التؤام رفضوا زيارته بحجة انه ما يعرفهم اصلا و رح ينتظرونه لما يجي البيت ..

أما عائلة الريم .. الام وسمر كملوا باقي الاسبوع بدون دوام .. لازالوا عايشين بجو الحزن بس بدأوا يتقبلوا صدمة غيبوبتها شوي شوي مالهم الا الدعاء لها .. كان ممنوع عن الريم الزياره الا من خلف الزجاج و امها و سمر كل يوم كانوا يزوروها ... بالنسبه لطلال .. كان يجي يزورها بأوقات مختلفه لما يكون ما فيه احد .. يمكن هو اكثر شخص انصدم من اللي صار و تأثر ....

في المستشفى ...
اخيرا جا الوقت اللي يقدر راكان يغادر فيه المستشفى .. صار قادر شوي انه يمشي .. لكن لازم ما يتحرك كثير و يجيهم المستشفى مره كل اسبوع ويتابع العلاج الطبيعي ...

و في نفس الوقت كانوا الحبايب مع بعض يسولفون ....

نجوى : يالله حبيبي انا رايحه ..

تركي : على وين ؟

نجوى : يوهه مو قلت لك بودع مريضي اليوم رح يطلع من المستشفى ..

تركي : قلت لك ماله داعي ..

نجوى : والله رايحه رايحه ..

تركي : اجل بروح معك ..

نجوى ابتسمت : ههه طيب اللي تشوفه ..

بغرفته ....

ام راكان : متأكد حبيبي ما نسيت شي ؟

راكان : ايه ..

ابو راكان : يالله اجل مشينا ..

راكان ~ اش الحياه الجديده اللي رح اعيشهاا !!؟ احس بالخوف و في نفس الوقت ما ادري ليه احس اني انبسطت بهالعايله و هالام اللي تحبني بجنون !! و هالاب اللي ما يرفض لي طلب مهما كان سخيف !! .. شكله هذي الحياه اللي تمنيتها تحققت !! بس كيف ؟! هنا السؤال .. انا الريم كيف صرت بهالجسد !!؟ كنت احسب اني احلم بالاول بعدين شفت الوضع واقعي اكثر من انه حلم .. بعدين توقعت اني مت وهذي حياه ثانيه .. جت في راسي افكار كثيره ماهي منطقيه .. بس لما شفت اخوي تركي تأكدت ان كل اللي افكر فيه مو صحيح واني لازلت في هالحياه لكن بجسد غريب عني ما اعرفه !! .. ناديته كنت بسأله وش صار علي انا الريم وش صار علي ؟؟ لكن ما قدرت محد رح يفهم اللي انا امر فيه .. لازم ادور ع الحل بنفسي .....

ام راكان همست له : ما وحشك البيت و غرفتك ي حبيبي ..؟

راكان نزل راسه : ما اذكره !!

ام  راكان كسر خاطرها : اسفه يا قلبي نسسيت ..

راكان : عادي ..

ام راكان تنهدت بسعاده : اشتقت لكلمه يمه منك ...

راكان ....... سكت

ابو راكان : وش تسولفون فيه سمعوني معكم ؟

ام راكان : هههههههه ولا شي ..

طلعوا من الغرفه و طبعا راكان كان ع الكرسي المتحرك و الممرضه  هي اللي رح توديه الى برى .... و بطريق خروجهم صادفوهم ...

د/نجوى : السلام عليكم ..

ابو راكان : عليكم السلام ..

د/نجوى : كيفك يا راكان ؟

راكان : الحمدلله ..

د/نجوى : اخيرا رح تطلع و تتركنا !!

ام راكان : ايييه الحمدلله رح يرجع لبيته واهله ..

د/نجوى : يالله الحمدلله ع سلامته .. انتبهوا له زين ..

ام راكان : لا توصين حريص يا بنتي ..

د/نجوى : حبيت اجي اودع راكان بنفسي .. يالله مع السلامه يا راكان انتبه لصحتك ..

راكان : ان شاء الله ..

تركي كان  يناظرهم من بعيد و عرف الولد من ذاك اليوم ......

نجوى : هاا شفته ؟ مو قلت لك صغير !؟

تركي : صغير بس ما شاء الله جميل اخاف تحبينه و تسحبين علي ..

نجوى : ههههههه حبيبي انت ما اشوف بعيني اجمل و احلا منك ..

تركي : ههههههههه كنت امزح معك  ترا ..

نجوى : يا سلام خليتني امدحك ع الفاضي ...

تركي : بس الولد هذا .. شافني الاسبوع  اللي راح  و ناداني.. ما ادري كيف عرفني! انا اول مره اشوفه بس حسيت كنه يعرفني ..

نجوى : يمكن شاف اسمك ع البطاقه ..

تركي : معقول من بعيد شافها !؟

نجوى : مدري يمكن ..

تركي : عندي احساس  هالولد غريب .. الا هو وش فيه ؟!

نجوى : اسفه ما اقدر اتكلم عن المرضى .. هذي من اخلاقيات المهنه مثل ما انت عارف !

تركي : عارف عارف .. بس كان عندي فضول عنه لا اكثر ..

نجوى : شوف هو فاقد الذاكره يمكن شبهك ع احد كان يذكره .. حالات مثل كذا ممكن تصير ..

تركي : ما اقتنعت ..

نجوى : مو لازم خله عنك انا عارفه تبي  تستدرجني بالكلام حتى اسولف لك عن حالته ..

تركي ابتسم : هههههههه ..

ورجع راكان مع اهله للبيت .. و طبعا وضحت الصوره راكان مو راكان اللي يعرفوه .. كيف صارت الريم بجسد راكان !؟ هذا اللي كانت رح تبحث عنه الريم و هي بجسد راكان و ترجع لاهلها بأي طريقه كانت ...  لذلك كان اول خططها تتعرف ع حياة الشخص اللي هي عايشه بجسده .. و تبي تشوف جواله و كل اسراره .... و من لحظة دخولها لبيت راكان الكبير رح تبدا قصتها الفعليه ... ماهي عارفه اش منتظرها ... لكن يبدو انه رح يكون شي صعب ما تخيلته .......

انتهـــى البارت ..

-         ارائكم داعمه لاستمراري ..

-         توقعاتكم للقادم من الاحداث ؟