ما قدر خالد يتكلم معها اول م رنت الاجهزه هرب من الغرفه ع طول .... ما كان مستوعب اللي صار حس انه بيبكي الريم صحت ونادته وتكلمت معه!!! مو معقول! ..

وصل الخبر لاخوها الدكتور تركي .. وراح ركض يشوفها ...

وهو بطريقه مر من قدام عمر وشلته طبعا م يعرفهم .. لكن سلطان عرفه ...

سلطان ~ هذا .. هذا مو اخو الريم؟! ..

وقعد يتذكر المحادثه اللي صارت بينه وبينها زمان .. طبعا هي كانت تكلمه وتفكره عمر وهو في الحقيقه عمر معطي حسابه سناب حق خويه سلطان خصيصا عشان يرد عليها لانها ع قولته ابثرته .. المهم كانت هذي المحادثه .....

سلطان : " انتي وين اللحين ؟ "

الريم : " والله بالمستشفى ليش اكذب عليك! "

سلطان : " طيب صوري اذا صادقه .."

الريم : " اوك شوف .. (صورت له المستشفى وارسلت له ) هاا صدقت اللحين.."

سلطان : " ههههههه ايه صدقت واصلا انا مصدقك بس اشوفك بترسلين ولا لا .."

الريم : " أي عادي برسل ليه لا .. يعني مجرد مكان مافيها شي لو أرسلت .."

سلطان : " أي والله .. بس سلامات اش عندك بالمستشفى.."

الريم : " جايين نزور اخوي .."

سلطان : " وش فيه اخوك عسى م شر .."

الريم : " هههههه مافيه شي .. اخوي دكتور وله يومين مناوب بالمستشفى.. عاد امي قالت بسوي له اكل ونروح كلنا نشوفه.."

سلطان : " ماشاءالله .. بس ماني مصدق ان عندك اخ دكتور .."

الريم : " وش بعد تبيني اصوره لك عشان تصدق؟! "

سلطان : " ايه ليه لا .."

الريم ~ اصور له اخوي أخاف يعرفه او شي لا مستحيل هو بالرياض كيف رح يعرفه .. خل اصور هي مره وحده بس مارح يحفظ شكله اكيد .. >> وفعلا صورت له وارسلت ..

سلطان كان عنده جوال ثاني يصور أي شي ترسله الريم له كان حاب يعتبرها ذكرى .. م توقع بيجي يوم ويحتاج هالصور ..

من كثر م فتح الصور اللي ارسلتهم له الريم وحفظها خلاص صار عارف لو يمر تركي من قدامه رح يعرفه ع طول وبكذا عرفه .. بعدين شاف صور المستشفى واستوعب انها فعلا المستشفى اللي كانت ترسل له صورها ...

قبل يبتعد عنهم ركض وراه بسرعه .......

عمر : يااهوه وين رايح؟

سلطان وهو يمشي سريع لف عليه : شوي بروح الحمام واجي ..

ولحقه لحد م وصل غرفه الريم .. وقف شوي بعيد عنه بس كان يسمع صوته ....

طبعا كانت وحده من الممرضات واقفه عند الباب تنتظره يجي لانها تعرف تركي حبت تبشره بنفسها ....

تركي : رانيا طمنيني وش صار على اختي الريم ..؟

بس سمع سلطان اسمها تأكد انه بالمكان الصحيح وان هذي معجزه جمعته فيها .. ما كان متخيل ولا واحد بالميه انه ممكن يلقاها ..

رانيا مبتسمه : ابشرك صحت ..

تركي مصدوم على مبسووط : احلللللفي ..

رانيا : والله .. تفضل ادخل بنفسك وشوفها .. الحمدلله ع سلامتها ..

تركي : الله يسلمك يارب .. الف شكر لك يارب..

رانيا : رح ننقلها ع غرفه ثانيه .. رح تطلع من العنايه مبروك ..

تركي : الله يبارك فيك .. بس اشوفها انا بنفسي اطلعها غرفتها ..

رانيا : ههههه تمام ..

اول ما دخل عنده الغرفه اختلطت مشاعره فرح على خوف على شوق ..

تركي عيونه كلها دموع : الريم أخيرا صحيتي!

الريم تناظره باستغراب : انت مين؟

تركي علامات استفهام ع وجهه : اخوك!

الريم : سلامات م عندي اخوان ( تتنحنح ) اش في صوتي كذا صاير ناعم!! ( تناظر يدها ) شلون صارت يدي كذا ( تلمس شعرها ) الله كم لبث حتى صار شعري صار طويل لهالدرجه ؟!

تركي مو فاهم شي : وش قاعده تقولين ؟

الريم : انت اش فيك من اليوم تكلمني وكني بنت!؟

تركي باستغراب : الريم اش فيك ؟ انتي بخير ما تذكريني؟!

الريم : الريم مين؟؟؟!!! انا راكان وش قاعد تقول انت؟!

تركي ~ وش فيها ؟! فقدت الذاكره؟ ماني قادر استوعب حالتها .. الظاهر فقدت الذاكره .. لا يكون تعاني من التقمص بعد الغيبوبه .. يبي لها طبيب نفسي .. ما اثق الا بنجوى ..

رانيا : يالله جاهزين ننقلها غرفتها؟

تركي قرب منها وهمس : احتاج طبيبه نفسيه اطلبي من الدكتوره نجوى تتوجه لغرفتها بأسرع وقت .. صحيح بأي غرفه رح ننقلها فوق ولا تحت ؟

رانيا : رح تكون فوق الدور الثاني غرفه ١١٤ ..

تركي : تمام باخذها مع الممرضات .. كلمي لي الدكتوره نجوى بأسرع وقت..

رانيا : تمام اللحين اكلمها ..

رجع سلطان لشلته بعد م عرف رقم غرفتها .. كان باين عليه مرتاح وكأنه مبسوط .. بس الكل مُنهك محد له خلق يسأله .. يزيد و عمر طفشوا من الانتظار كانوا قاعدين ينتظروا خالد اللي طول عليهم ....

يزيد يتثاءب : اووف وينه ذا طول علينا نبي ننام ..

عمر : أي والله .. تدرون شكلنا نرجع الرياض صدق ..

سلطان : لا معليش مابي ارجع بقعد هنا ..

الكل لفوا عليه مصدومين ...

عمر : عسى ما شر وش ذا التغيير المفاجئ ..

سلطان : ابد جازت لي الشرقيه وحاب اقعد فيها .. عندكم مشكله ..

عمر لازال مصدوم : لاوالله سلامتك ..

بالنسبه لخالد مو قادر يستجمع نفسه .. قاعد لحاله يحاول يفكر مو قادر يستوعب....

خالد ~ ان شاء الله تكون هي الريم اللي نادتني .. وان شاء الله ان راكان رجع راكان .. لو كان عكس كذا بتكون مصيبه .. المشكله اثنينهم يعرفوني مو قادر اتأكد هي الريم ولا راكان .. لازم انتظر راكان لما يصحا واشوف بنفسي .. يوووووه نسيت عمر واخوياه .. خل احطهم بفندق .. واقعد ع راس راكان انتظره يصحا بس أتأكد من هويته اكلم اهله .. طبعا هذا اذا م ابثرونا ودقوا ع جواله .. كويس ان الممرضه اعطتنا جواله قبل يدخل العمليات ..

بعد م استجمع نفسه راح يقابل شلة عمر .....

خالد : معليش تأخرت عليكم ادري .. بس انشغلت ..

يزيد : أي والله تعبنا .. نبي ننام ..

خالد ~ هذا همكم بس .. ناس استغلاليه : اوك بحطكم فندق قريب من المستشفى زي م قلت لكم ..

عمر : وينه فيه هالفندق ..

خالد : اسمه راديسون بلو ريزيدنس فندق راكان المفضل كل ما طفش راح له ..

عمر : اووف من اسمه واضح فخم !

يزيد : والله مستحيل احفظ اسمه ..

عمر : وانا بعد ..

خالد : لا تتعبون أنفسكم تحفظون واحد منكم يعطيني رقمه وبرسله اللوكيشن..

عمر : اوك سجل عندك رقمي ٠٥٥....

خالد : أرسلت لك الموقع خذ اخوياك وروح للاستقبال قول لهم جاي من طرف خالد .. انا كلمتهم رح يودونكم غرفكم ع طول ..

يزيد : اللحين كل واحد غرفه ولا بتحشرنا بغرفه وحده ..؟

خالد ~ اللهم صبرك ي روح .. طرارين ويتشرطون ..

عمر : أقول امش امش م تشوفه عصب .. نروح ونعرف هناك ..

يزيد باستغراب : م اظني قلت شي ..

عمر : يالله سلطان ..

سلطان : انا بقعد شوي .. ارسلوا لي الموقع بعدين بجيكم ..

خالد ناظره باستغراب ~ اش عنده ذا يبي يقعد .. اسأله ولا اسحب عليه .. أقول مب فاضي له خل اقعد عند راكان احسن ممكن يصحا بأي لحظه ..

بس مشوا العيال وتفرقوا .. ع طول سلطان راح ع فوق .. بالتحديد لغرفه ١١٤ .. كان متوقع انه مارح يكون له مجال يشوفها .. بس مع ذلك حب يقعد قدام غرفتها ويشوف الداخل والطالع ....

داخل بغرفه الريم .. حضرت نجوى و كانت متواجده مع تركي و وحده من الممرضات...

تركي : طمنيني عنك كيف صرتي؟

الريم : ليش أتكلم مع شخص غريب!

نجوى : طالعيني .. تذكريني؟

الريم : انا مو بنت اول شي وقفوا تكلموني ع اني بنت .. بعدين م عمري شفتكم .. أقول اطلعوا .. يالله يالله اطلعوا كلكم برا .. ابي اقعد مع نفسي شوي ..

تركي بدا يقلق : احنا قاعدين نسألك خايفين عليك ..

نجوى : طيب عادي اذا حابه اطردهم واقعد انا معك ندردش شوي..

الريم : ليه متى المعرفه عشان اسولف معك.. انتي اولهم تطلعين .. (صرخت ) برااا كلكم .. براااا براااا ..

تركي : حبيبي تعالي خلينا نتركها شوي ..

الكل طلع حتى الممرضه.. سلطان كان قاعد قريب من غرفتها .. المسافه كافيه في انه يسمع كلام تركي ونجوى اللي كانوا واقفين قدام باب غرفتها ...

تركي : وش تتوقعين صاير لها ؟

نجوى تنهدت : حالتها صعبه .. واضح الغيبوبه سببت لها صدمه نفسيه كبيره .. لدرجه تتخيل نفسها شخص ثاني..

تركي : مقدر اعلم اهلي وهذي حالتها ..

نجوى : لازم يعرفون اهلك كذا ولا كذا بيعرفون ..

تركي : تعالي خلينا نتكلم بغرفتي ..

نجوى : اوك تفضل ..

سلطان بفضول كبير ~ وش فيها ؟ وش فيها حالتها ؟ معقوله لهالدرجه سيئه .. بدخل بنفسي واتأكد ..

ودق باب الغرفه ودخل .....

سلطان : مرحبا ..

الريم : خير انت مين بعد ؟!

سلطان لف وجهه لانها م كانت متحجبه او متغطيه احتراما لها لف وجهه عنها ~ يا الله ماشاءالله م توقعتها بهالجمال .. (حط يده ع قلبه) ولا توقعت اني اذا شفتها قلبي يدق كذا واتوتر كذا ..

الريم : انت اكلمك خير معطيني ظهرك !!؟

سلطان : انا اسف .. يمكن م تعرفيني .. لكن تعرفين عمر صح؟

الريم عصبت : عمر مين وانت مين !؟ .. اش هالناس الغريبه ؟! .. أقول اطلع من غرفتي لا اشوفك (صرخت) بسسسسرعه برااا ..

سلطان ع طول طلع خوفا ان احد يسمعها ويداهمهم ~ هذي فعلا م تعرفه .. معقوله فقدت الذاكره؟! .. المهم الحمدلله اني شفتها والحمدلله انها بخير ...

بغرفه الدكتور تركي كان يتناقش مع خطيبته عن وضع الريم ...

نجوى بعد تفكير: تركي حالة الريم م تذكرك بحاله راكان ؟!

تركي : بعد ما قلتيها .. الا والله الحاله شبيهه ..

نجوى : اول م فتح راكان عيونه م كان مقتنع انه هو ..كنا نظن انه فاقد الذاكره ..

تركي : بس بعدين طلع فعلا فاقد الذاكره ..

نجوى : ممكن الريم نفس الحاله تكون فاقده الذاكره .. وفيه ذكريات ثانيه بعقلها خياليه اختلطت مع الواقع وطلعت لنا زي م انت شايف! ..

تركي : ما ادري ما ادري .. بس على طاري حالة راكان الريم قالت انا راكان..

نجوى : بسم الله ايش العلاقه ؟! ممكن تكون صدفه ..

تركي : والله العلاقه الوحيده اللي اعرفها انها نامت بنفس المكان اللي نام فيه راكان ..

نجوى : ماله دخل صدقني صدمه نفسيه .. ومع الوقت ترجع طبيعيه نفس راكان رجع طبيعي..

تركي : يارب مثل م تقولين ..

نجوى : لا تقلق .. انت كلم اهلك وبشرهم انها صحت بس يجون علمهم وضعها بدون لا تقلقهم ..

تركي : ان شاء الله هذا اللي بيصير .. اهم شي انها صحت وباقي الأمور محلوله ..

نجوى : ان شاء الله..

وقعد خالد ع راس راكان كان على اعصابه ينتظره يصحى .. عايش بتوتر وخوف .... وجت اللحظه اللي أخيرا صحا فيها ....

راكان فتح عيونه : اوه .. انت هنا ..

خالد وقف بحماس مع خوف : انت راكان ؟!

راكان : هههه وش شايف انت؟

خالد ابتسم : يعني انت فعلا راكان ؟؟؟؟!

راكان : وش فيك كذا متحمس؟ لهالدرجه ودك تتخلص مني؟

خالد باستغراب: ما فهمت!!

راكان : يعني انا الريم مو راكان ..

خالد : لا مو من جدك!!!!

راكان: ليه وش صار؟!

خالد : الريم .. يعني راكان صحا من غيبوبته .. واللحين هو بجسدك!!!!؟

راكان كان منسدح قعد من الروعه : تمززززززززحححح!

خالد : والله شايفه بعيوني .. كنت أتمنى انه انتي وكنت أتمنى ان انتي هو .. وكل واحد يرجع لمكانه ..

الريم فجأه قامت تبكي : رجعني تكفى رجعني ابي حياتي ..

خالد : والله لو ب ايدي أتمنى .. اهدي اهدي .. لازم نقابل راكان ونتكلم معه ونفهمه الوضع ..

الريم تمسح دموعها : يعني انا بتكلم مع نفسي بعد شوي ..

خالد م تحمل وضحك : هههههه اسف .. بس لما قلتيها كذا تخيلت الوضع يضحك ..
الريم : شوف لي حل بدال الضحك م تشوفني ابكي !؟

خالد : والله اسف معليك لا تشيلين هم الامور طيبه ان شاء الله..

الريم : انت تقول كذا بس عشان تهديني .. وش بنسوي اللحين ؟ ..

خالد : لانه لازم تهدين عشان نعرف نفكر .. شوفي لازم نشرح له الوضع ولا رح ينومونه بالمستشفى على انه مريض نفسي .. م يحتاج اعلمك اكيد تذكرين وش صار معك اول م صحيتي ..

الريم : وانت وش دراك باللي صار معي .. م كنت حولي لما صحيت بجسد راكان!

خالد : حتى لو ماني حولك بس كانت تجيني اخبارك اول ب اول و بالتفصيل.. اهنيك والله وقتها عرفتي تتصرفين..

الريم : والله ما كنت ابي اقعد اتناقش مع نجوى ولا دقيقه ..

خالد : مين هذي ذكريني؟

الريم : الطبيبه النفسيه و تصير بعد ....(كانت يتقول خطيبة اخوها بس سكتت) ..

خالد : تصير ايش؟

الريم ~ مابيه يعرف عن اخوي شي او عن خطيبته ولا ابيه يعرف عن اهلي : ههه ولا شي ..

خالد ابتسم : خطيبة اخوك ؟!

الريم مصدومه : اش دراك ؟!

خالد : اييه ادري واعرف طلال وتركي .. لازم تسولفين لي عن طلال ..

الريم عصبت وتضايقت : مارح أتكلم ولا رح أقول شي ..

خالد : رح تتكلمين .. بس مو اللحين .. عندنا مشكله اكبر اللحين لازم نتكلم مع راكان ونقنعه يتصرف على انه انتي .. من معرفتي براكان م رح يقتنع بس نسوي اللي علينا ونحاول ..

الريم : اسمع هو خويك وتعرفه .. اقترح عليك تكلمه انت اول .. مابي اصدمه واجي قدامه وانا برضو مابي انصدم واشوف نفسي .. كلمه انت اول احسن بعدين اقابله انت .. اووووف .. يا الله وش هالوضع ماني فاهمه..

خالد : أي والله انا احس بنجن .. خلاص كلامك صح .. رح اكلمه انا اول واشرح له الوضع .. على فكره دقيت على اهل راكان وبلغتهم بوضعك شوي ويجونك ..

الريم : ليش تكلمهم ليش ؟ اللحين يقلقون .. انا كويسه مافيني شي ..

خالد بنبره حاده : ع طاري مافيك شي ! ليه م عندي علم بالجرح اللي ورا رقبتك ؟ وليه سكتي عنه؟ .. ألتهب لان حضرتك م تكلمتي ..

الريم : شدراني ع بالي جرح بسيط يومين ويختفي ..

خالد : لا وفوق ذا اللي اسمه عمر يدري عنه وانا مدري؟ ماشاءالله..

الريم : عاد شافه بالصدفه ..

خالد : أتمنى م تخبين عني أي شي .. بالذات أي وضع صحي يصير لك .. ان شاء الله تكون اخر مره ..

الريم تتحلطم : وش ذا مسوي كنك مسؤول عني ..

خالد : طبعا مسؤول .. اوعديني م تخبين أي شي عني ..

الريم تسلك له : أي .. طيب .. ان شاء الله..

خالد : بروح اشوف غرفة راكان وين .. بحاول الاقي فرصه اكلمه فيها ..

الريم : انا احس اني تعبانه شوي ممكن اغفى بس اذا صار شي صحيني ..

خالد : ولا يهمك ارتاحي ..

في بيت اهل راكان .. جا سمر اتصال .. طبعا كانوا سهرانين ع فيلم .....

سمر : الو .. هلا يمه ..

ام تركي : سموور ي بنتي ابشرك الريم صحت صحت ..

سمر وقفت بحماس ومبسوطه وصرخت : احلللللفي .. صدق والله !!!؟

البنات تحمسوا معها : بسم الله وش فيه؟

سمر تنطط من الفرحه : الريم صحت صحت ..

ام تركي : أي والله تو تركي يبشرني .. دقيت ع اخوك طلال وبلغته اللحين هو جاي بالطريق .. كلمي مي خليها ترجعك الببت عشان نروح مع بعض نشوف الريم ..

سمر : هااه .. ايه طيب بقولها تكلم ابوها يرجعني ..

ام تركي : انتبهي تركبين معه لوحدك خل مي تجي معك ..

سمر : أي طبعا طبعا اكيد ..

شوي وفتحت امهم الباب .....

ام راكان : بنااات راكان تعبان وهو بالمستشفى.. بروح مع ابوكم نشوفه ..

مي بصوت خافت : اسم الله عليه وش فيه ؟! بعدوينه ان شاء الله..

ليان تهمس حق لينا : لا يكون صار له شي بسببنا ..

لينا : اوووص اش دخلنا احنا ..

ليان : يمه بجي معكم ..

ام راكان : لا ياروحي انا اعطيكم خبر مافي داعي تجون .. أساسا بكره رح يطلعونه .. بس م تحملت ابي اشوفه ..

لينا : تمام يمه معليك منها انتي روحي وطمنينا عليه ..

ام راكان : زين انتبهوا لكم واذا احتجتوا شي كلموني ..

لينا : خذي راحتك ..

بعد م طلعت .. سمر كانت تلبس عبايتها ...

مي : وانتي على وين؟

سمر : اقولك اختي صحت .. اكيد بروح اشوفها ..

مي : طيب روحي معهم اذا رايحين نفس المستشفى..

سمر تقرب منها وتتكلم بهمس : من جدك انتي اقط نفسي معهم زوج وزوجته خييير! ما وصلت لهالدرجه مِـن البجاحه ..

مي : شدخل بجاحه ترا عادي مافيها شي ..

سمر : أقول اسمعي وصليني بيتنا .. اخوي طلال رح يمر ياخذنا للمستشفى.. استعجلي اذا جا وماني ب فيه رح يفصل علي ..

مي : طيب بسأل البنات اذا يقدر السواق يوصلك .. لاني بصراحه ابي انتظر راكان واشوفه بنفسي..

سمر : رح تجين معي يعني رح تجين مستحيل اركب سياره غريبه لحالي!

مي : اوووف طيب طيب خلاص .. >> لفت ع لينا واختها .. بنااات عادي اطلبكم طلب ..

لينا : طلباتك م تخلص ي مي ..

مي عطتها نظره اللي خير متى طلبت هههههه!

ليان : ههههههه لا تزعلين مزح اختي ثقيل .. اطلبي وش تبين ..

مي : تكفون ابي سواقكم نوصل سمر بيتها ويرجعني ..

لينا : يعني لسا بتقعدين عندنا ..

مي : اذا م تبوني عادي بروح!

ليان : مين قال م نبيك بالعكسس حياك البيت بيتك ..

مي : ي عمري ي ليون ..

سمر : مي خلينا نطلب اوبر .. م سمعتي امهم قالت بيروحون المستشفى واكيد اخذوا السياره ..

لينا : هههههههههههههه ي حليلك والله .. عندنا سيارات واجد وعندنا سواق لا ينشغل بالك رح يوصلك لباب بيتك ..

سمر : صدق! والله مابي اكلف عليكم ..

لينا : شدعوه ما بينا .. والحمدلله ع سلامة اختك ..

سمر : ربي يسلمك من كل شر .. ومره شكرا م رح انسى لكم هالمعروف ..

لينا : م سوينا شي .. ان شاء الله نلتقي ب أوقات ثانيه وتكون أختك معنا ..

سمر ابتسمت : ان شاء الله..

ليان : بنات السياره تحت تنتظركم ..

سمر تناظر مي : انتي ما لبستي ؟ يالله امشي خل نطلع ..

مي : يالله يالله .. الله يعين اوصلك وارجع ..

وصلوا عمر و يزيد للفندق .. اكيد انبهروا بفخامته ....

يزيد : أقول انت متأكد ما رح ندفع ريال؟

عمر : هو مستضيفنا تتوقع يدفعنا .. م يسويها راكان..

يزيد : اللي حجز لنا اللي اسمه خالد وييني وبينك م يطمن م ارتحت له ..

عمر : والله نفس الشعور .. تعال نشوف الاستقبال ..

يزيد : خلك شوي كلاس وقول الريسبشن.. عشان يحسون اننا عيال نعمه ..

عمر : هههههه أقول امش امش بس ..

راحوا للاستقبال .....

عمر : السلام عليكم ..

موظف الاستقبال : عليكم السلام ..

عمر : حنا جايين من طرف خالد ..

موظف الاستقبال : ياهلا وسهلا شرفتونا .. بس ثواني ..

عمر : الشرف لنا طال عمرك.. خذ راحتك..

يزيد يهمس : أقول تتوقع كل واحد منا له غرفه ولا بيحشرونا بغرفه وحده عشان لا نزيد المصاريف؟

عمر : ياا شيخ انا راضي بغرفه وحده بهالفندق .. واحد ربك لو عطونا غرفه وحده .. انت استأجرت لنا غرفه بفندق محد يعرفه وكل اللي ساكنينه عمال وريحته تقتل غير ان الغرفه صغيره! .. م ينقعد فيه ..

يزيد : والله عاد ذا ارخص فندق لقيته ..

موظف الاستقبال : عذرا ع التأخير .. تم حجز ٣ غرف لكم (عطاهم كروت) هذي كروت الغرف والرقم مكتوب عليها .. فيه غرفه لشخص ثالث مفترض اعطيه إياها بس ماني شايفه معكم ..

يزيد : صحيح خويك ذا الغبي وش قاعد يسوي بالمستشفى ؟!

عمر : انا ادري عنه! المهم انه اكيد بيجي بعدين .. ( ناظر موظف الاستقبال) ممكن تعطيني كرت غرفته؟ هو خوينا بس للحين م وصل ..

موظف الاستقبال : أي طبعا تفضل ..

عمر : مشكوور م قصرت .. بس عفوا الغرف بأي دور ..

موظف الاستقبال : الدور الثاني وتقدر تروح له من هنا ..

عمر : اوك يعطيك العافيه..

وهم يمشون ......

يزيد : والله زين طلع فيه خير .. وحط كل واحد بغرفه ..

عمر : وانت هذا همك .. خل ادق ع سلطان اشوف وينه ..

وكلم خويه سلطان قالهم ساعه ويجيهم ....

وصلت مي سمر لبيتها ثم رجعت والحمدلله كان لسا طلال م وصل .. وقاعدين ينتظرونه يجي ياخذهم .. بهالاثناء بالمستشفى عرف خالد وين غرفه راكان وطلع يشوفه .. بس انتبه ان سلطان قاعد قريب من الغرفه .. استغرب وجوده للحين بالمستشفى توجه صوبه يستفسر منه ....

خالد : انت مو خوي عمر؟!

سلطان : ايه ليه؟!

خالد : اخوياك راحوا الفندق وانت مو معهم غريبه .. وش عندك هنا؟

سلطان : فيه واحد شفته بالمستشفى طلع من قرايبنا قلت ازوره .. بس م سمحوا لي وقعدت كذا انتظر ..

خالد : عندي واسطه بهالمستشفى لو تبي اساعدك ..

سلطان توتر : لا لا مشكور .. مافي مشكله بجيه وقت ثاني..

خالد : اوك اللي يريحك ..

مشى خالد من عنده اختفى عن نظره بس كانت عينه عليه .. ينتظره متى يقوم من مكانه .. لانه يبي يدخل غرفه الريم بس م يبي احد يشوفه .. واذا طول سلطان مو بصالحه .. بأي لحظه ممكن أهلها يجون ..

خالد ~ ماني فاهم ذا وش قاعد يسوي للحين؟؟!! م ينفع كذا شكله مطول .. اكلم الامن يطردونه أحسن .. >> وفعلا سواها وطردوه بحجة ان الوقت مو وقت زياره و ممنوع يقعد بالمستشفى كذا ... استسلم للواقع وطلع توجه للفندق....

خالد ~ م بغا يروح .. ( يناظر غرفه الريم ) وبسم الله نبدا المهمه .. لو فيه احد موجود عنده داخل بعتذر وأقول اني غلطان .. يالله بدينا ..

في بيت سمر كانوا على اعصابهم ينتظرون طلال .. اللي تأخر شوي ....

سمر : يمه تكفين خل ناخذ اوبر ونروح مافيني صبر ابي اشوفها ..

ام تركي : وانا اكثر منك ابي اشوفها لكن انتظري شوي ويوصل اخوك .. مب رايحين اوبر بهالوقت المتأخر ..

مرت خمس دقايق الا وطلال داخل عليهم .. وباين انه مبسوط لدرجه ضم امه ...

طلال : يمه صحيح هالكلام ؟! الريم صحت؟

ام تركي دموع الفرح بعيونها : أي الحمدلله .. ودينا نشوفها ..

سمر ~ هه يعنني مبسوط بقومتها وهو أصلا السبب باللي صار لها ..

طلال : يالله السياره شغاله خلونا نمشي ...

دخل غرفه الريم اللي هي حاليا راكان .. لقاه نايم .. حاول يصحيه ....

خالد : راكان .. راكان .. تسمعني؟

راكان بالكاد فتح عيونه : خالد ؟!! هذا انت ولا قاعد أحلم ..

خالد لازال عنده شك : انت راكان صح ؟!

راكان باستغراب: اش فيك م عرفتني ؟! ولا عشان شكلي مره متغير .. >> طبعا للحين ما استوعب انه بنت هههههه ..

خالد : هههه والله شكلك متغير ١٨٠ ودرجه .. يعني انك تقلب بنت م يتسمى تغيير ..

راكان انجلط : كيييييف؟؟! بنتتتتتتت!!!! وش قاعد تقول؟! اعطيني مرايه بشوف شكلي ..

خالد : م عندي والله .. بس ناظر جسمك وتعرف ..

راكان ناظر شكله انخرش : وشششش ذا ؟ ( مسك خالد من ياقته ) وش سووا فيني عيال الكلب هذوليك (يقصد بدر وشلته) كيف صرت بهذي الهيئه؟! خالد تكفى رجعني رجعني زي م كنت ...

خالد مسك ايدينه : ما سوو لك شي هم .. مادري كيف صار معك كذا .. بس اسمعني م عندنا وقت .. بقولك وش تسوي بس تطلع من المستشفى اقابلك واشرح لك اكثر ..

راكان : وش تشرح لي ؟! انا متأكد اني بحلم .. هذا مو انا ..

خالد : ادري الموضوع صعب ينشرح وصعب تفهمه وتتقبله ممكن مع الوقت ترجع لوضعك الطبيعي بس للحين م ندري متى .. المهم لازم تهدا وتفكر بعقل .. لا تقول لاحد انك راكان .. تصرف و كأنك الريم .. يعني تصرف كنك بنت ..

راكان مصدوم : الريم!!؟؟ مين الريم هذي اللي غثيتوني فيها ؟! وانت وش عرفك فيها ؟! ..

خالد : الريم صاحبه هالجسد وهي موجوده بجسدك اللحين والكل يفكرها انت ..

راكان صدع راسه من كثر التفكير : شوي شوي مب قادر استوعب ..

خالد : راكان مافي وقت اشرح لك اكثر لو احد من اهل البنت لقاني عندك ممكن يذبحني ويذبحك .. انت سو اللي قلت لك عليه لا تجيب طاري انك راكان واذا م تعرف تتصرف ع انك بنت ألتزم الصمت افضل .. عشان تقدر تطلع من المستشفى واقابلك برى .. لو حاولت تقنعهم انك راكان رح يعتبرونك مجنون و تطول فترة علاجك ..

راكان : م اقدر اتحمل م اقدر وش هالوضع اللي انا فيه .. خلني افكر واستوعب شوي .. اوعدك م رح أتكلم مع احد لحد م استوعب وضعي ..

خالد : وهذا الأفضل لا تتكلم مع احد .. انا لازم امشي قبل يجي احد ..

وبسرعه طلع برا وهو نازل مع الدرج الا يصادف اهل الريم صاعدين ومعهم الدكتور تركي .. وباين عليهم مبسوطين ....

خالد ~ لو تأخرت شوي بس كان راحت علي .. يارب م تجيب العيد يا راكان ويعدي هاليوم على خير ....

وقفوا عند باب غرفه الريم شوي ....

تركي : لحظه قبل تدخلون .. لازم اقولكم على شي مهم ..

ام تركي بخوف : وشو يا ولدي قول ..

تركي : صحتها ان شاء الله بخير .. لكن ممكن م تتذكركم ..

ام تركي م قدرت قامت تبكي : لا تقولها ...

تركي مسكها وقعدها : يمه لا تبكين مافيها الا العافيه والوضع مؤقت ..

سمر الدموع بعيونها ماسكه نفسها لا تبكي : اكيد رح تتذكرنا بعدين اهم شي انها صحت اللحين ..

طلال بحزن : تسمحون لي اشوفها اول؟

تركي : روح ي طلال على م تهدا امي .. (ناظر سمر) وانتي ي سمر بعد مابيك تدخلين عليها وانتي حزينه .. نبيها تنبسط ..

سمر تمسح دموعها : رح أكون قويه قدامها (تجي تقعد جنب أمها وتضمها) يمه رح ترجع تتذكرنا متأكده لا تقلقين ..

دق الباب ودخل يشوفها كان متوتر في البدايه بس لما عرف انها فقدت الذاكر حس بالراحه شوي ...

طلال : الريم .. انا اخوك طلال .. الحمدلله ع سلامتك..

راكان ~ قال ايش تصرف كنك بنت او اسكت .. مارح أتكلم م اعرفه م رح ارد عليه .. بس اطلع من هالمستشفى تشوفون وش اسوي ..

طلال قعد بالكرسي مقابله : ممكن م تتذكريني بس عادي لا تخافين اكيد رح ترجع ذاكرتك ..

راكان يناظره بحقد مع انه م يعرفه ...>> بس هو طبيعته الناس الغرباء يناظرهم بهالنظرات لانه ببساطه م يعرفهم ومتعود ع ان الاغلب يستغلونه ف ما كان يعطي فرصه لاحد يقرب منه ...

طلال مستغرب نظراته : ع كل حال اعتقد اني غلطت بحقك كثير .. أتمنى تسامحيني .. م كنت رح اسامح نفسي لو صار لك شي .. وحسيت اني السبب في غيبوبتك ..

راكان م قدر يتحمل وانفجر : يعني انت السبب هاه ؟ وتبي اسامحك والله ان تطبي عظم م اسامحك اللي يدوس لي ع طرف ادوسه كله .. واذا انت اخطيت بحقي انتظر جزاك م رح اسكت لك ..

طلال وقف من الصدمه : ايييييش؟؟؟؟؟؟؟!!!!!!

انتهى البارت