الرسالة:سلام صراحة منعرش اسمك .. لكن هاذ الرسالة ليك .. كاين سر كبيرر فحياتك بخصوص موت مرتك .. متقوليش وين علبالك و شكون نتي ..  انا روميساء بنت أخ نور رئيسة المركز المختص فمكافحة المافيا .. و رانية كانت صحبتي .. السر هذا يعرفوه شخصين انا و عمتو .. متأذيش عمتو بلاك .. سقسيها و هي تجاوبك .. خاطر من الأصل كان من الخطأ اننا نخبيو عليك هاذ السر .. انا كنت نظن انو هذاك هو الفعل الصحيح .. بصح بعد ماعرفت صوالح وخدوخرين .. و شفت صوالح ثانيين .. قررت نبعثلك هاذ الرسالة .. و متبقاش دين على ظهري .. قول لعمتو نور تخبرك .. السر لي انا طلبت منها تخبيه .. و قول لعمتو بلي قولي لفايزة .. متفتحش الرسالة تاعها .. حتى يعرف هو السر ..
معاذ:يالله سيدة نور خبريني
نور:هاذ السر حلفت نديه معايا للقبر .. بصح بما انو روميسا طلبت .. و هي شافت هكا افضل .. راح نخبرك
معاذ:ايهه راني نسمع فيك
نور:مرتك مزالها حية
معاذ:كيفاهههه 😵😵
نور:مع الأسف .. كيما راك تسمع مرتك ماماتش مزالت حية .. لكن حسبالها راك ميت .. قررت نخبي عليك كلش .. و نقولولك بلي ماتت .. و هي كانت قريبة ليك بزاف .. لكن المكتوب .. مكتبش تلقاها .. و سبب لي خلاناا نخبيو هاذ الشيء .. هو حالتها النفسية .. بعد ڨاع واش تعرضتلو .. لي مشي حنا كنا سبب فيه بل الشيطان .. و نتمنى تسمحلنا
معاذ:وين وين راهي دوكا .. نور مرتي وينن
نور: راح نخبرك .. و راح نضملكم التقاء بصح فقط خليني نروح لداري .. راني تاعبة بزاف و حابة نشوف ولادي .. والله وعد نعيطلك و نخبرك .. وينها و وين راح تتلاقاها .. بما اني شفتك بلي صح وليت صالح و خاطيك اعمال السلاح .. قررت نعفو عليك .. و نخليك تكمل حياتك مهني .. نتمنى متخيبنيش و متخيبهاش
معاذ:اوك اوك نور .. دوك نطلب منهم يجهزولك سيارة تديك لدارك ..
نور:تعرف انا فاللول ظنيت انك معول على حاجة .. و كل هذيك تمثيلية باش طيحوي فالفخ .. مظنيتش روميساء ترجع فكلمتها .. لولا خط يدها و توقيعها لي فالرسالة .. و السر لي مخبيينو انا وياها
معاذ:قبل سنتين انا تركت الأعمال الغير قانونية .. و السلاح و ما شابه .. اكتفيت انو مرتي راحت بسبتو .. و مستحيل نعاود نتقبل خسارة كيما هذي ..
نور:راح نحكيلك كلش ..و كيفاش حتى صرات الحادثة .. بصح حتى تتصالح نتا و رانية ..
---------------------------------
كلهم فالدار نورسين خرجت هي و بنتها .. بعد مالقاوها مليحة .. و تحسنت نهى دار باباها المستحيل .. باش يخرجوها من المشفى ..  و موفرلها كلش فالدار الجديدة .. لي شراتها نور اما فارس لي راح يحاول يبحث عن نور ..
امجد: كاش خبر على نور
فارس:من لولبارح كي عيطتلي و خبرتني نسمعها صوت نهى مبانتش
اسلام:ممدتلك حتى اشارة فهدرتها
فارس:لا العكس كانت تبان مرتاحة و قاتلي راني فأمان
امجد : كي راهي فأمان علاه مقاتلكش وينها
نور:خاطر حبيت نجي وحدي .. كلهم دارو وقت سمعو صوتها لقاوها هي قاعدة فكرسي متحرك ..  دايرة البلاتر فيدها .. و راسها ملويينو ببونداج .. مام رقبتها حاكمينها ..
امجد:وين كنتيي علبالك بلي رانا ف5 نحوسو عليك
نور:ههه كنت ضيفة عند واحد عزيز علينا .. ايا بركاو مالهدرة دوني نريح عييت
فارس:حتى تقولينا شكون هذا
نور:ههه بلا غيرة راه قد وليدي
فارس:ايه شكون
نور:الغولل ايا ادوني عند نهوشتي نشوفها .. وووو تان فارس سيتوبلي .. جيبلي رانية نسحقها ..
فارس:شكون رانية
نور:لي دارت العملية لنهى
شهاب:و علبالك بكلش
نور:لازم بابا 😉😉 ..... داوها طلعوها لغرفة نهى لي كانت تخزر فالمراية
نور:غاضك شعرك
نهى:😔😔
نور:يا البهلولة عادي مهم راكي حية على 3 ايام تنحي الخيط و يرجع شعرك راح بدا يطوال
نهى:انشالله عمتو روحي تريحي حتى نتي شوفي حالتك
نور:ههه عادي هاني رايحة ... راحت نور لغرفتها فات تقريبا نص نهار جات عندها رانية ..
نور:سلام مدام رانية
رانية:ههه مدام
نور:ههه وي مدام .. جبتك اليوم باش نخبرك حاجة .. راني عارفة بلاك متسامحينيش قاع .. و حقك
رانية:راكي خلعتيني .. واش هي
نور:اولا حبيبتي مبروك عليك الترقية .. ثانيا متعلقة براجلك
رانية:معاذ ياك مات خلاص انسايه .. استاذة من فضلك منيش حابة نتفكر
نور:مزال حي
رانية:كيفاشش
نور:اسفة جدا كونا مجبورين حالتك النفسية مسمحتناش .. و هو كان يشارك فأعمال غير قانونية .. روميساء خافت عليك .. بصح قبل موتها .. خلات وصية باش نخبرك هو لي كان خاطفني .. هاذ اليامات .. انا شفتو بلي صح ندم .. و على جالك بعد على السلاح .. و راح يخدم كلش قانوني ..
رانية:انا انا و و
نور:متقوليلش نكرهو الحب باين من عينيك .. اعطيه فرصة يعوضك ..
رانية:صراحة شوكيتيني من فضلك .. مديلي وقت نبقى مع نفسي شوية .. و بعدها نردلك الخبر ..
نور:خوذي راحتك بصح متنسايش .. اذا محبيتهش راه عارف بلي راكي حية .. و متتسرعيش دمري حياتك .. نتمنى تسمحيلنا
رانية:اوك شكرا و راكو مسامحين دنيا و أخرة .. نتوما وقت معايا بزافف .. و علبالي بلي كنت شافينها لمصلحتي .. خرجت رانية مشوكية مل عند نور .. انا نور رفدت تلفونها عيطت لمعاذ
معاذ:طمنيني
نور:خبرتها الحقيقة و تشوكات .. طلبت وقت باش تراجع نفسها .. و تردلي الخبر
معاذ:يا ربي وعلاه هكا وعلاه ماعنديش من غيرها .. يا ربي تمدلي فرصة ..
نور:مزالت تحبك حتى اذا خشنت راسها تقدر ترجعها ليك
معاذ:شكرا على كل و سمحيلي كي حبيت نقتلك
نور:ههه لا شكر على واجب ... فات 15 يوم على الحادثة و معاذ كل نهار يستنا فرد رانية لكن مزال اليوم الباك تاع أمير و ميليسا .. أمير ولا للدار و قالهم ميليسا حبت تريح شوية .. اما هي فكانت عند صحبتها .. و كانت تروح تجوز مع أمير دايمن و تولي ( ربي يوفثكم انشالله تفرحونا جماعة الباك و جماعة لي قصاوهم جامي تكرهو من قضاء ربي هشا مكتوب بلاك شاف فيها خير ليكم ) كمل الأسبوع و ميليسا ولات للدار واحد ماداير فبالو بلي حتى هي جوزت
اسلام:متزعفيش ميليسا معليش العام الجاي انشالله
ابتهال:وي حبيبتي كيما قال باباك المهم راكي مليحة معانا قاع متتقلقيش
ميليسا:عاديي مكتوبب .. و راحت طلعت تضحك و أمير كيف كيف .. تليومم جا رد رانية
نور:ايهيه رانية قابلة تكملي حياتك ولا لالا
رانية بوجه تبان فيه الجدية : قراري راح نقولهولو ليه .. باش يفهمو قولي نتلاقاو فبلاصتنا على 3 ساعات .. عيطت نور لمعاذ قاتلو هو فرح و خاف فنفس الوقت راح يستنى فيها وينتا تجي حتى شافها مالبعيد شيانت شوية بصح مزال زينها هو هو وقف خمست معاه و قعدت نحات نواظرها
رانية: انا قررت نجي حتى هنا و نخبرك بقراري
معاذ:ايهه كملي
رانية:..........

ايا طيرو ترقدو الحلقة الجاية نكملو 🤣🤣😅
ديك نهار عرفتكم على صحباتي و ختشيبي اليوم نعرفكم على روحي ليكو انا قاع هذو 🐵🐯🐱🐶🐺🐻🐨🐼🐷🐮🦝🦊🐰🐭🐹🦄🐴🐸🦓🦎🐍🦒لأنو كل واحد كيش يعيطلي كي نفهم نب نلهمكم 😁😁

رانية