في شي رح نعيشه كلنا سوا بالمرحلة القادمة و هو الإعلان عن المشاركين بالحوار الوطني.

في ظاهرة رح تصير و تكون مفصلية بطريقة تعاملنا مع الموضوع. فمع أول عشر دقائق من نشر أسامي المشاركين بالحوار الوطني رح ينقسم الناس لقسمين كبيرين.

أولاً قسم مستهزء و ثانياً قسم سعيد

القسم المستهزء، رح يحاول يبلش يطلع كلشي فضايح على كل مشارك، شي بوستات قديمة، شي صور ، شي ميمز، شي محادثات، شي أرشيف، شي مواقف.

حيروح يورجيك إنه في من المشاركين ناس ما بتستاهل المشاركة، و حيقول إنه في ناس أكثر كفؤ لهي المهمة.

و بالتالي (و هاد الأهم) فهو رافض لهاد الحوار الوطني و رح يدعي الناس إلى مقاطعته و عدم الاعتراف به.

و خود بقى على حسرة على أيام الأسد، و كيف صبرنا صبرنا و فطرنا على بصلة.

و للأمانة، أنا متأكد إنه في منهم حيكونوا مستندين على حقائق (الاصطياد سهل كتير)، بس كمان كتير منهم حيستهزؤا بسبب كره أو غيرة أو حسد أو ندية.

يلي بهمني من هاد المنشور هو إنه من هلق نتفق على التالي:

١- السوريين مالهم ملائكة، و أتحدا جميع المستهزئين، يلاقوا شخص واحد محصن من الاتهامات، ابتداءً من الداعي، مرورا بالمشاركين انتهاءً بإنت أخي القارئ. و كما قال السيد المسيح :"من منكم بلا خطيئة فليرميها بحجر"

٢- نعم سوريا معباية كفاءات و قدرات... بس كلهم بشر.

٣- سوريا مو بس أطباء، علماء، صيادلة، مفكرين، أساتذة، مهندسين و مجتمع مدني فعال. سوريا موجوعة و فيها كمان كتير ناس ما درست، و سجناء رأي لعقود انعزلوا عن الواقع لفترات، و فقراء تعبانين من الحياة و همومها، و تيكتوكرز و يوتوبرز الصالح و الطالح فيهم، و أشخاص مناح و أشخاص سيئين مخلوطين خلط. فكتير طبيعي نلاقي أشخاص غير مريح وجودهم بالمؤتمر... ما هاد تماما يلي بيعكس صورة البلد الحقيقية.

٤- لا تخافوا من تأثير الفكر السيء على الحوار، بالآخير المجتمع السوري بضل واعي و قادر ينبذ الأفكار الغريبة عنه.

٥- مافي قيادة بالعالم قادرة تختار المشاركين و تتأكد من تاريخهم و كلشي كتبوه و عملوه بحياتهم، أحيانا وزراء بأوروبا يتم تعيينهم و بعد اسبوعين بيستقيلوا لانه في فضائح ضخمة بتظهر بتاريخهم، هي اوروبا فما بالك نحنا؟ .

٦- الشي الوحيد يلي برأي نركز عليه و نتعامل معه بحذر، هو المخرجات بعد كل مرحلة من مراحل المؤتمر الوطني. أيا إشارة لأيا توجه بيعطي مساحة لأي متطرف، لازم كلنا نوقف بوجها.

فمن هلق... مشان ما يصرعونا بفشل المؤتمر قبل ما يبلش.

خلونا شادين الصف.... ألف جهة من مصلحتها يفشل هالحوار.

الكاتب: مهند مالك.

-

وهاد تعليق  عالبوست حبيته من جود حوراني:  "كلامك كتير مهم استاذ مهند و حبيت ضيف شغلة أنه اهم سبب لهالاستهزاء غير الكره والحسد والغيرة والندية، هو الكَلْبية، أو الـcynicism.

واللي هي نتاج خيبات الأمل اللي تعرض لها هالشعب كل حياته بتخليه يلجأ لهالموقف التشاؤمي لأنه بيحميه من انه يخيب أمله مرة ثانية.

الcynics عنصر ضروري بالمجتمع بتدفع الناس المحيطة فيهم للتفكير النقدي والإصلاح بس هم بذاتهم أشخاص خايفين بشكل أساسي و ممكن -بدون تجريح- و -بدون قصد او وعي مباشر منهم- كسولين.

لأنه التشاؤم والعدمية مباشرةً بتخلي الإنسان يتملص من المسؤولية وبتسمح له انه يقتل الرغبة الوجدانية بفعل شيء ما ، بانه لازم يكون إلو دور، لازم يكون عنصر فعال.

فهي السخرية والاستهزاء بتشبع هاي الرغبة بدون ما توصل لأي نتيجة إيجابية و هي بطبيعتها فكر ونهج او defense mechanism هدّامة ولا يمكن انها تبني شيء".