(24)
(بقلم :نهال عبد الواحد )
غضب قاسم شديدًا وذهب ناحية منال لينقض عليها ويؤدبها وراضية تمسكه بكل ما أوتيت من قوة فشعرت أنه إن قدر عليها سيقتلها، ومنال تصعد السلم وتصر على جذب راضية ودفعها وعلي يمسك بزوجته لتدخل عنوة...
وتداخلت الأصوات...
وتشابكت الأيدي...
وتعالي الصراخ...
وفجأة..
سقوط وارتطام بالأرض والجميع قد انتفض فزعًا وعم الصمت فجأة للحظات عقب صرخة إحداهن.
لما سمع علي ذلك الصوت أغمض عينيه وارتعد فزعًا لا يدري من سقط هكذا وصرخة من هذه؟
كان يخشى أن يفتح عينيه، لكنه اضطر وفتحها في خوف شديد فوجد راضية لازالت أمامه، كل ذلك في ثوانٍ قليلة......
وما أن رآها وتأكد أنها بخير احتضنها بشدة وهو يتلاقط أنفاسه بالكاد ودون أن ينظر من سقط.
وبعد قليل هدأ ولاحظ بكاء راضية الشديد فظن أنها لا تزال مفزوعة فجعل يهدئها لكنه انتبه أن الجميع قد هبطوا لأسفل ولا يوجد غيره هو وزوجته التي تبكي بشدة.
نظر خلفه فوجد الجميع ملتف حول منال التي عرفها من لون جلبابها الملطخ بالدماء وفاقدة للوعي، فلقد تعثرت قدمها في طرف ثوبها وهي تصعد مندفعة ثم ذلت قدماها في ذلك الذي انسكب منها و ودت لتنزلق فيه راضية.
ساعة الجدر يتعمي الشوف
كن النضر بابه جافل
يبجي الجضا بير ومكشوف
العجل ده شان وغافل
العجل ده شان و غافل
جلس قاسم جوار زوجته في صدمة محاولًا إفاقتها لكنها لا تستجيب ونظر لتلك الدماء النازفة التي لا يعلم من أين تتآتي؟!
ربتت راضية على كتف زوجها وقالت: روح مع خوك ومرته، دي الأصول يا خوي.
فنظر إليها بدهشة وكانت أمه تنادي عليه وتطلب منه نفس الطلب.
بينما قاسم جالسًا في صدمة لا كلام ولا حراك بعد كل ماجرى فكأنما قد جمدت جميع جوارحه.
نُقلت منال إلى المستشفى ومعها قاسم، كامل وعلي الذي إتصل بأحد أصدقائه يخبره ليعد الطوارئ... و وصلت منال ودخلت إلى العمليات وقد تأخرت كثيرًا وكان قاسم في قمة قلقه وأخواه يهدئاه.
حتى خرج الطبيب أخيرًا من العمليات فأسرعوا نحوه ربما كان عليًا متوقعًا ما حدث لها وقد تأكد توقعه من نظرة زميله الطبيب تلك إليه.
تحدث قاسم: طمنا يا دكتور إيه الأخبار؟
فأجاب الطبيب: للأسف الجنين مات و اضطرينا ننزله.
قال كامل مواسيًّا: ربنا يعوض عليك يا خوي ما تزعلش.
لم ينطق علي لأنه متأكد أن ليس ذلك كل شيء فهناك المزيد، بينما كان قاسم ينظر بين الطبيب وعلي يحاول ترجمة هذه النظرات المتبادلة بينهما وقد خشي أن يسأل الطبيب عن حالة زوجته وانتظره هو من يخبره.
فأكمل الطبيب: بس.....
فقاطعه كامل: بس إيه..
- هي عندها نزيف شديد وحاولنا كتير بس مش بيقف و ده في خطر على حياتها.
صاح قاسم بصوتٍ مختنق: والعمل!
أجاب الطبيب: للأسف مفيش غير... غير... استئصال الرحم وفورًا... بس ده محتاج من حضرتك موافقة كتابية.
فنظر قاسم لعلي وقال بانكسارٍ واضح: دي ذنب مرتك يا علي، أهي اللي دبرته وجعت هي فيه.
ربت علي على كتف أخيه وقال: مش وجته الحديت دي، إمضي الإقرار عشان يلحجوها.
وبالفعل قد كتب قاسم الموافقة و وقع عليها و دخل الطبيب ليجري لها العملية ويستأصل الرحم.
مضى وقتًا حتى انتهت العملية ولا تزال فاقدة للوعي فنقلت للعناية المركزة لتكون تحت الملاحظة.
عاد الجميع للمنزل ومنذ أن ذهب الرجال بمنال للمشفى و راضية وأسماء تجلسان مع حُسنى في قلقٍ شديد حتى عادوا، وما أن دخل قاسم من باب البيت فاتجه مباشرة لغرفته دون أي حديث، أما علي فقد دخلوا عند أمهم.
صاحت حُسنى: طمني يا ولدي، جعدين على نار.
أجاب علي بحزن: العيل جِتل يا مي ومع النزيف الشديد شالولها الرحم.
صاحت راضية بحزن: لا حول ولا قوة الا بالله!
صاحت حُسنى: يا نصيبتي! يا عيني عليك يا ولدي! دي ذنب مرتك والله علي!
- مش وجته يامي.
- أهي خدت جزات السواد اللي كان ماليها.
فقالت راضية: لا يامي ماعنشمتش فيها ربنا يشفيها ويعافيها لجوزها وعيالها.
صاحت حُسنى بدهشة: هدافعي عنيها! دي كانت عايزاكي مُطرحها!
فتسآلت راضية: وحالتها كيف يا علي؟
أجاب علي: لسه ما فاجتش وحطوها ف العناية لحد الصبح وهنشوف.
- لازمن أزورها يا علي.
- عتروحي فين بس يا بت الناس؟! نسيتي كانت عايزة تعمل فيكِ ايه! مفيش مرواح ف حتة.
أومأت حُسنى: أيوة صُح يا ولدي، لو فاجت وشافتك يا راضية عتحسبك جاية تشمتي فيها و ماعتسكتش.
تابعت راضية: لا والله يامي ربنا يعلم جلبي انخلع عليها كد إيه!
فسألتها أسماء: ليه يا راضية؟ دي كرهاكي من أول يوم!
فأجابت راضية: لا ما كرهانيش، هي بس ما عرفتش تحبني.
تابع علي: وإيه الفرج يا أم العري؟
- لا الفرج كبير، اللي عيكره ما عيحبش واصل أبدًا، واللي ماعيحبش يجدر بعديها يحب، ده ربنا جل جلاله بيجول عن نفسه، لا يحب المفسدين، لا يحب الظالمين، جال لا يحب لأنه عيحب الظالم لما ينتهي عن ظلمه والمفسد لما ينتهي عن فساده، ما جالش يكره.
ربتت عليها حُسنى قائلة: ربنا يكملك بعجلك يا حبيبتي ويجومك بالسلامة!
فقالت راضية:طيب خلاص ماهروحش المستشفى وعستناها لما تعاود إهني.
صاح كامل: إهني فين؟ تاجي تاني وسطينا!
- أيوة طبعًا يا عمي كامل تاجي و تجعد و والله ما حد عيمرضها غيري!
صاح علي:كنك اتجنينتي!
فقالت راضية: لا يا علي، عتروح بيت أبوها مين عيخدمها؟! أمها التعبانة ولا واحدة من خواتها عتسيب بيتها وتاجي تخدمها! وأكيد مش حد من حريم خواتها، يبجي تاجي وتجعد وسطينا و أراعيها وأخلي بالي منيها.
فاحتضنتها حُسنى وقبلتها.
تأفف علي قائلًا: طب إجفلي الحديت دي دلجيتي، لما نشوف جاسم عيعمل إيه معاها.
أجابت راضية: عيعمل كل خير، بس إنتوا ساعدوه وهدوه.
فاقتربت منها أسماء وقالت على استحياء: راضية! أنا محجوجالك يا خيتي، حجك على راسي؛ لو كان يعني صدر مني أي شيء ضايجك.
أومأت راضية: عارفة والله يا أسما إنك كنتِ بتمشي على هواها وخلاص ، يلا المسامح كريم.
فاحتضنتها وقبلتها فنظر إليها علي وابتسم وقال: سامحتيهم على طول إكده!
فابتسمت إليه فنظر حوله ينظر إليهم وكأنه يقول (لما نبقى وحدينا)
ثم قال: يا ترى مسحتوا الهباب اللي عيزحلج ع السلم دي؟
أجابت أسماء: آه يا واد عمي مسحته ونضفته زين.
فقال علي: طب يلا يا راضية إطلعي إرتاحي، إنتِ تعبتي كتير.
تابعت راضية: لسه يا علي ماعملتش حاجة إنهاردة ف البيت، اللي حوصل دي شندلنا.
أومأ علي: معلهش تعالي شوي إرتاحي.
صاح كامل: ماتروحي مع جوزك يا بت.
فقال علي بلطف: ما تجومي يا بت، هاتي يدك.
فقامت معه وذهبا.
مرت عدة أيام وقد تحسنت حالة منال لكنها لا تزال في المستشفى وكان قاسم يزورها ويطمئن عليها لكن دون أن يتحدث إليها بكلمة واحدة، وقد أحزنها ذلك بشدة مع حزنها على ما جرى وفقدها لطفلها ورحمها.
وذات يوم بينما كان قاسم يجلس مهمومًا في غرفته دخلا عليه راضية وعلي.
فسأله علي: وبعدهالك يا خوي! ربنا ليه حكمة ف اكده، عنعترض يعني!
تنهد قاسم قائلًا: ونعم بالله!
قالت راضية: هي عتطلع بكرة مش اكده؟
فهز رأسه بأن نعم.
فتحدث علي: وناويت على إيه يا خوي؟
أجابت راضية: عينوي على إيه يعني! مرته عتعاود بيتها وبزيادة عليها اللي هي فيه.
فنظر قاسم نحوها.
فأكملت راضية: جارية الحيرة اللي ف عينك يا بو عمو، محتار وماعارفش تسامحها وما عتجدرش تفوتها.
رمقها قاسم وصاح: إيه ماجدرش دي يا بت!
- واه! مرتك وبت عمك وعشرة السنين وأم عيالك ...وحبيبتك.
- حبيبة إيه؟ بلا جلة جيمة.
- لا بجى حبيبتك، إيه اللي عيصبر واحد على مرة كِيف مرتك طول السنين دي إلا كونه عيحبها ومايجدرش يفوتها!
- سكت مرتك يا علي! كن المسلسلات التركي اللي بتشوفها بوظت راسها.
- طب ما تجولش جدامنا عشان هيبتك، بس جوللها هي، ليك حج تزعل منيها عاتبها بس احتويها وراعي ظروفها دلجيتي، دي الواحدة منينا لما بتتعب وجوزها يجولها كلمة زينة بتفط من بكانها كنها مافيهاش الهوا، والله ياعمي الكلمة عتفرِج! جرِّب وغير طريجتك معاها، وما تخافش ماحدش عيعرف ولا عيحس بيك.
صاح قاسم مخفيًا اعتراضه: الحج يا علي مرتك عايزاني أجول لمرتي حديت حب وكلام فارغ!
فضحك علي وقال: ما تجول واه! ماهي مرتك وإنتوا لحالكم... ولا عتستحي منيها وإنتو لحالكم كماني.... عتخليني أجول كلام مايصُحش جدام الحريم.
قالت راضية: باجولك إيه يا علي خد خوك وجوله اللي تجولهوله بعيد عن إهني، يلا عايزة أروج وانضف الأوضة عشان تاجي ف الصبح تلجاها على سنجة عشرة.
تابع قاسم بدهشة: ما مصدجش اللي بتعمليه معاها دي!
أجابت راضية مبتسمة: ربك بيجول ف كتابه:« ....ادفع بالتي هي أحسن فإذا الذي بينك وبينه عداوة كأنه ولي حميم * وما يلقاها إلا الذين صبروا وما يلقاها إلا ذو حظ عظيم »
أومأ قاسم مبتسمًا: صدق الله العظيم، ربنا يزيدك يا راضية ويباركلك فيها يا خوي ويجومهالك بالسلامة ويوسع عليك يا واد بوي!...........
NoonaAbdElWahed
Bạn đang đọc truyện trên: AzTruyen.Top