فـلاحه خذت قلبي من جانت تزرع ورود جنها تزرع ورود بقلبي مو بالكاع
......................................................

زينب

احاول اصحيها واني خايفه من السياره الورانه اضربها على وجها ماكو فايده متت خوف سمعت صوت وراي التفتت شفتهم نزلو مـن السياره يركضون بتجاهي

اراي :شبيها شنو الصار

اتجاهلته و كملت احاول اكعد بيها

ايمن: خاف من التعب والاحداث الصارت اليوم

هزيت راسي اي لزمتها من ايدها وصرت احاول اشيلها بس ماكدرت كلش ثكيله راح ايمن للسياره جاب ماي انطانيا رشيت شوي عليها فتحت عيونها بتعب شربتها شوي وهم حاولت اكومها مكدرت اقترب اراي منها دفعني على كيف لزمها من ايدها وكومها واني من الجهه الثانيه ويا صعدناها للسياره

اراي: خلي نوديها للمستشفى

هزيت راسي اي

صاحت بصوت مهزوز وتعبان

عسل: مااريد مابيه شي ماروح لمكان عوفنه انت وروح شكرا تعبناك

باوع عليها صفح وحجه بنبره عصبيه

اراي: استغفر الله ربي واتوب اليه رجعي انطمري معليج نوديج للمستشفى وهاي هيه

ايمن واراي بالصدر واني و عسل وره كاعدين الطريق ربع ساعه للمستشفى كلش متعب
وره ربع ساعه وصلنه ايمن بقه بالسياره واني واراي نسند عسل دخلنه للمستشفى اخذناها للدكتوره فحصتها شوي وكالت

الدكتوره: شوفي ماما عندج ارهاق كلش قوي واضافه الى فقر دم حاد و نقص حديد جسمج ضعيف كلش وهاي الاغمائات الدتصير كلش طبيعيهه بسبب حالتج الصحيه السيئه راح اكتبلج على مقويات وفيتامينات وحاولي هاي الفتره ترتاحين بيها

زينب: خوش شكرا الج دكتوره

اخذنه عسل للسياره وراح اراي يجيب الادويه

ايمن:شنو كال طمنوني

حجيتله الكالته هز راسه ساكت وره دقايق صعد اراي و انطه الادويه لعسل

عسل
حجيت بهمس خايفه من رد فعله

عسل: اريد انزل

خزرني وكال
اراي: ليششش؟!!!!!

اطكطك ب اصابيعي واحجي بخجل وهمس

عسل: اروح للحمام

ابتسم وكال -نزلي-

التفت الزينب وكال

اراي: انزلي وياها هاي ثوله انوبه تروح توكع هناك

هزيت راسي اي نزلت وياها. اتمشينه لحد مارجعنه للمسشفى دخلنه للحمامات وكفت عسل تغسل بوجهه خلصنه طلعنه بتجاه الباب اني رحت صعدت بالسياره وعسل وكفت تعدل نفسها

عسل
وكفت اعدل ملابسي خلصت دامشي صرت كبال السياره بس بمسافه كبيره وجان التفت على صوت يصيح

......:يا بنييييه خيتييي بلا زحمه

عسل: اتفضل؟

......:بس سؤال اذا متصير زحمه

ابتسمت وكتله - اتفضل -

جاي يبده كلامه وجان اراي يضرب هورن قوي بدون توقف

اراي

منتضرها تجي عاد لان خايف عليها كلش تتخربط لو شي لمحتها من بعيد هيه وزينب فزيت بفرحه شعور ماينوصف مثل الطفل من يشوف امه استغفرت ربي لان انه مزوج زينب صعدت وهيه وكفت ويه ولد ردت انزل بس ايمن منعني لزمت روحي كوه بديت اضرب هورن قوي بدون توقف الكل الي بالشارع انزعجو مني

عسل

ابتسم بخجل وكمل كلامه

ابتسمت وكتله -اسفه بس مجاي افهم شي -

نزل راسه وكال

-طبعا متسمعين غير صوت الهورن مجاي يتوقف-

ابتسمت وكتله

عسل:خلي شوي نبتعد حتى اسمعك زين

حجيت جملتي واني مقهوره من تصرف اراي السخيف فشلنه كدام العالم بسبب الهورن كل الناس انزعجو وسبو

ابتعدنه شوي بعيد وجان يكول

......:الموضوع مايستاهل كل هاي الهوسه االصارت بس اضاهر الزلمه منتضر واحد من اهله ف هيج دك هورن المهم خيتي ردت اسألج اذا اكو شغل ضروري كلش لان عندي امي مريضه وماعندي فلوس اعالجها يا خويه

عسل: والله بعيوني بس اني هم جاي ادور شغل ومجاي الكه

ابتسم ابتسامه تكسر القلب واضح القهر بعيونه

حيدر: اسمي حيدر وبيتي قريب منا واني دائما اجي يم المحل البصف هاي المستشفى بس تلكين شغل تعاليلي خويه فدوه اروحلج

هزيت راسي اي

انصدمت بخوف على ايد تطخ كتفي التفتت بسرعه لكيته اراي

عسل:شجابك انت

خزرني وكال

اراي: كأنو عبالج اني سائق الخلفوج حتى تخليني بالسيارة وانتي تفترين

حيدر: اعذرني خويه اني اخرتها

اراي: انــت منـو

ردت بس افتح حلكي

اراي: انتي الصمي وروحي صعدي

خزرته وكلت

عسل: مو ضروري تنتضرني روح

باوعلي صفح وصاح بصوت شبه عالي

-صعدي -
عاندت وضليت واكفه

اشوفه يحقق ويه حيدر
انت منو وشتريد منها وليش اله هيه سألتها من دون كل البنات ووووو

حيدر: اول شي اني خليت خبر عند الكل انو محتاج شغل مو بس هيه واما ليش ف لان سمعتها تكول لصديقتها -محتاجه احد يساعدني بالمزرعه مالتي-

حجيت بفزعع وحماس

عسل: اااااااييي صدوك تعال اشتغل بمزرعتيييي

خزرني ولزم ايدي قوي حجه من بين اسنانه

-امشي صعدي لاخـرب وجهج زماله-

بلعت ريك ومشيت بخوف للسياره

حجيت بهمس ممزوج بخوف وتوتر لـ زينب

عسل: زينب يمكن هذوله خاطفينه لان احنه بطلنه من الشغل وهمه مجاي يعوفونه

ضحك ايمن على كلامي وكال

ايمن: لا خويه مخاطفيكم بس اعذري ابن عمي يقار عليج

باوعت بـ شك وخوف

عسل: شلون سمعتني شنو حاطين جهاز تنسط

ضحك بصوت اعلى وكال

ايمن: ميحتاج جهاز تنسط انتي صوتج فضيحه اصلا حتى اعلى من صوتي
باوعت عليه صفح معاجبني كلامه هزيت ايدي بستهزاء وكعدت ساكته وانوبه ايمن يباوعلي ولازمه ضحكته بالكوه ضوجني كلش بس اكتفيت بالسكوت
صعد اراي للسياره وسد الباب قوي لزم الستيرن وبده يسوق ويحجي بصوت عالي

اراي: زماله يعني هيج غباء وفهاوه ماكو بس عند عسل

باوعتله صفح وكلت -شكو؟!-

التفت عليه وهوه لازم الستيرن ب ايد وحده والثانيه يدخن بيها اشر عليه وبيده الجكاره

اراي: شكو مو ؟

هزيت راسي اي واني مغثوثه منه

اراي: يعني رجال متعرفني توكفين ويا هيج وتسولفين شنو معناها لو غباء لو اخلاق سزز

خزرته وكلت

عسل: ترا شفت بعينك الولد يدور شغل محجينه شي خطأ حتى تحجي هيج

وكف السياره فجأه نزل منها واجه بتجاهي فتحلي باب السياره وكلي نزلي نزلت وزينب وايمن يباوعون مصدومين رادت زينب تنزل وراي بس صيح عليها وكلها لا تنزلين

زينب

قلبي وكف من نزلو كلت بس لا يأذيها لو يعوفها برا ونروح ضليت متوتره حاولت انزل صيح عليه كعدت
اباوع على ايمن عبالك ممهتم يكلب بتلفونه حجيت ويا وهوه يجاوبني وعيونه بالتلفون

زينب: ايمن انزززل خاف يأذيها حباب

ايمن :لا مستحيل يأذيها

زينب:وليششش هيج متاكد

ضحك وكال

ايمن:لان مو مجرم حتى يأذيها فهمتي

خزرته وحجيت بصوت عالي

زينب:واذا عافها بالشارع وصعد للسياره وخلانه نروح

ابتسم وكال

ايمن: ميسويها ف كافي اسكتي ومجرد شاهديهم
سكتت و اباوع عليهم بس كلت اذا يأذيها ماسكتله انزل واتعارك ويا

عسل: ليش نزلنه؟

ابتسم وكال

اراي: افهمج شغله عقلج الصغير مراح يفهمها بالكلام

باوعت عليه ساكته راح لوحده واكفه بالشارع اني ورا بكم خطوه
اقترب منها وبده يحجي

اراي: السلام عليكم

……:هلا اتفضل؟

اراي: ولو زعجتج بس اريد اعرف ماكو هنا شغل شوي حالتي تعبانه وامي مريضه وماعندي فلوس اعالجها ف بس اذا اكو شغل كوليلي

اباوع على كلامه واني مصدومه البنيه جاوبته بسرعه كأنو ممصدكه واحد حجه وياها كلمه كبل كلتله

اي ادورلك طبعا بس انطيني رقمك حتى اكدر اتواصل وياك

ابتسم وانطاها تلفونه وهيه تكتب رقمها اترخص منها واجه بتجاهي ابتسم وكال -فهمتي؟

باوعت عليه مستغربه حجيت بعدم فهم

عسل: شنو اتريد افتهم انو انت اكبر زاحف؟

ضحك لزم شواربه عدلهم وكال
اراي:عرفت عقلج الصصغير مراح يفهم الاريد اوصله الج انو هواي شباب يزحفون بهل طريقه ف مو ياهو الجاي تثقين بي

باوعتله صفح وكلت

عسل: واذا جان صدك محتاج؟

اراي: اي بعد راح نشوف اني انطيته شغل بالبستان مالتنه واذا جان صدك راح يجي الاسبوع الجاي يشتغل

هزيت راسي اي وسكتت شوي واعيوني اجت على التلفون حجيت بتوتر وخجل

عسل: بله جيب خاف تكذب عليه ومانطتك الرقم

ابتسم وانطانيا كعدت ادور لكيت رقم مسجل بالجديد ف عرفته رقمها شوي جنت اعرف بالتلفون لان جود علمني ف طلعت الرقم وحذفته بسرعه

ضحك وكال
اراي: ليششش

بلعت ريك وكلت بخجل

عسل:انت مزوج شتسوي بيها

ضحك واشرلي على السياره صعدنه وبده يسوف

………………………………………
ام عسـل
كمت من النوم ميتـه تعب شغلي بالبيوت كلش متعب سوده عليه بنتي ربي يكون بعونها هسه المفروض تعيش حياتها مثل باقي الشباب مو تتبهذل بالشغل والتعب

لملمت الفراش خليته على صفحه رحت للمطبخ كعدت اسوي سياح وچاي حار تريكت وخليت الباقي لبنيتي خطيه تحبه كلش
رحت البس عبايتي حتى اروح لبيت حجي حازم اكمل شغل واني جاي البس جفوفي شميت ريحة قويه كلش طلعت ادور على مصدر الريحه .......

________________________________

وبسسس خلص البارت 😭💜