كل من أُصيب في غير قلبه ، مُعافى.
...................................................
كاعده بصف ابويه يوكلني ويسولف

-اكلي بنيتي حبيبت ابوج بالعافيه-

رغم كبـري بعده يعاملني كـ طفله ويه كل كلمه منه قلبي ينملي حب بابا هوه احسن اب بالعالم

اجت امي ضايجه

-ترا كبيره ميحتاج هيج تدللها-

ضحك وكال

-لو عمرها تسعين سنه تضل بنضري بنيتي الصغيره-

باوعت ساكته كمل كلامه

-عندي بنيه وحده بس ماليه عليه الدنيا بحنيتها -

ابتسمت فرحانه بكلامه كعدنه نسولف شوي

تسريع الاحداث
مر الروتين عادي اني ويه ابويه يدللني وفرحان بيه بيوم اجه خطار بيت عمي يمنه فرحت كلش لان احب ابنهم سيف استقبلناهم فرحانه دخلت سلمت عليهم وطلعت وكفت اسمع

ابو اراي: الله بالخير خويه انه اليوم اجيت اطلب ايد بنتك ديمه الابني سيف على سنة الله ورسوله واتمنى ماترجعنه خايبين

ابو ديمه:والله خويه هلا بيك واان شاء الله مانخيبك انه اكيد موافق مالكه واحد مثل سيوفي البنتي الروحي من الدنيا بنتي بس تعرف الاهم رأيها

ابو اراي: طبعا خويه بس اذا ماتصير زحمه خلي والدتها تسالها عن رأيها

واكفه اسمع وقلبي يدك سريع كأنو حلممم التمنيته من الطفوله يصير الي اجه يطلبني
بس شلون مامبين انو يحبني معقوله جان يحبني واني مادري!

اجت امي يمي سحبتني للغرفه سألتني عليه كتلها موافقه فرحت وراحت كالت الابويه

ابو اراي: على بركة الله

وره شهر صار عقد السيد طول الوقت ماحسيت بي يحبني رغم جان يتضاهر بالفرح بس عيونه تشرح عدم اهتمامه رغم هذا جنت اقنع نفسي انو مامتعود او يمكن يستحي يبين حبه الي ووو هواي انطي مبررات عقدنه محكمه وراها العرس

كاعده بالحفله افكار توديني وافكار تجيبني مانكر جنت طايره من الفرح عايشه ب احلام ورديه شوي اكول راح اعيش ويا اميره وشوي اعيشه بدلال دام يحبني واختارني خلصت الحفله صعدوني لغرفته متوتره وبنفس الوقت فرحانه ساعه ودخل للغرفه بدون مايباوع بوجهي دخل يتوضه رحت توضيت ورا جاب مصلايتين فرشهم بده يصلي بدون ماينطق حرف استغربت تصرفاته كلت يمكن يريد نصلي وراها نسولف وهيج صليت ويا كملنه صلاة دخل للحمام سبح وطلع متجاهل وجودي دخلت اني هم سبحت حايره بتصرفاته شديصير. ليش هيج متجاهلني خاف متوتر!او يمكن يستحي اقنع بنفسي طلعت من الحمام كاعد على الجربايه يدخن وكفت كباله صافنه بوجهه اريد اسأله شبي وياي بس اتراجع انسحبت لحضنه ببسرعه قرب مني مغمض عيونه اباوعله مستغربه شبي!!فتح عيونه راح طفه الاضويه ضلمها ورجع قرب مني يحضني ويبوسني ووو.........

صوت الباب فززني من الماضي رجعني للواقع الداعيشه دخل تعبانه باوعلي بلمحه سريعه كاعده بالزاويه نفس كعدتي

حجه وياي بعصبيه بدون مايباوع

سيف: نامي على الجربايه لا يصير بالطفل شي

اتجاهلت كلامه بقيت نفس كعدتي اجاني بسرعه لزمني حيل من شعري حجه من بين سنونه

سيف: طبج مرض انتي ماتهميني بس هذا هذا الطفل

يحجي ويأشر على بطني

-هذا الطفل المخليج لهسه عايشه وهوه الاثبات القوي على خيانتج -

حاولت اسيطر على دموعي بس ماكدرت بجيت وكتله

- صدكني سيف صدكني ماخنتك قسم بالله ماخنتك -

ضحك مستهزء كام من يمي كسر كلشي بالغرفه

-تريدننني اصدكها واني شفت بعيني ايي مو مطي اني كدامج مطي -

وكفت كدامه بسرعه لزمت ايده قوي حتى لا يكسر شي ويتأذه دفعني حييل رجعت قربت منه عيوني بعيونه بجيت بقهر

-ليش ماحبيتني؟ -

ضحك مستهزء صرخ بوجهي

-حبيتتتج حبيتج وردت اكلج بس تصرفاتج ضوجتني وبعدتني عنج بس مانكر حبيتج صح بس شنو الفايده خنتيني وبغرفتي هممم-

رجعت اذكر الماضي

مر اسبوعين على زواجنه ينطيني حقوقي الزوجيه بس بدون مشاعر بارد احسه وياي
بيوم صعدت لغرفتي جان يبدل يريد يطلع

ديمه:حبيبي وين رايح؟

اتجاهل كلامي عدت عليه السؤال مره ثانيه

سيف:شعليج انتي

ديمه: يا شبيك غير زوجتك

سيف: زوجتي بس بالاسم!

كلامه صدمني شديحجي هذا شنو قصده عقد قران ومحكمه وعرس و كلشي مسوين بعد شلون بس بالاسم باوعتله خايفه

ديمه:يعني شنو

حجه بنفاذ صبر

سيف: يعني بدون حب بدون مشاعر ماعترف بهيج زواج

ابتسمت فرحانه اكيد عباله ماحبه لهذا هيج يحجي حجيت بحماس

ديمه:لا لا والله اني احبك

سيف: بس اني ماحبج!

بهاي الحضه احس لو ميته ولا سامعه هيج

ديمه:شدتحجي؟

سيف:اي ماحبج ابويه جبرني ازوجج ماردتج

قربت منه لزمت وجهه ب ايدي

ديمه:ماحب هيج شقه سيف

بعدني عنه وكال

سيف: مجاي اشاقه ديمه اني ماحبج ولا ردتج

اتهسترت ضليت ابجي واصيح عليه

ديمه:لعد شلون نمت وياي شلووون سمحتلك نفسك تقرب لوحده ماتحبه ؟!!!!

سيف: مجبوررر انطيج حقوقج الزوجيه مجبور كافي ابتعدي خل اطلع

عافني وطلع من الغرفه بهاي الحضه ااعترف اني تغيرت اتكبرت واتغير اسلوبي ويه اهله الجنت احبهم صرت ماطيق احد بس حبي السيف ماتغير احبه ماكدر

رجعت للواقع ماكو طالع من الغرفه رجعت كعدت بالزاويه ابجي

كارمن

كاعده بالغرفه ارتبها كرار جوه يم اهله رتبت الغرفه جاي اريد اطلع اجاني صوت اشعار بالتلفون رحت شلته رقم غريب باوعت رسائل هواي فتحته مستغربه

-اطلقتي صح؟ مستحيل مستحيل بعدج اكيد اطلقتي لان رجلج ماعنده كرون هههه
مبروك الطلاق منتضرج ترجعيلي ضاله بنفسي بعدج

قريت الرساله خايفه ايدي ترجف الدموع بعيوني بسرعه دور على الحضر حضرته عفت التلفون ونزلت يمهم

كارمنن: السلام عليكم

عسل: وعليكم السلام هلا

زينب: وعليكم السلام

بدينه نشتغل بالمطبخ كوثر كل شوي تنزل تذبلها حجايه وتروح

عسل
كعدت من النوم نفس الروتين حاولو يمنعوني اروح للشغل ماقبلت طلعنه للشغل وصلنه لبيت الشيخ دخلنه للمطبخ نشتغل كارمن نزلت ساعدتنه سويت اكل صعدته لغرفة ديمه مثل العاده تسألني عن سيف اكل لو لا صرت اكذب عليها اكولها اكل حتى هيه هم تاكل نزلت كملت شغل متجاهلين كوثر التريد بس تسوي مشاكل ويانه

دنسوي اكل ميتين تعب اجه صوت اشعار من تلفون كارمن مسحت ايدها وراحت تشوفه

ضحكت وكالت اعذروني بنات هذا كرار يريدني ضروري

ضحكنه عافتنه وصعدت يمه

شوي ودخل الشيخ متوتر ركض صاح على ولده ومرته وكارمن وجابو ديمه اخذوها وراحو بهاي الحضه كلش خفت عليها اتوقعت راح يذبحوها يومين ورجعو بهاي اليومين ماكو جديد بس نشتغل وهاي كوثر تحوس بس تسوي مشاكل
ونجم مايجي مانشوفه باليله الاوله اجه جود باليل خطيه وصلنه ورجع يمهم وباليله الثانيه اجه ايمن وصلنه

من رجعو عرفنه انو ابو وام ديمه سوو حادث وتوفو

دخلت ديمه وياهم لازمتها ام اراي من جهه والجهه الثانيه كارمن بالكوه تمشيي حالتها كلش تعبانه عبالك فاقده الوعي ركضت ساعدتها بدال ام اراي صعدناها اني و كارمن لغرفتها

ديمه
مر شهر بعد خسارتي الامي وابويه كرهت الدنيا اتمنيت اموت وياهم واخلص ايست من العيشه بكل مره ابجي بيها اصبر نفسي بالجنين الي بطني مر شهر كدرت اسيطر على نفسي بي واما سيف نفس الشي يصعد يطلع ملابسه وينزل بدون مايحجي شي حالته مو احسن من حالتي ضعفان كلششش وجهه اصفر دوم عصبي

انهاريت ابجي شلون راح اثبت برائتي وهوه شافه بغرفتي شلوون اكدر اعيش بدون امي وابويه

- ياربي انته اعلم بيه ياربي ساعدني -
كعدت ابجي منهاره شوي وحسيت بدفره ببطني

-ها ماما ها يروح امك انته المصبرني مايهمني اذا ولد او بنت بكل الاحوال اعز من روحي اسمع ماما لا تضوج ولا تكره بابا حقه والله -

احجي وابجي شوي وسمعت صوت وره الباب مشيت. بدون ماطلع صوت

نجم واكف يحجي بصوت ناصي ويه كوثر

نجم:متاكده خانته؟

كوثر:اي والله حتى هوه ضل يصيح ويكول خانتي

نجم:جا ليش ماكتلها

كوثر:لان حامل

نجم:حامل ب ابنه؟

كوثر:لا لا ابن هذاك الخانته ويا

نجم:انه اكتلها اليوم باليل اريدج تتاكدين من رجلج وسيف و ايمن طلعو وانه اصعدلها اذبحها خوش؟

كوثر:ماشي ماشي

بهاي الحضه عرفت لا مفر الي من الموت استسلمت للموت رجعت كعدت بمكاني ابجي حسيت بضربه ثانيه ببطني ماعرف شلون رجعتلي القوه ضليت افكر لازم الكه حل شوي وفكرت اهرب انتضرت ينامون كلهم حضرت اغراضي الاخذهن شوي ونامو نومة الضهر وكفت بالباب ماكو صوت نزلت بدون صوت اباوع منا ومنا هم ماكو احد الشباب بشغلهم شفت المطبخ مابي صوت اتاكدت انو كاعدات على صفحه البنات ركضت لباب الشارع طلعت اركض من الفرع الثاني حتى خاف يجي واحد من الشباب متاكده مايجي من هذا الفرع اله الاول

شفت سياره اشرتلها وكفت رجال كبير صعدت ويا انطيته كروه

ديمه: عمو للكراج

شوي ووصلت للكراج. حايره وين اروح اذا الاهلي اكيد اخويه يذبحني واذا اضل نجم يذبحني حايره وين اروح ياربي سمعت صوت واحد يصيح

-نجف نجف نفر واحد طالععع-
ركضت بسرعه صعدت وياهم هذا افضل مكان اروحله اول شي رحت للمقابر ضليت اسئل على قبر ابويه وامي ماعرف مكانهم
رحت سئلت الدفان ضل يدور وياي بالساعتين يلا لكينا
كعدت يم قبره ابجي واشكيله الصارلي بجيت لحد ما تعبت كلش

اجيك يا روحي نفس النومه كوم ارجع بنيتك بقت ملچومه

تعبت كلش رحت لقبر امي ابجي واحضن بقبرها شوي وكمت ازور ضريح الامام علي عليه السلام مجرد دخولي للضريح اجتني راحه مو طبيعيه ارتاحيت كلش زرته وكعدت ابجي واشتكيله

عسل
جاي نشتغل وجان نسمع صوت ورانه التفتنه

نجم:والله حلوه هاي الجايبتها تشتغل اهنا

باوعتله خايفه وباوعت الزينب الصافنه مامفتهمه شي

نجم:تعاي انتي هم تسوين نفسج شريفه مثلها

خزرته وكالت

زينب: احنه اشرف منك فهمت

نجم:احترمي نفسج لا اجي افرك حلكج بنت ال**

عسل: احترم روحك واطلع بره لا اهينك

بعده جاي يريد يقرب ودخلو ايمن واراي

اراي:ها نجم خير؟

نجم:ها ماكو شي بس داسألهم شمسوين اكل

اراي: اطلع وممنوع تجي اهنا بعد فهمت

طلع بدون مايجاوب وهمه طلعو ورا سويت اكل صبيته الهم خلصو والكل نامو كعدنه اني وزينب ناكل. شوي وصفنت اذكر

العوده الى الماضي
الدكتوره : البنيه عذراء
ابتسمت منتصره اباوع لنصر الواكف مصدوم
طفرت ام نصر ضايجه

ام نصر:لعععد شلون ماطلع دم

الدكتوره: اكو سبع انواع لغشاء البكاره والبنيه عندها نوع اسمه المطاطي وهذا النوع يكون اكثر سمك وقوه من الغشاء العادي فـ مرات ماينزل دم بس الاكيد انو البنيه عذراء

وكفو مصدومين عفتهم و اخذت الملف اليثبت عذريتي وامي وطلعنه ركض ورانه يحاول يعتذر اتجاهلته ومشيت بيوم الثاني طلبت الطلاق ماقبل ضل يماطل ويتعذر ويتلوك ضل هذا الحال شهرين يلا وافقت ارجعله بسبب حبي اله وانو حقه هيج يسوي

كارمن

بالغرفه كاعدين نسولف اني وكرار

كرار:بوووويه احبج والله

ضحكت خجلانه

كارمن:اني هم يروحي اموت عليك

كرار:اني احلم بيج ومن اكعد افكر بيج اعشقج
ادمنتج كارمن ابيعع عمري وابقى وياج انتي ربي خلقج بس الي

ابتسمت على كلامه صافنه بنضرات الحب الي بعيونه ماعرف اوصف حبي اله هذا العوضني عن العشته

دنسولف وجان يجيني اتصال كمت اشوف تلفوني وجان ينقطع يعني رمش عليه فتحته حتى اقره الاسم شفت رسائل من رقم غريب! فتحتها مكتوب ليش ماسمعت عن طلاقج! وجواها صور دتحمل ضغطت عليها وجان اشوف!!!..................

يتبع ❤️

شنو تتوقعون🗿الصار