بـين احضان الضلام ووسـط الفساد بريئه يحتضنها الضلام حتى ينقذها
<<<<<<<<<<<<<<<<<<<<<<<<<<<<<<
اني عسل عمري 20سنه وهاي قصتي
اني عايشه ويه امي
غاطين بالفقر لا حول ولا قوه امي تشتغل خدامه حاولت هواي امنعها من هذا الشغل بس هيه تعاند....ابويه اتوفه وعافلنه بيت ومزرعه اني اشتغل بيها وازرع بيها وامـي هم مرات تساعدني

ومن العصر لليل ابيع خضره بالسـوك

اما عن شكلي اني كلش حلوه بس ماهتم لنفسي حياتي كلها للشغل حتى اجيب أكل بالحلال جسمي مو كلش حلو صح عندي تفاصيل بس كلش ضعيفه
خل اوصفلكم بيتي حتى ابدي قصتي المتعبه
عايشين بالبيت بس اني وامي البيت ارضيته مكسره و سقفه على اي دقيقه يوكع علينه حيطانه سوده مصخمه شوي وتنهار
البيت مكون من حمام و غرفه ومطبخ صغيرون كلش ومزرعه صغيره

كعدت الصبح من النوم كمت عدلت نفسي لبست دشداشه طوويله كلش حمره بس مخصره ماهتم للبس اهم شي عندي الشغل مشطت شعري ولفيته كبه لبست شال لفيته على وجهي ونزلت طلعت بسرعه بدون اكل للبستان(مزرعه) اشتغلت شوي و عدلت الحشيش وقلمت الاشجار

مدنكه واشتغل حسيت بـحركه قريب رفعت راسي اباوع شفت شـاب لابـس تيشيرت اسود نـص ردن وبنطرون اسود وشفقه سوده ومغطي وجهه بـ قماشه سوده واكف كدام سيارته العطلانه رحت عليه بسرعه

عسل: السلام عليكم

...:وعليكم السلام

عسل: اكدر اساعدك؟!

رفع راسه باوعلـي بلمحه بسيطه هز راسه لا
كمل ابتسم وكال

...: متكدرين انتي مجرد فلاحه شتسوين قابل

ابتسمت وعفته ورجعت اشتغل وافكر
*هذا المغرور مو مال واحد يحترمه ويساعده اصلا اني لوكيه شكو رحت*

افكر واباوع عليه هم صار يباوعلي رجع لسيارته كعد انتبهتله يرجف من البرد جان الجو كلش بارررد والهوه قوي رجعت للبيت ركض صعدت لغرفتي جبت قمصلة ابويه المتوفي جنت اشـم بيها من اشتاقله طلعت من البيت رحت لسيارته متردده احسه مايستاهل بس اكول خطيه الجو بارد

اقتربت من السياره ضربت ع الجامه وهوه هم نزل الجامه ابتسمت وكلت

عسل: ولو ماتستاهل بس اني قلبي طيب مو بيدي

ضحك وكال شكرا واخذها لبسها
وره دقيقه اجه شاب ثاني ماعرفه صاعد سياره

نزل وشد السياره الثانيه وسحبها
عفتهم ورجعت للبيت شفت امي كاعده تسوي ريوك طماطه بالطاوه
اقتربت منها سلمت عليها وكعدت

ام عسل:هلا يمه حبيباتي

عسل:مامه ميتتته جوع صبي بسرعه

ضحكت وصبت جابت القوري خلته ع الصوبه كعدنه اكلنه صبت چاي وشربت غسلت ورجعت يمها

عسل :يلا ماما اني طالعه

ام عسل: وين ؟؟!!!

عسل:للشغل غير

تغيرت نضراته لقهر وعصبيه خزرتني وكالت

ام عسل:اني شكتلج يمه مو كلت لا تشتغلين ليش تعاندين لتخبليني

انقهرت كلش ردت ابچي بس صرت قويه وكلت

عسل :لا يمه اني اشتغل وانتي كعدي

ام عسل : مااايكفي يمه مايكفي شلون نعيشش

عسل : انتي فلوسج كلها ننطيها الايجار البيت وفلوسي نسوك بيها اكل حتى اغراض هواي ماعدنـه يمه عوفيني لا تقهريني بربج

عفتها وطلعت ميته قهر امشي واني حابسه دموعي ومنزله راسي حتى لحد يشوفني ابجي رحت للسوك اول شي بعت الخضره كلها شفت الفلوس ماتكفي اجيب بيها مسواك رحت لمعمل انطوني كونيه ورحت للمكان اليذبون بي الزباله ضليت ادور شي زين واخذ ضل هيج حالي 11باليل خفت اكمل رحت على المعمل بعتهم عليه واخذت الفلوس

رجعت بنص اليل للبيت امشي واتلفت بخوف صح اكو زلم هواي بس اني طبعي كلش اخاف
وصلت للبيت فتحته ودخلت
ركضت عليه امي خايفه وهيه تصيح شبيج
هزيت راسي معنى ماكو شي وضحكت ابتسمت وراحت تكمل طبخ

اتريك واطلع لليل يلا ارجع كلشي ما اكل ومن ارجع امي تسوي اكل

كعدت يمها اكلت ورحت نمت ثاني يوم كعد الصبح بـ8:00 نفس الروتين نزلت الامي
اكلت وردت اطلع منعتني مثل العاده

ام عسل:حبيبتي عوفي الشغل

انقهرت كلش بچيت وجاوبتها
عسل : يمه عبالج اني فرحانه بهذا الشغل الهد حيلي احنه مجبورررين ماعدنه حل ثاني

حضنتني وكالت
ام عسل : كلما تطلعين احس بالذنب لان خليتج تروحين يمه انتي بنيه متكدرين من خوفي عليج هيج والله

ابتعدت عنها مسحت دموعي رفعت راسي
عسل: الله مينسه عباده اطمني

طلعت واني حيلي مهدود اتمنى ارجع لحضنها واضل ابجي واشكيلها

مثل العاده ضليت اشتغل جمعت هواي لحد مصار اليل رجعت امشي خطوات ثكيله واني شايله الكونيه حسيت بـ شخص وراي التفت بسرعه ماكو رجعت امشي واكول جاي اتخيل حسيت بشخص وراي هم التفت ماكو احد كملت طريقي وهم حسيت واحد يمشي وراي التفتت بخوف شفته يباوعلي بنضرات مرعبه يبتسم ويعض على شفته ولازم بيده بطل لونه ابيض اقترب شوي شوي استوعبت الجاي يصير ركضت بسرعه رغم الثقل الشايلته على كتفي الشارع الرأيسي كدامي بس عشر خطوات ركضت واحسه جاي يركض وراي ركضت واني اقره ايات منتبهت للسياره الكدامي وهيه تضرب هورن صرت كدامها بس خطوات بعيده وكفت فتحت عيوني وحمدت الله وشكرته اعتذرت من الشخص الصاعدها ضلمه مشفت وجهه وكملت طريقي للمعمل بعتهم ورجعت للبيت الفرع مابي احد ضلمه امشي بخوف وادعي اوصل بالسلامه كل يوم هذا حالي حسيت بسياره وراي التفتت شفت سياره كلشي ممبين منها ضلمه بس الاضويه الأماميه ركضت بسرعه للبيت دخلت بسرعه وطبكته حيل

ام عسل:اسم الله يمه اسم الله شكو

ابتسمت وعفتها صعدت لغرفتي وضليت ابجي وادعي

سمعت امي بالباب وهيه تصيح

ام عسل:يمه شكو تعاي اكلي بس اكلي حتى تحجيلي

فتحتلها الباب عيوني مورمات و شعرري كفشه حالتي كلش تعبانه يوم عن يوم جاي اضعف اكثر كعدت يمها وحجيتلها الصار واني ارجف وخايفه حضنتني وكالت وهيه تمسح دموعي

ام عسل:كافي حبيبتي بعد لا تشتغلين اني اشتغل

عسل:لااا ماما اني هم اشتغل بس اغير شغلي لغير شغل احسن

نزلت راسها وراحت ادري بيها متريد اشتغل بس شسوي مو بيدي

تسريع الاحداث

نفس الروتين ضليت بشغلي بس هم بديت ادور شغل ولا واحد قبل يشغلني حتى المولات ماقبلو يردون وحده مرتبه وحلوه حتى تجذب الزبائن ضليت ادور لحد مكليت شغل خدامه ببيت ناس معروفين كلهم شيوخ وافقت ورحت ثاني يوم سألت عليهم وصلت لبيتهم وسألتهم يردون خدامه طلعتلي مره جبيره بالعمر ابتسمت وكالتلي

ام اراي:اي يمه اي بس منو الراح تشتغل

ابتسمت بقهر ونزلت راسي وكتلها

عسل: اني

ابتسمت ورفعت راسي

ام اراي:ارفعي راسج يمه دامج مابايعه نفسج ارفعي راسج

ابتسمت وبست راسها ضحكت
ام اراي:يمه من باجر الصبح تعاي نتفاهم حتى تبدين شغل

سلمت عليها ورجعت للبيت اليوم من الصبح للعصر رحت بعته وضليت ادور شغل لليل يلا رجعت للبيت

ام عسل:هااا يمه لكيتي شغل جديد ؟

عسل: اي لكيت

ابتسمت بس من شافت ملامحي حزينه ضاجت نزلت راسها بقهر

ماكدرت الزم نفسي دموعي نزلت ماتهون عليه نفسي واني اشتغل وانذل نزلت راسي بقهر وكتلها

عسل: ليش احنه فقراء !!

ام عسل: هـذا الـ الله سبحانه كاتبـه النـه حمدي ربج وشكرين على هل حياة يمه اكو مايلكون بيت يعيشون بي

عسل: التعب اكلنه اكل بس اشوف بنات لابسات وعايشات حياتهن انقهر ليش اني مو مثلهم!

ام عسل: بـسـم الله الـرحـمن الرحـيم
{لَا يُكَلِّفُ اللَّهُ نَفْسًا إِلَّا وُسْعَهَا}

حضنتها وكعدنه ناكل كملت ورحت نمت من الصبح كعدت
8:00الصبح

هاي المره كلت اغير شوي ارتب نفسي حتى لا يضوجون مني لبست بنطرون عريض شوي وبـلوز بس مو عريض سويت شعري ضفيره وطلعت الامي ابتسمت من شافتني كعدت اكلت وطلعت للشغل
بالكوه يلا اتذكرت وين بيتهم دكيت الباب مره مرتين ثلاث ماكو انقهرت كلش كعدت بالباب وخليت ايدي على وجهي فجأ سمعت الباب انفتحت كمت بسرعه سلمت وكلت

عسل: وين خاله؟!!!!!

جاوبني بصوته الرجولي وهوه يدفع بيه
اراي: ولي من وجهيي متاخر خل اروح

انصدمت منه هذا شبي خبل يدفع بيه ويكول وخري حتى منطاني مجال اوخر المهم ابتعدت هوه راح واني ضليت رجعت ادك الباب لحد ما طلعلي المره

ام. اراي: تفضلي خاله

دخلت وراها ودتني للمطبخ اشرتلي على كرسي كعدت وهيه هم كعدت كبالي هيه تحجي واني بالي على البيت شكد نضيف وكبير مامنتبها الحجيها لحد ما كححت خفت بسرعه عليها كمت ادور بالمطبخ على ماي ابتسمت واشرتلي حتى اكعد

ام اراي:مابيه شي بس ردت اشوف رد فعلج

عسل: يا رد فعلي خاله صدوك تحجين غير احس قلبي وكف

ضحكت وبدت تحجيلي على تفاصيل البيت والشغل العليه

ام اراي: يمه شغلج بس المطبخ والديوان تنضفين
الباقي چنايني ينضفنه والغرف بس غرفتي مسموحلج تنضفيها غرف الشباب ممنوع انه انضفهم والحمامات هم انه انضفهم خوش يمه؟

باوعت الها بستغراب
عسل: خاله اني انضف الحمامات عادي

ابتسمت وبـ ابتسامتها حنين وامـان صدوك من كالو جيل الطيبين

ام اراي: لا يمـه مارضاها عليج انه انضفهم خوش

عسل: خوش

كملت كلامها

عسل: واذا على الفلوس انطيج 300هاي بس لانج شابه وصغيره حتى لا تتاذين

شكرتها وهيه هم راحت بس التفتت وكالت

ام اراي: من تكملين شغل ترجعين لبيتج وبيوم واحد اتباتين من ماكو الشباب يلا كملي شغلج حبيبه واي شي تحتاجي اني اساعدج بي

هزيت راسي اي وبديت اشتغل غسلت الموعين كلها مال عشيره ماشاء الله مشايفين شكد ياكلون وبديت انضف المطبخ دخلت عليه بنيه تمشي وتطك علج

كوثر: انتي مني؟

ابتسمت ورديت

عسل:اني العامله

ضحكت وباوعتلي من فوك لجوه

كوثر: الخدامه اها يلا سويلي چاي وصعدي لغرفتي بسرعه

ماضوجتني الصراحه لان توقعت الصراحه لازم اكو حيه بهذا البيت

عسل:ماشي

غميتها وهيه تمشي بس مشافتني صاح صوت وراي رجفني التفتت بسرعه واني ميته خوف
وارجف

......:............

يـتـبـع

صدمه وره صدمه راح توكع بطلتنه شلون ترجع تقوه وشوكت تنهار وتستسلم؟!

حسابي الانستا o.za.h