احبك ولكن هل ستحبنى عندما ترانى💫💑

الحلقه التالته عشر ...

امها .... تحشم على وجهك .. شن دوه هيا .. بنتى ومربيتها وعارفاتها مش متع دوه هيا .. اه شنى يابنتى ؟؟ شن رند عليهم ...
ياسمين .... الا انتم تشوفوه مناسب ديروه .. هيا منى دخلى صفرة شاهى وتعالى لدار ...
خشت ياسمين ودموع ينزلو منها لااارديا والوجه احمررررررر ولحقتها منى وعلامات الاستفهام كلها فوق راسها .. وخشو لدار وسكروها ...
منى .... خلاص معاش تبكى حبيبتى كل مشكله وليها حل .. صدقينى رح يتصل امير ونتفاهم معاه ونوصل معاه لحل بحيت انك ماتاخديش هالبنى ادم الا متقدملك توا ..
ياسمين ... انى لو نخطبت ليهم ناس هما والله ناخد حبوب وننتحر ونفتكى منها الحياه هيا ... << وبدت تبكى >> والله انى عيت .. لطالما نقول يارب عوضنى بنص حياتى تانى بشئ اجمل واحلى من الا عشته بس الباين انى بنصيم نصيم ونفطر على بصله ..
منى .. ووووووووه خيرك متشائمه انتى ؟؟ قتلك رح ينحل موضوع ...
ياسمين ... ماتقوليلش متشائمه ... ناس امى بترد عليهم ... وهوا مسكر تلفونه واكيد كارهنى ويحسابنى طامعه وفى فلوسه هدا علاش كدبت عليه ودرت معاه علاقه ...
منى .. انتى بديتى تخرطى ومعاش تعرفى شن تقولى .. لدا بالله عليك اهدى .. خليها على ربى .. لامتى يعنى بيقعد قافل تلفونه ... تلفونى يشرين ولايتهيألى ؟؟
ياسمين ... كأنا تلفونك صح لكن صوت بعيد ؟؟
منى .. حى عليا فوق طاوله خليته .. وامك وخوك مقعمزين غادى ...
ياسمين ... استنى نجيبهولك ونجى ...
مشت ياسمين تجرى لطاوله وجاباته <3 وخشت لدار بسرعه وسكرتها وقالتلها ..
ياسمين ... منى انى مش مصدقه .. ردى ردى بسرعه ..
منى ... منى ؟؟
ياسمين .... اهك .. امير ... ردى عليه بسرعه ...
منى .. اوك ... هاتى ... احم احم .. الوووو
امير .... << بصوت متعصب >> من معاى ؟؟
منى ... اهلين امير .. انى منى صاحبت ياسمين ..
امير ... اهلين منى شن اخبارك ...
منى ... الحمد لله .. اكيد انت توا تسأل علاش انى متصله بيك وعندك هلبه اسئله فى بالك .. بس انى نبى نقولك شى واحد ... ياسمين ماكانتش قاصد تكدب عليك ... ولاكان قصدها تحطك فى موقف زى زفت مع صاحبك .. وهيا مش طالبه منك الا تسامحها بس ...
امير .... نقدر نكلمها او كيف توصلينى ليها ؟؟
منى ... هيا فى جنبى توا بس والله مش عارفه لو هيا تقدر تكلمك او لا حاليا لانا نفسيتها زى زفت
امير .. علاش ؟؟
منى .. الناس الا تقدمولها اتصلو اليوم واعطوهم موافقه اهلها ..
امير ... اها ... اوك قولها امير يبى يكلمك وبدون نقاش عطيها تلفون ..
منى .. اوك ..
عطت منى لياسمين تلفون .. وياسمين تبكى بس ..
امير .... الوووو
ياسمين ...<< تبكى بس >>
امير ... انى قوتلك مانحبش اى بنت تبكى قدامى .. امسحى دموعك وردى عليا ..
ياسمين ... << مع دموع >> نعم
امير ... علاش تبكى ؟؟
ياسمين .. لانى دخلتك فى مشاكل انت فى غنى عنها .. وحطيتك فى موقف زى زفت ..
امير .... باهى امسحى دموعك وبطلى تأنبى ظميرك .. لانى كنت عارف انك اخت احمد ..
ياسمين .. <<مصدومه >> بجددددد
امير ... هههههه هل تتوقعى انى عبيط لدرجة انى نكمل مع بنت ونرد عليها ونوصل معاها للاخير بدون مانعرف من هيا ؟؟
ياسمين .. كيف عرفت ؟؟
امير ... مش ظرورى تعرفى .. مهم انى عارف من نكلم وخلاص .. وكنت حاب انتى تصارحينى بس .. بس يالله .. انتى او احمد واحد ماتفرقش مهم واحد منكم صارحنى ههههههه
ياسمين ... شن تقصد ؟؟ انى تشوف فيا احمد ؟؟
امير ... ههههههههه لا والله لا ... نبصر بس ... بس نبى نقولك شى ... ماتضايقيش روحك ... الشخص الا متقدملك مش رح تاخديه وانتى ماتبيشى ..
ياسمين ... انت ماتعرفش خوى ... امى اصلا خلاص اعطت موافقه ..
امير ... اى بس مش لما نقوله انى بكرا رح نجيب اهلى ...
ياسمين ... << مصدومه >> تجيب اهلك ؟؟ على اى اساس ... احنا مافى بينا شى ؟؟ انت انعجبت بيا ؟؟ او قدرت نملك قلبك ؟؟
امير ... شوفى انى ممكن لاهدا ولاداك .. بس انى مرتاحلك ... وانى راجل .. مانورطش بنت معاى ونهرب .. ومش رح نكون سبب فى تعاسة حد معاى ..
ياسمين ... اه قصدك من باب شفقه يعنى ؟؟
امير ... ياسمين ... انى ماقولتلكش هكى .. لكن انتى تعرفى انى شن نبى ... وانتى عارفه انك تقدرى تملكى قلبى وتملكينى بس بااردتك انتى ..
ياسمين ... يعنى كيف ؟؟
امير ... يعنى انى رح ندير انى وياك اتفاقيه ...
ياسمين ... انت تدوى بجد ولا مهبول ؟؟ شن تشوف فيا انى قردل زيتون وتساوم فيه ..
امير ... ياسمين .. انى انسان صريح وفى نفس الوقت راجل .. ومانحبش لالف ولادوران ... يعنى ... انى رح نتقدملك ونعطو لنفسنا فرصه سنه .. لو قدرنا نتفاهمو مع بعض وحبينا بعض وضعفتى ... ووصلنا لمرحله نقدرو نكملو فيها باقى عمرنا مع بعض تمام ... ولو انك قررتى انك بتضحى بعمرك وصحتك وبيا انى فداء انك تقعدى فى نفس نقطه .. فاكل واحد يشوف حياته .. وان شالله تلقى ولد الحلال الا يسعدك ...
ياسمين ... انى مش موافقه انك تكلمنى بطريقه مبتدله هيا .... وانى مشاعرى وحياتى مش مسار انت تقدر تحدده بشكل الا يعجبك او لا ... وعلى عموم انى ماطلبتش منك انك تحلى مشكلتى ولا تعمل فيها رامبو عليا ماشى .. واهم شى تكون فهمت الا صار من غير ماتاخد منى اى موقف سئ ... اما مشاكلى فانحلها بنفسى وشكرا جدا على مشاركه والعطف والاحسان الا قدمتهم ..
امير ... ياسمين اسمعينى
ياسمين .. مانبيش نسمع شى .. ومانبيش نسمع صوتك ارجوك مره تانيه وان شالله معرفة خير .. سلاام ..
سكرت ياسمين تلفون وغمرة منى وبدت تبكى من قلبها ... .. وهنا منى طبتتتها وقالتلها ...
منى .. معاش تبكى ونبيك تسمعنى ... انتى مازال ماخسرتى امير ... وهوا صدقينى لو انه مابداش يتعلق بيك ومعجب بيك .. ماكانش توا كلمك ... صدقينى هوا بس يبيك تتغيرى شوى على خاطره .. ومش عيب او غلط لو انك درتى شى هوا .. لانا هالشى فى صالحك قبل صالحكم ... وشوفينى انى اول مابدت نكلم فى مقدام ... كيف طلب منى هلبه حاجات نغيرها فى طبعى وحاولت انى نغيرها ونجحت .. واولها عصبيتى .... يعنى الانسان مش عيب لو تغير من اجل شخص الا يحبه .. واظنى حبك لامير يستاهل انك تغيرى نفسك على خاطره ..
ياسمين ... انى رفضته لانى خايفه ... خايفه نحبه اكتر ونزيد نتعلق بيه اكتر وفى الاخير نخسره باايدى لانى مش واتقه من نفسى ...
منى ... صدقينى هدا اكبر اختبار لنفسك .. وصدقينى فى المقابل رح تشوفى من امير هلبه تضحيات اكيد .... فالدلك خلينى نكلمه توا ونقوله انى قنعتها وهيا موافقه .. وخليه يجيب اماليه ويخطبك ... وصدقينى بعدها رح تنحل كل مشاكلك وانى رح نوقف معاك وتضعفى ....
ياسمين ... << مسحت دموعها وقالتلها >> ... اوووك
اتصلت منى بى امير واول مافتح الخط قالتله
منى ... الو ..
امير ...ايوااا
منى ... انى منى صاحبت ياسمين ...
امير ... اهلين منى .... ان شالله توا اهدت ياسمين ...
منى ....اى وهيا حابه تتكلم معاك وتقولك كلمه ...
وهنا ياسمين شبحت لمنى شوى وبعدين خدت تلفون و قالتله ...
ياسمين ... الو
امير .... ان شالله هديتى توا ... سامحينى لو مبكرى كلمتك بطريقه حسيتى انها جرحاتك ... بس انى صريح والباين انى كنت معاك صريح اكتر من لازم ..
ياسمين ... ولا يهمك انت اكيد عندك الحق ..
امير ... .... انتى موافقه ؟؟
ياسمين << مع تنهيده >>ايه انى موافقه .. خلاص توا بنسكر ..
امير ... كيف نقدر نوصلك ؟؟
ياسمين ... مش عارفه ... احمد خدى من تلفون ... ومستحيل رح نرجع نخدم باش تشوفنى
امير ... بعون الله رح ينتهى الموضوع هوا فى اقرب وقت .. اعطينى يومين او تلاته بس ...
ياسمين .. خود راحتك .. انت مش مضطر لى شى ...
امير ... خلاص انى قوتلك موضوع هوا احنا الاتنين مسؤلين عليه ورح نتحملو مسؤليه احنا الاتنين وانى راجل ومش رح نسيبك تواجهى اهلك بروجك ...
ياسمين ... شكرا هلبه .. بجد ماعنديش شن نقولك اكتر من هكى..
امير ...ماتقولى شى ...
ياسمين .. اوك خلاص نخليك توا ..
امير ... اوك ..
ياسمين ... سلام ..
امير ... سلام
سكرت ياسمين تلفون وقلبها كله متحطم ومتحشمه من نفسها ومن الموقف الا حطت تفسها فيه ... وماكانتش عندها اى كلام تقدر تقوله لامير .. اقلها فى اللحظات هيا ... واول ماسكرت تلفون .. مافاتتش خمسه دقايق لين اب منى جاها وروح بيها .. وياسمين سقدتها وخشت لدارها وطفت ضى وتكت فى فراشها وقعدت تفكروتفكر لحد مانعسها نوم ورقدت

.. بينما امير .. سكر من ياسمين .. وحط تلفونه فى جيب سرواله وخش للصاله ... وقعمز جنب امه على كنبه وقاللها ..
امير ... يوقعمز جنب امه على كنبه وقاللها ..
امير ... ياما نقصى تلفزيون شوى نبى نفتح معاك موضوع ... ..
امه ... شن فى .. ان شالله خير ..
امير .. خير ان شالله .. انتى مش من قبل تقوليلى امتى بتخطب وامتى بنفرح بيك وبنديرلك بيان ؟؟
امه ... اها وان شالله حطيب عقلك فى راسك وتبت على فى راسى بس ..
امير ... شن تقصدى ؟؟
امه .... شنى من تقصدى .. انت عارف وانى عارفه ... انا بنت خالتك تموت فى الارض الا تمشى عليها .. ومش ناقصها شى .. وانتم متسمين لبعضكم من وانتم صغار ... والبنت مال وجمال وشكل تبارك الرحمان زى بنبله ... وجسمها ينضرب بيه متل ... وكله كوم واخلاقها وحشمتها وادبها كوم .. والله والله ماتمنيت بنيه تكون ليك قدها ..
امير .... اووووووف .. ياما تناقشنا فيه موضوع هوا من قبل وقتلك بنت خالتى نشوف فيها زى اختى ومانبيهاش .. ومش هيا بنت الا نحلم نكمل معاها حياتى ..
امه ... اها ... توا طلعتلك كخه وماتنفعش ... مالا من هيا ان شالله بنت حسب ونسب الا عينك طاحت عليها ... اهو من توا نقولك ... والله لو مااقتنعتش بيها وملت عينى .. مانخليك تاخدها ..ايوااااا اما نصيم نصيم ونفطر على بصله لا ..
امير ... ياما خلااااااص ... بنت نبيها ... وعاجبتنى .. والقرار الاول والاخير ليا انى ...
امه ... من هيا هادى ؟؟ ومنين تعرفها ؟؟ وامتى صار هدا بس ؟؟ تى انى مالياش شهرين كيف فتحت معاك موضوع وقتلى مافى بنت فى حياتى ... توا طلعت حتى فى وحده وتبيها ...
امير .... امىىىىىى بالله عليك بدون تحقيق ... انى كل الا طالبه منك تمشى تتعرفى على اهلها وتتقدميلها ...
امه .... هكى طب زن ؟؟ بدون حتى ماتسأل عليها ؟؟؟ ولا على عيلتها ؟؟
امير .... هيا اخت صاحبى ... وصاحبى هدا نعرف عيلته لانا انى وياه عشرة سنين مش امس ولا اليوم ..
امه ..... خلاص كلم بوك ويومن عاش ...
امير .... بوى بكرا بنكلمه ... وبعد بكرا بنرفعك ليهم وتتقدميلها ..
امه ... على شن مستعجل ؟؟ شن فى ؟؟ فى شى بينك وبين بنت غلط يخليك مستعجل هكى ؟؟
امير ... تى شن تقولى انتى ... امى بالله عليك ... ريحينى واعطينى موافقه بس ..
امه .... كان بوك اعطاك موافقه ... نمشى والله غالب ... بس حط فى بالك انى مش رح نمشى صوره بس يعنى رح يكون ليا رأى فى هالموضوع بعد مانروح منهم ونشوفها ونشوف العيله ...
امير ... يصير خير ... بوى وين هوا ؟؟
امه ... بوك يصلى وبيرقد ... بكرا كلمه واحكيلى على بنت الا ناوى تخطبها لانى مش ناويه نمشى زى الاطرش فى زفه وتوا خلاص .. هيا تصبح على خير ...وطفى تلفزيون بعد ماتكمل سهريتك ..
امير ... حتى انى بنرقد ... تصبحى على خير
خش امير لداره وسكرها ... وقعد يفكر شوى وبعدين رقد ...
وفاتت الليله على ياسمين وامير وكانت المشاعر الا فى قلوبهم غريبه جداااااا .. وكل واحد فيهم حس انه تأئه ومافاقوش بى الا صار الا بعد ماصار ولقو نفسهم فى وسط اللعبه ...
ياسمين .... صباح الخير ماما ...
امها ... صباح الخير ... حطى الشاهى على نار لبين مانوضت خوك يجيب الخبزه ..
ياسمين .... شنى اليوم ماعندكش مدرسه ؟؟
امها .... سلامة راسك والا واخد عقلك يتهنى ... اليوم جمعه ..
ياسمين ... اه والله نسيت مره وحده ... اوك خلاص ... نقلى دحى ؟؟
امها .... اى وديري وحده عيون لخوك ...
ياسمين .... اوووك
وتتت ياسمين الفطور وقعمزة هيا وخوها وامها على صفره يفطرو ... وهنا ياسمين قالت لامها ...
ياسمين .... ماما معليشى بكرا نرجع لخدمتى ؟؟
امها .... اى عادى برى بنتى .. مهم انى رح نكلمهم ناس ونعطيهم موعد يوم الخميس الجاى ..
احمد .... لا مافيش مشى ....
امه ..... علاش ؟؟
احمد .... هكى مافيش ماشى وخلاص ...
وهنا ياسمين زغللو عيونها بالبكى وشبحت لخوها شبحه وحطت السندوتش من ايدها وناضت وسيبت الفطور ...
وفشت غلها فى الظمان والدموع

..... فاتت ساعه ورا ساعه .. وياسمين ظمت الحوش وسيقت جنان وظمت المربوعه وطيبو الغدا وتغدو ووبعدا ماتغدو وياسمين كيف بدت تغسل فى معاين .... امها قالتلها ...
امها .... اسمعى ... بعد ماتكملى المعايين وتى روحك ..
ياسمين ... علاش ؟؟
امها ... ماششين لحوش خالتك ...
ياسمين ... ماعنديش نيه نمشى ... وانتى تعرفى ..
امها ... خلاص اقعدى مالا فى الحوش ...
ياسمين .... حطينى فى حوش منى امى نبى ونبى ... ماعندى مابندير فى الحوش ..
امها ... ماشى ماشى غير كملى ووتى روحك ..
كملت ياسمين غسل معاين الغدى ... وبخرت الحوش وخدت تلفون امها وكلمت منى وقالتلها بنجيك ... وبعدين خشت لبست حوايجها وطلعو ...
واول ماوصلت ياسمين لمنى ودخلتها ... ياسمين قالت لمنى ...
ياسمين ... كلمك امير ؟؟
منى ... لا لا مسرع استاحشتيه ياوووووخيتى ياوخيتى عليك هههههه
ياسمين .... انى وين وانتى وين ... مش حكاية استيحاش بس انى نخنقت من توا ... تصورى احمد اليوم بصحت وجه قالى مافيش مشى للخدمه بعد ما امى وافقت ...
منى ...هوا بينى وبينك عنده الحق .. قصدى ماليشى يومين كيف شادك مع صاحبه والا هوا نفسه ولد مدير الشركه الا تخدمى فيها ... تى انتى كيف حتى تجرأتى تتطلبى ترجعى توا ههههه  <3
ياسمين .. انتى خيرك .. بدل ماتهونى عليا تزيدينى ؟؟
منى ... ياسمين .. خليك واقعيه .. واصبرى شوى اقلها لين يجى امير ويتقدملك بشكل رسمى ...
ياسمين .. يارررب ان شالله ينتهى هالوقت فى اسرع وقت <3
منى ... انى كيف بنتغدا .. تتغدى معاى ؟؟
ياسمين ... شن غداكم ؟؟
منى .. ماما مدايره بيتزا ودجاج محمر وبطاطه مقليه وسلاطه مشويه ومشروب
ياسمين .. مرض جوعتينى ههههههه لا لا فكينى مش ناقصنى .. انى اليوم دروحنى ماشيه فى ريجيم صح ..
منى .... باهى مالا خلى نمشى نتغدى وانتى تعالى معاى فى مطبخ وديرلنا شاهى ...
ياسمين .... هههههههه مصحك بنجى ناكل معاك والقلب الا تقلب ... ماليك فى الحوش ؟؟
منى ... لا لا مشو لحوش جدى اليوم .... قال بتضعف صار ... هههههههههه
خشت ياسمين للمطبخ مع منى ... وسخنو الغدى وحطوه على طاوله وبدو ينقرشو ويهدرزو وفى اللحظه هيا وصلت رساله لمنى تقول
امير ... <<منى ياريت تقولى لياسمين .. انى كلمت امس اهلى وبكرا بعون الله بنجيب امى باش تجى وتتعرف عليكم .. وانى كلمت احمد وقتله ووافق >>
ياسمين .. شن فى ؟؟ خيرك تبلقى فى رساله هكى ؟؟
منى .. يااااااااااااااااااااااااااااااه <3 <3 <3 واخيرااااااا <3 شوووفى امير شن بعتلى توا ياغبيه <3
ياسمين ... هاتى ترا ...
قرت ياسمين رساله .. وماكانتش مصدقه انا امير بيوقف معاها وقفة رجاله بشكل هوا ..
ياسمين ... <<مع دموع تعبر على الفرحه>> انى مش مصدقه بجد انا امير بيتسمى خطيبى وبيكون ليا وبنلبس شى يخصه فى ايدى .. عمرى ماحلمت انى نرتبط بواحد زى امير حتى فى خيالى ..
منى .. معاش تبكى يامهبوله .. هدا لانا ربى يحبك ويشوف فيك ... وعارف انك طيبه وتستاهلى كل خير <3 بس اهم شى تحافظى عليه وتكسبيه وتملكى قلبه <3
ياسمين ... يارررررب ♥تصورى بعد الخبر هوا انسدت نيتى حتى من الاكل ...
منى ... ههههههههه <3 شن بتلبسى بكرا ؟؟
ياسمين ... مش عارفه ... ونبى امه تنعجب بيا ...
منى ... اسمعى عندى قفطان ممكن يجيك لانى انى خديته وجانى واسع هلبه .. وهوا قماشه بيزو ... وموديله جيهة رقبه دائرى بس دائرته كبيره يعنى على كتاف ومزبوط لصدر وبعدها قلوش لحد ركبه .. ولونه اسود
ياسمين ... تسلمى منو هلبببببببه <3 والله نحبك هلببببببه <3
منى .. مافيش بيناتنا شكرا نوووضى ترا ديرى بروفا عليه .. وعندى ليك توكه بسيطه وتهببببل عليه ..
ياسمين .... اوووووك وين حاطيتيه انتى ؟؟
منى ... انى بناكل لانى جعانه .. برى انتى وتلقيه فى رف تانى من شكماجه مطبق ومحطوط فى شكاره بيضه ...
ياسمين .. اوووووك <3
قاست ياسمين القفطان وطلع حلو عليها .... وحطاته فى شنطتها هوا وتوكه الا ركبتهالها منى .... وغسلو معايين ودارو طاسة شاهى والتهو فى حديت على بكرا وشن بيصير ... وياسمين كانت خايفه من مقابلة امه اكتر مما كانت تتواقع لانا كانت رسمتلها صوره فى خيالها مش بعيده على اى صورة ترسمها بنوته لام حبيبها مستقبلى ... بس هل هالصوره الا رسمتها ياسمين رح تشبه لصوره ام امير الحقيقيه ؟؟؟
يتبع..

استنونا في الحلقه الرابعه عشر🤚🏻🙈