احبك ولكن ... هل ستحبنى عندما ترانى  💫💑

الحلقه التانيه عشر..

خدى احمد تلفون ونار راكبه فيه وشيطاين فوق راسه وخش بيه لداره .. وياسمين خشت لدار تبكى وتنوح وتنوض فى منى ...
ياسمين .... اااااااااه ياهمى انى اااااااه نووووضى انتى ياكتلة الهم ..
منى .. خيرررررك بابا جى ؟؟ خيرك شن فى ؟؟ ساعه كم ؟؟
ياسمين ... وووووه عليا قلبى بيطيح خلاص .. بنمووووت .. حى عليا شن درت فى عمرى انى بس ... يعطينى سم يعطينى بكشه .. شن طلعنى انى بس ..
منى .. تى شن فى يابلوه طيحتلى قلبببببببببى شن فى ؟؟
ياسمين ... مش قادره نقول شى .. نار نار راكبه فيا .. كانا مامتش معاش نمووووووت خلاص ..
منى .... شنننننننننننننننننننننننننن فى ؟؟
ياسمين ... احمد خدى منى نقال تواااا
منى .. كيف خدى تلفون ؟؟ خش هنا قصدك ؟؟
ياسمين ... لا لا ياهمى انى .. ااااااااااااااااااااه
منى .... بطلى بكى وفاهمينى شن فى ؟؟
ياسمين ... اعطينى تلفونك بسرعه بنكلم امير بسررررعه ..
منى .. هااااااك ..
ياسمين .... 0925......... حى عليا حى انتظار .. يتكلمو اكيييييييد حى عليا انفضحت .. ياشماتة العدوان فيا .. ياشماته بنت خالتى فيا ... يانهارى الاسود انى ..
منى ... والله نطربقك كف .. سكرى فمك وقوليلى شن وانتى خليتنى زى مهبوله معاك .. شن فى ؟؟
ياسمين ... اووووك اووووك .. كنت نهدرز انى وامير .. زى ماخليتينا مااااشى .. مش قادره نتدكرررررر حىىىىىىى عليا حىىىىىى
منى ... كملللللللللللللللللى وياسر خلى نقدر نساعدك ..
ياسمين .. باه باه ... شوفى لما لقيتك رقدتى .. قولت خلى نسجلك المكالمه باش تنوضى صبح ونعاودو نسمعوها مع بعض ..
منى .. اااااااااااااااااااها
ياسمين ... كنت نهدرز انى وياه لا بيا لا عليا ... لحد ماسالنى سؤال تزرطت منه ومعاش عرفت شن نقوله ...
منى .. شن هوا ؟؟
ياسمين ... قالى انتى تعرفينى ؟؟
منى .. كووووووويس كممممملت ... باه كملى ..
ياسمين .. مش درت روحى فالحه وقتله الفجر يأادن خلى يكمل ونمشى نشرب ونجى .. على اساس بنفكر شن بنقوله لانى معاش عرفت شن نرد عليه وفجانى بسؤاله ..
منى ..... ببببباه كمممممملى ..
ياسمين .. مش هوا قالى طلعى تلفون معاك وانى طلعته .. لانى ماتوقعتش انا شيطان الا فى دار مازال مارقدش ... مهم شورا لما تقربعت رجلى فى الطاوله حس بحركه فى مطبخ وكبه ... ولقانى انى نكلم فى امير ..اااااااااااااااااه وكبس عليا فى لحظتها وماخلنيش حتى ناخد نفسى ..
منى .. ماتقوليلش تسجيل مفتوح والخط مفتوووح ؟؟
ياسمين .. اى اى مفتووووووووح ياهمى مفتوح .. ورسائل والهم الا بعتهولملى فى الليل
منى ... تى والله والله ماتستاهلى الا طريحه ياغبيه انتى .. انتى غبيه .. فى حد يطلع بنقال براااااااا ...
ياسمين .. مش عارفه والله مش عارفه << وبدت فى البكى ولطم >> باهى قوليلى شن ندير توا .. مافيش الا حل واحد .. ناخد كمشه حبوب ونسيخ ..
منى .. مهبببببوله انتى ؟؟
ياسمين ... انى انتهيت خلااااااص ... احمد هوا كان الفرصه الوحيده باش امى ترجعنى للخدمه .. وامير بيعرف انى كدبت عليه .. احمد بينصدم لما يلاقانى انى وصاحبه نتكلمو ورح يفهم الموضوع غلط بدات لو سمع تسجيل ... قووووووووليلى شن ندير ... حتى كلمت امير لقيته انتظار .. شكلهم يتكلمو ..
منى ... اسمعى هاتيلى وشاحى وتعالى نتسنطو على داره ونعرفو شن يقول بسرررعه ... بس امك هل تنوض توا ؟؟
ياسمين ... لا لا اليوم عندها حصص من 11 لحد 1 ظهر ..
منى .. اوووك تعالى ...
مشت منى وياسمين على اساس ياسمين بتوصل منى للحمام الا لاصق فى دار احمد .. هدا فى حالة كبس عليهم .. ووقفو جنب الباب وقعدو يسمعو ...
احمد .... تى يااارجل شن تقوول انت .. تى اختى هيا هيا اختى ... تى معقوله مالقيتش الا اختى وتقولى مافى بينا الا كل خير .. تبيها تعال طق على الباب راجل لراجل ...
امير .... ياراجل افهم عليا ... تى والله احنا مالينا سنين باش تقول انت هكى ... خيررررك يااحمد .. توا معقوله انى بنضحك على اختك ...
احمد .... ماتخلنيش نغلط فييييييييييك .. تى شن تقووووول انت ... تى شنى تبى لين طووووط باش تجى للباب .. تى وين تحساب روحك .. ولا كانا عشت فى بريطانيا معانها خلاص معاش بديت تفرق ؟؟
امير ... ماشى خلاص انت الا تقول عليه ماشى ...
احمد .... شوف انت فى كلتا الاحوال خسرتنى بجد .. لانى امنتك واعتبرتك خوى ودخلتك لحوشنا واعطيت فيك تقه وانت ماكنتش قدها .. ولدلك انت الا تشوفه مناسب ديره .. وتافهم مش معاك تفاهم مع اختى بس .. تى والله ياحيف على رجوله الا هكى ..
امير .... احمد .. اسمعنى اسمعنى ... انى مستعد نجيب اهلى ونتقدملها رسمى بس اعطينى اسبوع بس بس .. ووالله الامانكون معاك راجل للاخير ..
احمد ... امير ... وراس الغزوز خلاص رانى بجد واصلتلى منك حدها ولو مش عيب رانى قولتلك كلام ماسمعتاش قبل من حد ... ولا انت تشوفه مناسب ديره << وسكر تلفون >>
سكر احمد تلفون ... وقعد يقلب فى تلفون لين وصل فى تسجيل وسمعه وقرى الرسائل .... وياسمين ومنى خشو يجرو لدار بسرعه سكرو على روحهم ... وهنا منى قالتلها ..
منى ... حى عليك ... اول مره خوك نشوفه هكى ...
ياسمين .. ونبى ماتزيديش تركبى فيا نار ... << ورجعت تبكى >> وبعدين قالتلها ... هاتى نكلمه شوى من نقالك ..
منى .. هااااك ..
ياسمين ... 092 ......... رقمه مقفل .. حى علياااااا شن بندير ...
منى .... هاتى نبعتله رساله .. واكيد لما يفتح يكلمنى ...
ياسمين ... اوك .. قوليله انى صاحبة ياسمين ... واول ماتشوف رساله كلمنى ظروروى ..
منى .. اوووك ...
بعتت منى لااامير رساله ... ويعدها قعدت مقعمزه جنب ياسمين وتطمن فيها وتغيرلها فى جوها ...
منى .. خلااااص بطلى بكى . مالا شن ياحبيتى تحسابى لقمه تجى بساهل ... وبعدين مفروض كانه راجل توا يجى ويتقدمك وبعد الخطوبه تقدرو تفسخو لو ماتفهمتوش ..
ياسمين ... انتى مش فاهمه يامنى .. اول شى على اساس بيتقدملى وماليناش فتره كيف متعرفين على بعض .. وتانى شى كيف بيتقدملى ويوتق فيا بعد ماعرف انى كدبت عليه ... وبعدين كيف بيتقدملى وهوا عارف انى سمينه .. انى خلااااااص ..
منى .... لو هوا طلع مش راجل وماتحملش مسؤاليه معاك معانها هدا مايستاهل انا يكون ليك ..
ياسمين .. تى بالله خلينى .. شن تحسابيه مهبول .. بيسيب البنات كلهم وبيجى يخطبنى .. تى منى انى اساس باش يخاف عليا من طريح او حتى نولع بقاز وسخ ... والله حياه استغفر الله وخلاص .. نصيبى فى دنيا قليل .. لا رشاقه ولاخدمه ولاحب وفلوس .. ولااب يوقف معاى والااى شى فى دنيا .. عايشه على هامش وخلاص
منى .. معاش تقولى هكى .. مالا انى شنى ؟؟ مش ديما تقوليلى انتى اختى تانيه الا ماجبتهاش امى ..
ياسمين .. حتى انتى توا تتزوجى وتتخلى عليا ونقعد بروحى ..
منى .. خززى عليك معاش تبكى وعاش تقولى هكى .. وعد منى كانا تزوجت مقدام نقوله ياخدك ضره معاى ونعيشو فى نفس الحوش زى الخوت .. ونتامرو عليه وقت الحق زى ريه وسكينه هههههههه
ياسمين << قعدت تبكى وتضحك وقالتلها >> منى انى نحبك هلببببه <3 انتى اكتر شخص نحبه فى دنيا هيا <3
منى .. حتى انى ياغبيه مالا علاش كل طنجره مشاكل تلقينى نداعك فيها معاك هههههههه <3 الله غالب الا وحلت فيه تدبرله ..
ياسمين ... باهى شن الحل فى بلوه الا داخل ...
منى .. ههههههه عندى ليك خطه .. انى نخش لدار على اساس بنسحره بجمالى ونديرو الجو وانتى اضربيه على دماغه ببلكه باهيه .. باش يقفد داكره الاخيره ههههههههه وهكى نحل موضوع <3
ياسمين .. هههههههه مبردك والله ماخاطرى نضحك .. ساعه كم توا ؟؟
منى ... ساعه 9 صبح .. وشكلها امك ناضت وتوتى فى فطور .. ريحة شاهى ودحى شميتهم من هنا ..
ياسمين .. خلى نوض نطقس على الاحوال .. ونشوف احمد شن جوه .. اسمعى باينه باكيه ؟؟
منى .. اى شوى .. برى اغلسى وجهك . وكانا سألتك قوليلها من نوم وامس سهرنا نهدرزو .. .. خلاص برى وشوفيلى الحمام .. خلينى نضم الفرشات ونفتح روشن ..
ياسمين .. اوك شوى ونضبح عليك .. بس بنسالك .. تقولى امير بيساعدنى ولا بيتجاهل الا صار ؟؟
منى .. هدا يعتمد على رجولته .. لانا رجوله موقف وافعال مش كلام فى ميه وخلاص .. . خلاص برى برى شوفى امك توا ..
ياسمين ... منى بالله عليك نبى نطلب منك طلب ... بالله عليك اقعدى اليوم عندى وكلمى بوك يجيك فى الليل .. انى اليوم اكتر يوم محتاجتك فيه ماتخلينيش بروحى ..
منى .. والله مانعرف .. هوا بابا نقدر نقنعه لكن عندى خوى لبزه مرات يعبيله راسه .. وبعدين انى نحس فى امك مقعمزه على قلبهامنى .. والله مانعرف .. هوا بابا نقدر نقنعه لكن عندى خوى لبزه مرات يعبيله راسه .. وبعدين انى نحس فى امك مقعمزه على قلبها ..
ياسمين .. فوتيها امى .. توا نتفاهم معاها انى .. كلمى بوك توا .. نبى نرجع تقوليلى انى بنقعد ..
منى .. باهى باهى غير شوفيلى الحمام يابلوه خلاااص انى بنموت هههههه
ياسمين .. ههههههههه مرض ان شالله
طلعت ياسمين للمطبخ .. ونادت على منى للحمام .. وبعدها قعمزو لى الفطور .. وواحمد ولا حركه ولا نفس .. واول ماامه لاحظت قالتله ..
امه .. احمد .. خيرك مش عوايدك ساكت ..
احمد ... لا لا مافى شى ..
امه .. باهى باهى .. اسمع انى اليوم خاطرى فى محشى .. بالله اطلع جيبلنا خضيره باهيه وشيشة مشروب ...
كملو الفطور ... وياسمين ومنى خشو للمطبخ وغسلو معاين .. ومابطلوش حكى على نفس الموضوع الا رح يكون موضوع ساعه الايام الجايه .. وامها ضمت الحوش وخشت ياسمين ومنى لدارها .. وهنا ياسمين قالتلها ..
ياسمين ... الحمد لله قدرتى تقنعى بوك وتقعدى .. والله لو قعدت اليوم بروحى رانى هبلت بالبكى ..
منى .. ههههههههه <3 واسكتى مااقنعته لين خلينى ونخليك .. وقالى مغرب نلاقاك واتيه ..
ياسمين .. باااه كويس اقلها بعد ماترروحى نخش نرقد طول ... بس شوفيته مبكرى ... اول مره نشوفه هكى .. قصدى ترشقى فيه موس ماتنزل منه قطرة دم ..
منى .. اى والله خفت منه حتى انى ... تى حتى قبل كان يباصلى فى عيون وحركات .. توا على فطور لما خدى سندوته وخدى طاسة شاهى تقول مافى حد قدامه ..
ياسمين ... حى عليااااا انى .. اول شى اكيد رح ننساه هوا الخدمه ... تى والله هالخدمه هيا منحوسه .. وماعندهاش نصيب فيا .. اصلا احسن افتكت منى .. شن بتدير بوجهى المنحوس ..
منى ... هههههههههه لا لا بعون الله خوك يبهدلك شوى وبعدين يحن عليك ويخليك تمشى للخدمه ويقولك اخر مره تعاوديها ...
ياسمين .. ويعطينى شكلاته مايسترو معاها .. مصحك انتى ... تى ماتعرفيشى احمد مالا ولا تسمعى بيه ..
فاتت ساعه ورا ساعه وياسمين ومنى مابطلوش حكى فى نفس الموضوع .. وقلبو موضوع يمين يسار .. شى ماليشى حل عقلانى .. .. والالعن من هكى انا امير مسكر
تلفونه وماباش يفتحه وهدا الا زاد خلى قلب ياسمين ينحرق اكتر .. لانه من قبل مانبهها انا لو بنت كدبت عليه مستحيل تشوف وجهه مهما كانت الاسباب ..
طلع احمد من الحوش مع صلاة ظهر وجاب لامه الخضره وبعدها قعمز فى داره وسكرها عليه ... والغريبه انه لاضبح عليها ولاكلمها ولا حتى بهدلها ... واحيانا يكون صمت قاتل اكتر من الكلام ... وياسمين .. كانت فى كل لحظه احمد مايناديش معاها ولايكلمها تموت بالعرق .. وكانت تتمنى بس ..
ياسمين .. تعرفى نتمنى توا ينادينى يفشخنى ويهزبنى ويكسر تلفون .. مهم مايقعدش ساكت هكى وبدون اى ردة فعل ..
منى .. هدا ياغبيه يستعمل فى الهجوم تكتيكى هههههه هدوء ماقبل العاصفه ..
ياسمين .. تتسهوكى .. تى وحق ربى حاسه قلبى بيوقف خلاص .. وشوى تانيه بنهجم على دار انى وبنخش ..
منى ... هههههه احرف منك والله غير نصبر فى روحى .. وحاسه نفسى انى خوى زبطنى مش انتى ..
ياسمين .. ترا عاودى اتصلى بداره تانى شوفيه فتح ولا لا .. نبى نعرف شن قاله بس ..
منى .. خلاص اتصلنا بيه وتلفونه مقفل .. فوتى موضوع .. وكانا مهتم توا لما يفتح تلفونه ويشوف مكالمات ورسائل توا يتصل .. وكان هدا طز فيه .. وياحوش بوى ماعليك عنوه ..
قعدت ياسمين تسحن وتسحن ومش فاهمه ولا قادره تستوعب الا صار برماته .. ومع ساعه 4 عشيه طلعت على اساس بتكبه على غدى الا على نار وتشوف احمد وين ... واول ماخطمت جنب داره لقات باب مفتوح وقعمز على مكتبه واخد تلفونها ويفتش فيه .. وهنا كان لقت ولت سبيدر مان ونزلت من السقف وخدت تلفونها ومعاها بونيتين على عيونه ورقت ... لانه مستخمخ ويفتش فيه من الفجر وولا على باله ..

نحط الغدى وياسمين خدت صفرتها هيا ومنى وخشو لدار وفرشو بوخشه وبدو ياكلو ويهدرزو ونص تهديرزهم ياسمين تغلى على احمد وعلى امير زفت الا مسكر تلفونه ومخلى جمل بما حمل .. وهنا ياسمين قالتلها ..
ياسمين .. توا معقوله مسكر تلفونه لحد توا ؟؟ علاش جو هوا ؟
منى .. ماتستبقيش الاحدات توا انتى تندرى على خوك شن قاله ؟؟
ياسمين .. باهى باهى نوضى خلى نغسلو معايين انى وياك وندلع امى شوى ونكسبها لصفى .. خاطر جاينى ايام اسود من قرن الخروب ..
منى ... هيا هيا .. قيمى صفره وانى نقيم بخشه ومترد الخبزه ..
قامو صفره وغسلو معايين الغدى .. ودارو طاسة شاهى وقعمزو فى جنان .. وكلمه من هنا وكلمه من هنا .. امها طلعت للجنان وتقول ..
امها ... الوووو ايوا .. هكى تمام . سامحينى ياوخيتى والله هالتغطيه حشاك المعفنه زى زفت وماسمعت منك كلمه ..
ام العريس ... لا لا عادى كنا من بعضنا .. والله انى لين نطلع رأسى من روشن .. مهم ... شن بنقولك .. الوليد امس قولناله كل شى .. وراهو البنت عجباته من خلال كلمنا .. واصر وألح تحددو موعد باش يديرو مقابله شرعيه مع بعض .. ووالله على قد ماقولتله يستنى حتى شوى .. بس هوا سكر دماغه ومستعجل ...
ام ياسمين ... والله شن بنقولك ياوخيتى الحوش حوشكم .. بس مادما هوا بيجى معانها هدا شور خوها الكبير .. خلى نشواره ونشوف بنت وبكرا بعون الله نرد عليكم ..
ام العريس .. ماشى ماشى .. خلاص نستنى منك فى اتصال وسلميلى على العويله وكنتنا ..
ام ياسمين .. هههههههه ان شالله يارب <3
ام العريس ... فى امان الله ..
ام ياسمين ... فى امان الله
ام ياسمين .... روووووووووووى <3 سمعتى ياياسمين ... والله العريس شكله فرحان بيك وطاير <3 عقبالك حتى انتى يابنيتى يامنى <3
منى ... << شبحت لياسمين الا ملامح وجهها استبلاه فى استبلاه وتشوف لامها ومصدومه .. وقالتلها ... ان شالله ان شالله خالتى ...
امها ... اه ياسمين شن رأيك ؟؟ ماسمعتنيش رأيك .. راهو العريس واهله يستنو فى موافقه منك ومن خوك باش يجو للمقابله شرعيه ..
وفى لحظه الا بدت تشبح فيها منى لامها زى سبنك ودموع ينزلو بروحهم .... طلع خوها من جنان وشبح لياسمين شبحه كره وغل وماخفيا كان اعظم ..دوبتها تدويب وقاللها ...
احمد ... شن بتقول يااما .. ماعندهاش شن بتقول .. كانا راجل شاريها وبيوافق على طلباتها فالبنت ماليها الا ستره .. الا كانش عندها واحد تانى فى حياتها وماتبيش تقول ...
امها .... تحشم على وجهك .. شن دوه هيا .. بنتى ومربيتها وعارفاتها مش متع دوه هيا .. اه شنى يابنتى ؟؟ شن رند عليهم ...
ياسمين .... الا انتم تشوفوه مناسب ديروه .. هيا منى دخلى صفرة شاهى وتعالى لدار ...
خشت ياسمين ودموع ينزلو منها لااارديا والوجه احمررررررر ولحقتها منى وعلامات الاستفهام كلها فوق راسها .. وخشو لدار وسكروها ...
يتبع..

استنونا في الحلقه التالته عشر 🤚🏻🙈

نبي دعممم