Sa paglakbay natin sa tinatawag na buhay

Minsan kanyang kahuluga'y di natin matanto ang kulay

Sa bigat kadalasan ng natatamong pasakit

Masisisi mo ba ang taong kalungkutan ang maukit

Pilit nating inaabot minsan ang kaalaman ng ulap

Ngunit kabiguan ang ating naaapuhap

Kailan mapupunan ang bawat bakit

Di masagutan kahit sa mundo ng panaginip

Bagamat kadalasan naghahari ang pagkahapis

Sana'y di ito maging dahilan upang maging literal na punyal itong lapis

Dahil dito sa mundo'y marami pa tayong di nakita

Baka bukas magningning ang bagay na hinahagilap ng mata

Pumikit minsa't alalahanin ang buhay ng ibang tao

Baka ang hinahanap nati'y nasa malapit lang, wala sa malayo  

O kaya'y samahan mo ako minsang damhin itong ihip ng hangin

Baka sakaling marinig natin ang kanyang boses na sa ating karamdama'y magpapagaling

2-2-2016

Mysterious_aries