Buhangin

Huwag mong hawakan ng mahigpit ang butil ng buhangin

Para sa huli ay manatili ito sayo at hindi kumawala

Huwag mong bigyan ng sobrang laya ang bawat hibla

Dahil sa dulo ay huhulagpos lamang ito sabay ng hangin

Minsan lamang magmahal ang isang katulad ko

At dahil rito ay may kakatwa akong takot

Sigurado ba akong ang taong nasa harap ko

Ay ang nagiisang pagkakataon ko sa mundong ito?

Tadhana raw ang dahilan para magtagpo tayong dalawa

Katulad ng mga piraso ng buhangin na inanod sa dalampasigan

Bawat butil ay may nakatadhanang makakadaupang palad

Dito sa malawak na mundong parang dagat

Siyam na minuto

Nahuli ako ng siyam na minuto

Parang buhangin na pinaglaruan ng hangin

Dinala sa kung saan saan

Binato sa langit

Binasa ng tubig

Hinagis sa hangin

Pinigilan ng tadhana itong pagtatagpo nating dalawa

Itong tadhana natin ay parang buhangin na huhulagpos sa sobrang higpit ng kapit

Tayong dalawa ay isang kwento na kahit kailan ay hindi matatapos

Isang kwentong hanggang gitna lamang

Isang kwentong sa huli ay hindi tayong dalawa

Isang buhangin na tuldok lamang sa buong dalampasigan

Walang halaga

Walang importansya

Walang magmamahal

Isang buhangin na tuldok lamang sa buong dalampasigan