E viuverschprächende afang

En übersetzig ids bärndütsche vor jinnis

"Soudat Chirco, zum rapport!"

"Zu befääl, komandant Horac. Mir hei dr primär perimeter abgesicheret. Das da usse isch e dichte dschungu. Aber bis itz sinis kener findleche läbensforme begägnet. Auerdings läbe i dere gägend e huufe iheimischi. Mir hei jeni viuverschprächendi exemplar igfange. Söue mer se zum verhöör bringe?"

"Affirmiere, soudat, witermache. Überfüeret se diräkt i di medizinischi zone. I dr zwüschezyt bieteni scho mau d'verhörschpezialischte n'uf.

* *

Bricht zu hande vom ruumkomandant, JK Horac, chef vo dr bodemission, 345.76 h – ta 870°896'65.

Hüt dr perimeter uf 500 km usgwitet, kener problem atroffe. Iheimischi läbesforme si abundant, u d'flora wucheret zu ungloubleche dimensione. Wenn si i vernünftigem raame usbütet wird, chönnti di koloni ds problem vo dr brönnschtoffversorgig für jartuusigi löse. Es würd nie me nötig, nach fossilem brönnstoff z'grabe.

D'founa isch primitiv, wenn o uf en erscht blick ufnahmefähig. Es chönnt sech vo dr physiognomie här gseh um üser entfernte vorfaare handle. Dä vergliich isch bi dr truppe uftoucht u het apriori zum widerufläbe ur verbreitig vonere aute science fiction gschicht gfüert. Dernah söue usserirdischi i prähistorischer zyt üse eiget planet heigsuecht ha.

Für dr usbreitig vo dere fäugleitete u überrissene fantasie gägez'ha, isch en ungersuechig igleitet worde. Ds medizinische corps u d'sicherheitsabteilig hei zämegspannet für jeni verueschsexemplar iizfah u intelligänzteschts dürezfüere. Ds resultat isch aber entüüschend gsi u veglicht se im beschte fau mit molluske. Outopsie hey trotz oberflächleche anatomische ähnlechkeite kener genetische verwandtschaftsbeziehige nachegwise.

Dr dokter Orci u di biologischi eqippe schaffe a dr klassifikation vo dr exotische founa. Är schlaat aus sowyt überzügendi theorii vor, das ähnlechi umwäutbedingige d'entwicklig vo läbe u ähnleche aapassigsforme begünschtige.

Dr dokter Arraco meint daderzue, das di hiesegi wäut nid vo katalytische effekte heig chönne profitiere, wi maasgäbleche klimaveränderige, rohstoffknappheit, nahrungsgrundlage u natürlechi ressource wo d'entwicklig vo intelektuelle kapazitäte begünschtige.

Für morn plane mer, d'aktionszone bis zude sandige äbenine u em einzelne bärg derhinger uszdehne. D'topografi vo däm planet isch dominiert vo aprubte teräveränderige: kantigi oberflächine näbe weiche oder erodierte landschafte. Das laat sech mit nüt la vergliche u mir wäre im momänt uf e chopf vor geologische eqippe agwise. Unglücklecherwiis het är dr hibernationsprozäss nid überläbt. Henusode, d'mission isch mit zügige schritte uf kurs, sit d'navigationsproblem glöst si. Mir chöi vo glück rede hei mer e landezone gfunge, nach üsem blindflug.

JK Horac, ändi vor übertragig.

* *

"Tommy, chum iche, ds z'nacht isch fertig!"

"Sofort, Mama! La mi nume no schnäu d'schtrass für miner soudatechäfer la fertig mache. I ha sogar en insektefaue boue, lueg!"

"Du schpiusch mit insekte? O mi guete gott! ... Poul, chum, der garte isch vou vo gruusige viicher, ameisi u termite. Bring mer ds insekteschprey!"