Khang thil zawng zawng thlen hnu atang khan kum 5 lai a liam ve ta. Hma lam ka pan ve zêl a. Tunah chuan a hmingin doctor ka lo ni ve ta reng mai, ka buai thei hle bawk. Mahse ka tum ber Delhi AIIMS ngei maia thawh chu tûn dinhmunah chuan ka la ti puitling thei chuang lova. Engpawh ni se ka chhungte pui theia ka awm tawh hrim hrim hi ka lawm a ni.

Ka thian hluite pawh ka hmu khât hle a, phone-ah erawh kan inbe âwl lova, a bikin Jeremy. School kan kal tâwp hnu thla rei vak lo khan Eric leh Hannah te an lo inngaihzawng reng tih kan hrechhuak a, Jeremy nen chuan kan lungawi lo dun hle bawk. 11 kan nih lai atang khan feelings an lo nei daih tawh tihte tlai khaw hnuah kan hrechhuak a, kan thin pawh a rim lo, kan nuih te lam a za zawk a. An lo inthup ve char char chu a ni sia.

Mahse inngaizawng ta chu kan lak atangin an hrang ta deuh a, la inkawm ho vek tho mah ila a hma angin a nuam tawh chiah lo a. Chuvang chuan Jeremy deuh chiah hi ka thian kawm tur neih ve chhun chu a ni mai a. Ngaihzawng kan ngaihsak lo dun bawk a, chuvang pawh chu a ni mahna kan inkawm ngeih êm êm ni.

Engpawh ni se, sawi tawh angin tûn thleng hian ngaihzawng tiha sawi tur ka la nei lo a, buaipui na hun ka nei lo chu thuhran, mipa hi ka hnaih ngam tawh lo a ni zâwk mah ang chu.

. ⪩⪨ .

Vawiin chu ka awm a nawm loh deuh vangin ka haw hma a. Ka room-ah chuan lûtin ka mu nghal a, mu paha ka inngaihtuah deuh vung vung lai chuan thil ngaihtuah chhuah ka nei ta tlat a, hun rei tak chhung ka ngaihtuah tawh lo a, ti nge ka hriatchhuah leh ziah le ti chungin ka lu ka dawn vung vung a. Jordan kha engtin nge a awm zel ang le? Hna te a nei ve tawh ngei anga tih chu ka ngaihtuahnaa rawn lang chu a ni a.
Hmuh leh ka châk thei êm êm a, mahse khang kum chhung khan reunion neih naah takngial pawh a rawn lang ngai lo a. Tuman a chanchin kan hre zui lo a ni. A thianpa ve ber John lah chuan engmah a sawi ngai loh vangin a chanchin han hriat zui vak ngaihna a awm lo a. Ka rilru erawhin ka hre zui reng thin.
Khawi hmunah pawh awm se, a ngaihtuahnaah vawi 1 tal chu ka lan ve tawh ngei ka beisei. A number ka nei lo a, ka hriat ve chhun a ig account lah a deactivate daih bawk si.

Hun a kal leh deuh a, damdawi inah chuan kan buai thei ve hle a. Ni khat chu kan senior pakhat U Francis-a chuan, doctor mipa, Delhi AIIMS-a thawk mêk, chawlh hmang tura Mizoram-a lo haw tur chu kar 2 chhung kan damdawi inah a rawn thawk dawn tih a sawi a, kan lawm tlang hle a, a bik takin keimah. Ka thawh châk êm êm na hmuna thawk a ni miau a, ka hmuh hma hauh atangin ka ngaisang nghal a ni.

A rawn thlen hun chuan AIIMS chungchang ka zawt nasa viau ang tih te-in ka ngaihtuah a, ka hlim ve hle a.

. ⪩⪨ .

Kan doctor thar rawn thlen ni chu a ni a, mak tak maiin ka nghâkhlel riau a, ka la hriat ngai loh a ni tih ka theihnghilh hman tep a ni.
Naupang pakhat chuan min lo ko a, "Doctor hmeltha, khi khi ka ban pha lo," ti chungin banga banner an tar 1 chu a lo ban tawk tawk a, lâksak tuma ka ban zuai lai chuan ka phone a rawn ri thut a, "Bawihte min lo nghâk lawk aw," tih pahin phone chu ka la a, ka kal sawn a.

Phone ka hmang zo ka va hawi lêt chuan nichina naupang min lo ko tu bulah chuan tlangval pakhat hi min hnung chhawn zawngin a lo ding a, poster chu a lo pawh thlâk sak tawh ni ngei tur a ni, naupang chu a nui ver ver a. Chupa chuan a lu chûl sak pahin a lo be siam siam a. An bul ka va thlen hmain naupang chuan, "Doctor hmeltha," ti chuan min lo au a, chupa chuan ka lam a rawn hawi ve nghal chiah bawk.

Ka mit ka la sawn thei lo, tuna ka thil hmuh mêk hi a tak tak a ni em?? Ka hmu sual chu a ni si lo, ka hmaa ding chu tlangval sâng leh hmeltha tak, smart bawk si, a sakhming Jordan tiha an koh ngei mai kha a ni.

"Victoria," kam khat lek mah ni se ka thinlungah a fiah êm êm a, chhân mai ngaihna ka hriat loh lai chuan, "I lo dam maw," tih pahin a bân chu min chibai turin a lo phar chhuak a, chibai ve nghalin, "Ka tha e," tih tê chuan ka chhang a.

"Hetah hian i thawk em ni?" tia min zawh leh hnu chuan, "Aww, chuan nang..." ka ti hman chiah chu, "Chawlh hmanga ka lo haw lai hian awm mai mai aiah hemi damdawi inah hian pui tur angin rawn thawh zawk ka tum a nih hi," nui sâng chuan a ti a. A awmzia chu AIIMS-a thawk an tih chu Jordan hi a ni tihna a nih tâk ber chu.
Ka sawi tur haihchham chu min hrethiam awm tak hian a rawn tawng hmasa leh a, "Tunah chuan doctor i lo ni ve ta a, i tum ber thin kha ania, ka lawmpui a che. Mahse literature lama i kal ta lo hi chu ka ui ngawt mai che," nui chung chuan a ti a. "Nangpawh tunah chuan keimah ang thovin doctor i ni ve tawh a, ka thawh châk êm êm na hmunah i thawk bawk a. Ka awt ngawt mai che," ka ti lêt ve a.

Damdawi in cafeteria-ah chuan titi turin kan thu dun a. A hma ang thovin a la nêlawm êm êm a, min be siam siam bawk. Kei erawh chuan mit tla lo chauhin ka lo thlir thung. A hma ai mahin a hmeltha zawk a, a rilru a zangkhai tih a hriat hle bawk.
Kan titi zawh chuan a lo tlai ve ta viau a, in lama haw ka tum chu a car chuan min thlah a.

Kan in mangtha zo ina ka lût tur chu, "Victoria, kan inhmu leh hi ka lawm lutuk," nui chung chuan a rawn ti a.

Keipawhin, "Kei deuh ka lawm," nui chunga ti pah chuan ka luhsan ta a.

A tawp a tawpah chuan kan intawng leh ta, ni e, kan thawnthu hi a la tawp lo a ni.