Chûng thil thlen hnu atang chuan kan inhmu tam ta tial tial a, kan la induh deuh tih pawh chu kan thup lem lo a, mahse a tu zawk mahin sawichhuah kan tum chuang lo.

Zan khat chu chaw ei chhuahpui turin min sâwm a, ka lo remti ve mai a, ni danga makeup hmang vak ngai lo kha inchei a lang tlat bawk a, ka insiam zo chiah tih chuan a call ka dawng nghal zat. "I hman tawh em?" a rawn tih chuan 'aw' ti chungin in hnuai lamah ka chhuk thla nghal a. Pawnah chuan min lo nghâk reng tawh a, a car chuan kan inphur chhuak nghal a.

Kan hlim hle a, higher kan kal lai te kan sawichhuak a, Benjamin chanchin a sawichhuah chuan ka lungawi vak lo a, a bialnu hlui ka sawichhuak ve nghal, mahse a ni chu a lo nui mai mai thung. "I laka move on ka tum lai kha a nia, amah khan min rawn bem hmasa a, a fel a, a hmel a pangngai tho bawk nen ka lo duh ve mai a nih kha, mahse kan ni rei lo lutuk. Hmaniah min lo bia a, pasal a nei tawh a ni awm e," a tih chuan ka inthiam lo leh hnuhnawh a.

Kan haw lam chuan kawng laklawhah motor a tiding a, a view chu a mawi êm vangin thla la turin ka chhuak nghal zat a, chutah ka hnung atang chuan min rawn kuah thut a, ka hamhaih leh zak lutuk chu ka sen vek theiin ka hria.

Chutah, "Ka duh che Victoria," a tih chuan chhâng lovin ka ngawi reng a. "Min duh ve em?" a tih pawh chuan ka la ngawi reng a.

Min kuahna chu thlahin, "Ka hrethiam e," a ti sep a, chu veleh, "Keipawn ka duh che," ka tih chuan rin loh hmel takin min rawn en a, "I hre lo maithei, mahse ka duhna che a rei tawh, ka rin dan chuan ka duh hmasa zawk maithei che," ka tih chuan, "Engtik atangin," a rawn ti chhuak hlawl a, "Class-11 first day atang khan ka duh daih tawh che," ka tih chuan, "Ti nge engmah i sawi ngai loh?" a tih chuan, "Min duh ve ka ring lo a, bâkah min play mai mai te ka hlau bawk a," ka tih chuan, "Lo sawi hma lang chuan thil a danglam ngei ang," a ti a. "Ka tihpalh," ka tih chuan min rawn kuah a. "Bul tan nan a la tlai hleinem," a tih chuan ka lo kuah lêt ve a.

"Bul tan chu i duh em?" tih paha ka mita min rawn en chuan, 'aw' tih nan ka lo bu nghauh a.

Tunah chuan ka duhthusam te kha a takin a thleng ta e, ka mumang chu a ni si lo.

. ⪩⪨ .

Kan inzui hnu kum 1 leh a chanve hnuah chuan kan innei ve ta bawk a, Mizoramah awm lovin Delhi lamah kan pahnih chuan kan awm a, a thawh naah chuan ka thawk ve thei ta bawk. Nitin kan kal dun a, tumah kan ngai bik lo, hmalam hun chu ka hre lo a, mahse tun dinhmunah chuan hetiang bâka hlimna hi a awm chuang lovang.

Zanin hi kan 1st Anniversary a ni a, hna atangin a damloh vangin a haw hma a. Kan bân veleh ka ngaihtuah avangin ka haw tlang ve nghal bawk. Inchhung ka lût chiah chu cake nen min lo hmuak a, inchhung chu a lo chei vek bawk a, a dam loh chhuan lamin hêng thil buatsaih tur hian a haw hma a lo ni a, ka tân a van hlu chiang em!

Zan kan mut naah chuan a mu hmel chu ka en reng a, hmeltha ka ti takzet. A sama chûl pahin, khâng hun lai khan kan induhna te kha lo thup lo ta ila, emaw damdawi inah khan thawk turin rawn kal ta lo se, tûn dinhmun hi kan thleng kher a ngem le... tih te ka ngaihtuah a.

Engpawh ni se, khâng hun laia kan pahnih awmdan, 'Situationship' an tih chu 'Relationship'-in kan thlâk ta a.

Khâng hun laia kan pahnih min hre tute khan tuna kan awmdan hi hria se mak an ti ve ngawt ang chu, kei ngei pawn mumang emaw tih mai châng ka la nei si a.

. ⪩⪨ .

Chuti chuan, ka lehkhabu chhiar thin tam takte angin, ka thawnthu ngei pawh chu a hlimawm zâwngin a tawp ve ta a. ⋆