Hun a lo kal ve zêl a, exam kan zawh hnu chuan chawlh rei lo tê kan nei ve a, chutih vel lai pawh chuan ka rilruah Jordan ringawt chu a awm a. Exam kan zawh ni khan chawlh nuam taka hmang turin duhsakna min hlan a, kan inthlah ta kha a ni a.

2nd term kan luh leh tirh lam atang chuan engti emaw tak hian kan inhnaih ta riau a. Short break te chuan min be ta zeuh zeuh a, thil tih tur awm se kan tidun ta deuh chawt a. Ka thiannu ve ber Hannah chuan a duh ve deuha ka hriat thin vang hian ka hnaih ngam lutuk ngai lo a. A châng chuan keimah ai ai te hian a chhaih peih zâwk hian ka hre thin a, ka thik ve deuh thin. Mahse engmah ka tilang ngai lo a.
Hall-a lâm kan zir te chu pâwn atangin min lo en ve reng thin a, a hnuah min fak ziah bawk a, a nuam ve thei ngawt mai.
Midang ang ngawt hi chuan min en lo deuhin ka hre ve thin.
A ni pawh keimah ang deuh hi a ni a, hmeichhia zawng zawng be tha vek ang chi kha a ni a, ka duh tih hre lo mahse bansan mai erawh ka tum chuang lo a.

. ⪩⪨ .

Kan school chuan Teacher's Day kan hmang dawn a, zirlaite pawh kan phûr êm êm a, item nei ve tur chuan min thlang a, ka zah rualin mahni hmaa tihtur awm chu tha taka hlen zel duh chi ka nih avangin ka hnial ta bik lem lo a.
Kan telna turah chuan kan class ami tho, biak pawh ka biak ngai êm êm loh, Benjamin chu a tel ve dawn a, mipa a nih avangin ka ti nghal dûk a. Mahse tha takin ti ang aw tia nêlawm taka min biak tâkah chuan kan inbe chho ve ta a. Ka rin ai daiha a lo fel vangin engti emaw ni hian ka hlim riau a, thian thar chhar ni mai hian ka inhria.

Kan inbe mawlh mawlh lai chu Jordan chuan kawngkhar bul atang hian min lo en reng a. Ka va hmu chu ka lo nuih sâng a, en pawh min en duh lo chuan a kal ta daih a, ka ngaih a titha lo nghal hle a. A hnua ka biak pawh chuan min be tha pangngai mahse hlim loh rûkna neih hmel deuh hian a awm reng a. Nuam lo ka ti viau tawh.
A hnu atang phei chuan Benjamin nen chuan min chhaih ta zeuh zeuh a, ka pha nasa thei hle a.
"I star thin kha, class-ah pawh i en ziah alawm," ti tein min chhaih ta a.
A thik nge min chhaih ve châk hrim hrim tih erawh ka hrethiam chiah lova. Mahse a rûk tak chuan nuam ka ti zan lo a ni.
Nangpawhin i duh deuh khan midang chhaih tlat ta che sela engtin nge i ngaih ve ang?

Benjamin chuan min biak that thin êm avangin tha tak takin ka be ve thin a. Fel min tih thu a sawi chuan keipawhin fel ka tih thuin ka chhâng a.
Kawm a nuam ka tih rualin thian ang tak tak bâkin ka en ve vak lo, amah hi chuan rilru dang a pu deuh a ni tih chu a chezia atangin ka hre thei a.
Benjamin leh Jordan chu an inkawm ve deuh thin avangin tlêmin ka hlauthawng deuh thin a. Ka hlauh ang ngeiin Jordan chuan min be tha duh ta vak lo a, thinrim ang deuh hian awm mahse a chângin min be tha leh tho bawk si a.
Jordan chuan hmeichhe pakhat hmeltha ve deuh, kan class ami tho Linda chu a be tha ta hle a. A hma ai zawnga an inhnim hnaih vang chuan ka thik êm êm a.
Ka mipa kawm ve deuh ber 2, Jeremy leh Eric chuan a hma zawnga sawi ngai si lovin, an crush te chanchin min hrilh deuh chhen mai bawk a. Ka lonely bik ngawih ngawih hian ka hria a, Jordan-an min lo ignore lai a ni bawk si, ka thiante 2 lah chuan min ngaihsak ta lo riau te hian ka hre bawk a.
Teacher's Day chu kan hmang ta a, a nuam hle nain Jordan nena kan inbiak tâk miah loh avang chuan ka lungngai ru hle a. Benjamin chuan thla lâk puiah min sawm a, Jordan-an min lo en reng chu tih thik na tur hrim hrimin thla chu ka lâkpui a, Benjamin-a pangpar dawn te chu nalh ka tih thu te ka sawi kher a, ka dawng ve châk ngawt mai ka ti chu, "Ka la pe ve dawn che lawm," a ti ta mai a. Ka rilru a nuam leh ta zan lova, chumi ni chuan Benjamin chuan ka number leh ka instagram username te min zawt bawk a. Tha tak chuan ka pe ve mai bawk a.

A tûk chuan Benjamin-a chuan min rawn be ta nghal mai a, mak chu ka ti ve deuh. Kan thlalak dunna te chu min rawn thawn a. Teacher's Day-a ka thiante nena kan thlalak chu ka status ve a, a mawiah Benjamin nena kan thlalak te pawh ka status ve bawk a. Mi chuan an lo ngai kawi nasa dawn tih hre hek lo, Benjamin lo star ve deuh tute chuan min haw tan ta a, hmelma ka insiam chu a ni ta deuh ber a. Eng atan vak ka ngai lem lo, ka care ber zawk chu Jordan-a ngaihdan tur chu a ni, an inthian ve bawk si a.

A tûkah chuan Jordan be tur chuan ka kal a, titau tawh suh ka va ti ngawt pek a, "Tu nge titau?" a lo tih chuan ka thin a rim deuh a. Mahse a hnuah nui chungin, "Tu emaw chu niminah te pawh i lo be maithei a," a ti a. A sawi tum chu ka hrethiam nghal mai a, "Engtin nge i hriat?" ka ti lêt ve a. "Engtin nge ka hriat loh ang?" a tih chuan sawi tur ka haihchham deuh a. Mahse amah bawk chuan, "Nia, keini te chu instagram-ah pawh kan in follow ve lo a tiraw?" a tih chuan ka thin a rim ve ta deuh a. Keipawh chuan, "Nangni pawh in inbe tha ve tho alawm," ka tih chuan, "Tu nen maw?" mit ko sân chung chuan a rawn ti a, "Linda-i nen," ka tih chuan "Thian ang kan nia, instagram-ah te kan in follow ve hleinem tu emaw te angin," tih pah chuan min kalsan ta daih a.

Ka rilru tlêm chuan a na ve deuh a, mahse ka thiltih te a lo care hle tih ka hriatchhuah vangin ka hlim ru viau thung a.