3rd term kan luh leh hnu atang phei chuan kan inbe ngai ta vak lo. Nuam lo tihna pawh ka nei ta hran lo a, move on ve tak tak ka tum a ni ber ang chu.
Hlim takin awm se tih chu ka duhthusam ber a ni reng a, a châng zeuh zeuhin a instagram ka check thin bawk.
A thiante bula a awmdan ka en chuan a hlim hle tih ka hmu thei a. Ka ngaihsak loh avangin a nunah engmah danglamna a awm lo tih ka hmuh phei chuan move on ka tumna a lian zual sauh a. Kei erawhin buaina ka tâwk tan a, Benjamin nen min chhaih reng te chu ka ning hle a, a rûk tak chuan beidawng se ka ti hle bawk, amah anga mipa caring hi ka tawng tawh kher lovang, a fel bawk a, mahse duh turin keimah leh keimah hi ka innawrlui thei thlawt lo a ni. A chhan chu ka hre lo a, mahse keimah aia tha a phu vangin Pathianin ka duh a phal lo aniang tihte chu ka inhnemna a ni. Gift eng eng emaw a khât tâwkin min pe reng a, ka inthiam loh avangin ka lo la ve mai thin a, a châng chuan hmaichhanah pawh min pe ngam lovin ka bag-ah te a lo dah thin a, hmeichhe dang chu ni se vawi sâng tam an fall tawh ang chu! Mahse chûng hmeichhe zingah chuan ka tel ve tlat lo.

A hrechiang lo tân chuan duh lêt chuang lova a thilpêkte ka lo lâk ve mai thin avang pawh hian huat ka awl teh ang chu.

Hun a kal ve zel a, class-11 kan nih kum tâwp lam a lo hnai ta viau mai a, kum tâwp tih khan session tâwp tihna a ni zâwk mah ang chu.
Practical exam kan neih dâwn ni chuan Jordan chuan min rawn be ve tehhlawl a, a hma ang chiahin ka bulah rawn thu meuhin ka thiam leh thiam loh te min rawn zâwt a, mak ka tih vangin ka lo en tawp.

Tha deuhin tih tum ang aw a tih phei chuan mak ka ti tawh ropui, class atanga chhuak tura min lo nghah phei chuan mak ka ti lutuk chu ka en hû a, "Eng nge ti vak vaka min en?" a tih chuan, "A mak êm alawm," tih tê chauh chuan ka chhâng a. Kan chhuk ho pawh chuan a bulah ka kal tha vak ngam lova. Practical kan tih mawlh mawlh lai chuan thil eng emaw hian min rawn vawm a, thinrim deuha ka va en chuan, "Pencil ka lo hmang," nui chung hian a rawn ti a, ka va theh phei a, ka thiltih chu ka tihzawm leh nghal a. Kan zawh hnu chuan ka bulah rawn kalin a pencil hman chu min rawn pe lêt a."Ka lawm e Benjamin-a bialnu," min rawn ti deuh kher a.
"A ni bawk lo," ka tih chuan, "A la ni dawn, kum tira ka chhaihna che kha a thleng dik dawn," a rawn tih leh chuan ka ning ta deuh a, "Kan inbe tha satliah alawm," ka tih leh chuan, "Hmmm...," a ti ringawt a. "Hrilhfiah che ka tum a tir pawn mahse i titau daih a nih kha. Min be duh lo vel a," ka tih chuan a hmêlah inthiam loh rûkna eng emaw a nei ve deuh tih chu ka hmu thei a, ngawi reng chuan a kal daih a.

Min rawn be tha leh ta deuh chu ka lawm hle a, a pencil min hman sak chu ka hlut ta riau a, chumi ni zât chu a pencil min hmansakah chuan ka ziak a, ka dahtha ta daih a.

A tûk chuan min biak leh mai ringin ka ngaichâng reng a, mahse a hma ang tho khan awm lehin min be leh ta chuang lo a, 'awle...a tâwk ta, feelings a lo nei ve emaw ka tihte kha a tak tak a ni lo a nih dawn hi' tih thlengin ka rilruah a rawn awm a. Mahse thian angin la awm tho ila ka duh vangin keimah zawk hian bul tan thar ila tiin ka ngaihtuah ta zawk a, ka be hmasa ve ta zeuh zeuh rêng a.

Kan inpawh ve leh deuh tawh tih veleh chuan bialnu a nei tih an sawi ta sup sup a. Bialnu a neih âwm ka la hriat loh vangin a nei ta thut chu mak ka ti hle a. Ka lawmpui rualin nuam lo ka ti ru hle a.

Amah lah chu a hlim hle tih a hriat theih a, ni e, a tîr atang rêng khan ka thiam loh a ni a, tisual hmasa zâwk ka nih vangin amah chu ka dem hran lo.
Min duh thu min rawn hrilhin min rawn bem ta pawh ni se bialpa tur êm chuan ka la ngaihtuah chhin ngai loh vângin ka hnar mahna, mahse...bialnu a nei tih han hriat meuh chu a na a ni, a na takzet.

Engpawh ni se hlim takin awm se tih chu ka duhthusam a ni. Ka instagram ka check chu min lo unfollow tih ka hmu a, unfollow mai pawh ni lo, min removed a ni.

Tâwp a duh tak tak tih chu a lang reng a, 'awle, ka inthiar fihlim san tawh ang, hlim ngei rawh se' tih chu ka rilruin ka sawi a.

Chuta chin ka be tawh ngai bik lova, engtik lai pawha ka dah pawimawh êm êm lehkha zir bawk chu ka uar thar a. class-11 chu inchhirna nei miah lova zawh ka duh vang a ni.

Pathian zârah class-11 chu kan zo ve ta a. Kum 1 chhung lek mah ni se thil tam tak a thleng hman a, ka tân ngat phei chuan kum hei leh chen ka lo hman ve tawhah hian a hrehawm ber lai part a ni hial awm e.

. ⪩⪨ .

Class-12 kan lo kai ve ta reng mai a, hun hi a kal chak mang e. School luh tirh ni chuan a hmel ka hmu thut bawk nen tum loh deuhin ka rilruah amah bawk chu a rawn lang thar leh a, a kum hmasaa kan memories te chu ka rilruah a indawt zutin a rawn thleng bawk a.

A bialnu nen an inthen tih thawm vel chu ka thiannuin min hrilh ve a, "A va pawi ve," tih zawng chuan ka chhâng a. Ka rilru tak chuan ka lawm ru hle a.

Board kum a nih vangin kan tang hlawm hle a. Zirlai ringawt ka ngaihsak vangin hun a kal chak ka ti hle a. Hriat loh karin hun a liam zung zung a. Inchhirna nei miah lova pass chu ka tum ber a ni.

Jordan chuan min chîk viau hian ka hre thin a, mak pawh ka ti viau thin a, mahse engkim chu a tawp tawh nia ka hriat avangin amah tawp chu ka hnaih duh tawh lo a ni. Benjamin pawh chuan min la hêl reng a, thian ang chauhin ka en thung.

Hun leh ni a ral zung zung a, class-12 kan nih tâwp lam pawh kan hnaih leh ta, lehkha ka zir that viau avang chuan board exam pawh chu ka huphurh êm êm hran lo a. Ka thiannu Hannah nen chuan tha takin pass ila, Eric leh Jeremy te pawh chu tha takin pass se, Class-12 kan zawh hnuah chuan kan duhzawng tak zir vek theiin hna te pawh ka tuina tak thawk vek thei ila tih chu ka duhthusam a ni. Kei chuan Doctor nih chu ka duh ber a ni a, 12 ka zawh veleh Neet exam nghal ka tum bawk, chumi tur pawh chuan kum tîr atangin ka theih ang angin ka inbuatsaih lâwk ve bawk a.

Board exam kan neih hmaa, school kan kal tâwp ber ni chuan school-ah inthlahna eng eng emaw kan nei a, tlai takah school atangin kan haw a, in ka thlen hnu chuan ka tih ziah thin angin ka bag ka check hmasa leh ber a, ka bag chhûngah chuan lehkha hi a lo awm leh a, 'Best of luck for your upcoming exam, fighting!!,' tih hi a lo inziak a, a paper hman chu purple a ni kher lehnghal, ka nui suk a.

Ka sawi hmaih chu, kum tluan khan hriatloh mi 1 hnen atangin lehkha hi ka dawng fo mai a, paper rawng chi hrang hrang a hmang thin a, a chhûngah chuan 'Don't work hard too much' tih te, 'You look pretty today' tih chauh te hi a lo inziak thin a, mahse chûng chuan a rûk takin min tihlim êm êm a, tu nge chûng thu chu ziak hre lo mah ila ka hlim tâwk tho a. Benjamin a nih te ka ring rum rum thin a, mahse chutiang ti hmel a pu bawk si lo. Tupawh ni se, hmuh ka châk takzet a ni.

Exam chu kan tan tirh ni atanga a tâwp thlengin ka titha êm êm vek a, ka lung pawh a awi khawp mai. Jordan pawh ka hmu thin a, a tihthat hmel thei bawk a, a pass tha hle turah ka ngai. Min be lem lo a, mahse min rawn nuih suk thin a, ka nuih lêt ve thin bawk.

Exam kan zawh tlai chuan kan school chu ka thlîr lêt vang vang a, ka lung a lêng hle a.

In ka thlen hnuin ka bag chu ka en hmain ka nu chuan a lo tifel vek a, lehkha lam rêng ka rilruah a lo lang tawh lo bawk nen.

Result chhuah ni chuan ka phur ru hle a, ka rin ang ngeiin ka titha hle a, Jordan pawh a titha hle. Ka thiante pawh chu an passed vek a, kan hlim hle a.
Kan thianho chuan thil kan ei khawm ve a, Jeremy chuan Jordan hmun danga a kal tur thu chu a rawn sawichhuak a, ka lo ngaihven hle a, hmun dangah thil zirin a kal dawn a ni. A titha bawk a, tluang deuhin kal se, hlawhtling ngei se tih chu ka duhthusam a ni. Mahse ka lung a lêng ru hle a, inbe tawh ngai lo mah ila, mak takin keimahah hian a la thi famkim thei lo ni ber hian ka hria.

In ka thlen chuan ka lunglen êm vangin ka lehkhabu hlui te chu ka keu kual a, mak tak maiin ka slam book karah chuan lehkha ka hmu a, envelope tê, a purple hi a ni a, a chhungah chuan lehkha var hi a awm a, ka chhiar chiah chu mak ka ti hle a.

To,
       Victoria

A hmasain he thu ka ziah lai hian keimah pawh hi ka inringhlel viau a ni, a chhan chu tiang khawpa ka nun thlâktu hmeichhia hi ka la tawng ngai lo a, chu hmeichhia ka nun thlâktu pawh chu nang kher i nih vang pawh hian i chungah ka lawm e. I bag-a lehkha lo dah ziah thintu kha ka ni a, i hlim thin nge i lo ning ru viau thin zawk tih chu hre lo mah ila, a ziaktu keimah erawh hi chu ka hlim hle thin a ni tih chu phat rual a ni lo.

Awlee tu nge ni ang i lo ti maithei, Jordan ka ni e, hun rei tak ka biak duh loh che avangin a hmasain ngaihdam ka dil a che.

Hun rei tak kan lo inhre ve tawh a, rei tak atang khan ka duh tawh che a, mahse ka sawi ngam lo a, ka chezia atanga i hriatthiam thin pawh ka ring tho a. Mahse buaina kan neih chhoh hnu khan ka induhtâwk ve na laiah theihnghilh zawm mai che ka tum a, ka thei thlawt lo a ni. Hlim tak angin lang mah ila chhungril a hlim ve thei tlat si lo a.

Engpawh ni se, tunah chuan class-12 zo kan lo ni ve tawh a, career ngaihtuah kan ngai ve tawh a, kan hun hlui kha chu engpawh ni se kalsan kan ngai tawh a.

Hma lam hun chu ka hre lo, mahse min hre reng dawn nia, khuanu-in rem a tih chuan kan la inhmu leh mahna, hlim takin awm ang che.
 

                                          From,

                                            Jordan

Mak ka ti chu ka en nawn tlut tlut a, class-11 kan nih lai ka ngaihtuah chhuak a, Jordan nena kan la inbiak that lai khan ka quotes leh poem ziah thinte chu colour paper tê-ah hian ziakin Jordan chu ka pe thin a, a châng chuan paper-in star lem te ka siam a, ka pe thin bawk.
Ka lehkha dawn thin kha colour paper-ah hlir a inziak thin a, khâng atang pawh khan engtin nge ka hriat loh theih!???
Ka mitthi a sur zung zung a.

Paper-ah chuan tihian ka ziak a, "In the future, if by some miracle you ever find yourself in the position to fall in love again...fall in love with me," tih chu. Chu chu a envelope min pêk chhûngah chuan ka khung a.
'Kan pahnih inkar chu tihian a tawp e, nakinah khuanu-in rem a tih chuan kan la intawng leh mahna' tiin kan nunhlui chu ka thlah ve ta a.