No pics, because of some network issue. Will upload the pics later on!!

Jahan ek taraf Vineet aur Karan khudko bachane ke liye chikh rahe the dard se taki maa ke samne izzat bach jaaye wahin dusri taraf Mishra parivar bare pyar se dono ki izzat utar rahe the. Aakhir dono ki wajah se aaj saare kaam bigad gaye the, Mishra ji hospital na jaa paaye. Kitni muskil se toh unhone dusre doctor ko apni jagah bulaya aaj koi toh mann hi nahi raha tha manta bhi kyun, akhir garibon ka muft mei ilaz jo karna tha kaun maane iske liye, kaun apna waqt jaya kare. Jabki Wahi kaam duji jagah karne par unki aachi kamai hogi fir muft mei kyun waqt gawaye wo. Lekin Mishra ji ne jaise taise ek Doctor ko manaya ye kehke ki wo usse unki jitni fees banti hai wo unhe de denge, tab jaake uss Doctor ne Mishra ji ke hospital mei kadam rakha. Aab kyun na gussa ho Mishra ji. 

Mishra ji ko toh jo takleef hui wo toh hai hi saath hi Shakuntala ka bhi saara kaam bigad gaya. Bachcho ko tuitions na de pai, aab Mishra ji ki aisi halat mei wo pehle unko sambhalti ya bachcho ko tuition padhati. Halanki, tuition toh unhone chuti de di thi lekin sab bacho ki pariksha chal rahi jis baat ki chinta Shakuntala ko bahut hai. Waise toh jin bachcho ko wo padhati hai wo kafi hoshiyar hai lekin jab padhenge hi nahi toh hoshiyari ka kya faida. 

Wahin dusri taraf Ruhana bhi gehri chinta mei thi, aaj uska college jo miss ho gaya tha jab ki aaj toh unhe kuch projects ke baare mei teachers se puchna tha saath hi apni ek dost se apni notebooks wapas leni thi aur library se kuch kitabein bhi. Lekin aab toh wo jaa na paai, teachers se projects ke baare mei puchne ka akhiri din tha aaj waise wo apni sahekiyon se puch sakti hai iss baarei mei aur wo bata bhi dengi lekin baat wahi hai ki unki saheliyan teacher se kuch puchengi tab na. 

Aise toh saari saheliyan badi tej hai gappe marne mei lekin baat jab padhai ki aati hai toh sab gungi ban jaati hai. Andar hi andar Ruhana ko ye chinta sataye jaa rahi hai ki kya hoga project ka. Ye soch ke aab usse bhi gussa aane laga hai dono ladko pe agar wo na girate unhe toh aaj itni takleef na hoti pure parivar ko. 

"unn nalaykan ko dikha nahi itni badi scooty chale aa rahi thi.. Aankhe ghar chod aaye the kya?" Shakuntala vyank purvak boli, krodh saaf saaf jhalak raha tha awaj mei. 

"Arey loofer the loofer dono. Gunde se baal lambe kiye hue the dono ne, sakal tha nalaykon wali thi hi. Road pe bhi lafantar giri karne nikle honge" Mishra ji dono ko koshte hue bole. 

"aaj kal ke chokre, bas roda pe ghoomne ilawa jaante kya hai. Aise chokran ki aache se kutai honi chahiye" Shakuntala boli, jaisa charitra warnan Mishra ji de rahe the uss hisab se Shakuntala bilkul sahi jaa rahi thi. 

"dono ladkon mei tameez toh bilkul nahi thi, sabse toh wo jo mere upar gira. Gaddhe ko bado se baat karne ki tameez tak nahi thi, huhhhh" Karan ki aachi khasi izzat utar di Mishra ji ne, waise bhi kuch galat toh bole nahi wo. 

Karan ki baat sunke, Shakuntala ne jhat se pucha "aur wo dusra" 

"wo toh ek number ka jhootha aur makkar tha, sakal se hi loofar tha aur jaban se jhootha. Apne baap se badi badi baatein kar raha tha jaise kitna padhaku ho. Huhhhh, agar padhna likhna hota toh college jaata yun ghoomta nahi" aab Vineet ki bhi izzat gayi, waise uski izzat thi hi kahan jo jaati. 

Ruhana aab tak toh chup thi lekin aab usse laga ki usse bolna chahiye "lekin papa wo toh pareshan laag raha tha" Ruhana ne apni baat rakhi 

Mishra ji aur Shakuntala uski aur mude, "nahi beta wo toh wo tumhe dekh ke badi badi baatein fek raha tha" Mishra ji bole saath hi Shakuntala boli, 

"aur kaa ladki dekh ke mauka marna chahta hoga wo awara" Shakuntala boli muh banate hue 

Ruhana ko ye baat kuch sahi lagi lekin fir laga shayad unke maa baap gussa hai dono se isliye aisa soch rahe hai. Khiar abhi usse un do ke baare mei nahi sochna. Unka soch ke kya faida hona hai, abhi usse apne project ki chinta hai issliye wo college jaane ki soch rahi hai.. 

"Mumma main soch rahi hoon ki college chali jau, ek project ke liye teacher se baat bhi karni hai mujhe" Ruhana Shakuntala ko batati hai, kyunki usse pata hai iss halat mei itni assani se wo usse college na jaane degi. 

"lekin bitiya, tumko itni chot lagi hai aise mei college kaise jaogi" chinta purvak Shakuntala ne pucha.. 

Ruhana ne halki si muskan dete hue kaha "Kahan jyada laggi hai mumma bas hath pe hi laggi hai mere wo bhi thoda hi. Please, main chali jaati hoon na" Ruhana ne vinti ki lekin Shakuntala ka mann na tha usse college bhejne ka. Ruhana ki itti si chot bhi unke liye bahut badi thi. 

"please mumma bahut important hai jaana" aab jab Ruhana itna jid karne laagi jaane ke liye toh aakhir Shakuntala ne haan kar di par saaf saaf keh diya ki jaldi wapas aaye. 

Ruhana ne unhe ek jaadu ki jhapi di fir apne kamre ki aur chal di. Jaldi se naha ke kapde badal liye aur ghar se nikal padi college ke liye. Shakuntala aur Mishra ji ne kitna kaha ki wo unhe chod denge lekin Ruhana ne unhe samjhaya ki wo khud bhi jaa sakti hai aur fir chali gayi wo apne college ke liye. 

….. 

Aage kya hoga jaane ke liye banne rahiye hamare saath 

Milte hai agle adhyay mei..