Ummm! Ummm! Abaw, di kaw gid maigo, ha? Dya imo, ay. Ummm!

Paaak!

Yehey! Igo man gali, ah.

Kag dalidali ko nga ginsagap kon diin nagtupa ang gintiro ko nga pispis. Baw tambuk ba. Namit dya. Sara, darwa, tatlo, apat, lima. Waw! Lima run ka bilog igo ko. Mauli run ko hay may darapli run kami.

“Coco! Coco!”

Si Nanay ginatawag na run ako. Coco ang akun ayo hay aydol ni Nanay ang artista nga si Coco Martin.

“Nay, dya run ko!”

“Ay, abaw, nga bata kaw. Sirum run dya, diin kaw naghalin nga lagawan man? Gaparaos run ako ka singgitan panawag kanimo, daw wara kaw lang ka bati. Pasalamat ta gani hay Sabado, wara ti klasi kag makabulig kaw kanakun. Ang lagaw tana imo. Dasiga bantayi to tinig-ang ko hay gapanglaba pa ko dya. Waswasan ta kaw kar-on.”

“Aguy, Nay, indi lang ko pagkarai, ay. Nanirador ko ka pispis to sa tunga taramnan para may dapli ta.”

“Abaw, kag namintas kaw pa ka sapat. Ay, katonto kanimo nga bata kaw. Gapangabuhi sapat ginasakit mo. Kon ikaw man abi pispis kag tiraduron, namitan kaw?”

“Ano ruman ra, Rosing, ginawangal mo man? Kahuruya sa mga iningud. Raha run dapli ta dyan? Ngayo bi isumsuman namun ni Pare Kardo. Baw tayming gid. Daw may dara si Coco ko haw. Ano ra, To?”

“Pispis, Tay. Gintirador ko sa taramnan kaina.”

“Baw masarigan gid bata mo nga dya mangita sumsuman, Pre,” sal-ut ni Tyo Kardo, ang paralingin nga migo ni Tatay nga piyak balay namun.

“Ti, initi run to ra ka tubig kag bulbulan, hay litsunon ta kag isumsuman. Namit ra. Sa rum-an manirador man ko bla.”

Kag dalidali ko nga gintuman ang sugo nanday Tatay. Sadyahan gid ako nga nalipay si Tatay sa dara ko kag wara na ako ginpinahan. Kon lingin si Tatay kag wara ti dapli ukon sumsuman, pirmi na kami ginapintasan ni Nanay. Sa rum-an manirador liwat ko para malipay liwan si Tatay.

Pagkaaga, Domingo. Gusto ko magsimba garing rayu ang simbahan sa baryo namun kag wara man kami ni Nanay ti kwarta nga inogpliti. Ginbuligan ko run lang si Nanay ka panilhig sa palibot ka amun balay.

“Nay, ano dapli ta kar-on sa igma?” 

“Wara gani, To. Piro manglaswa lang ko dahon kamoti sa likod burubhay.”

Dalidali ako nagsulud sa balay kag ginbuul ang akun tirador kag ginhakup ang mga bala ko nga bato kag naglisinsya kay Nanay.

“Nay, mapataramnan ko anay mangita darapli. Wara makabati kanakun si Nanay hay gahud ang anang panilhig.”

Ummm! Ummm! 

Paaak!

Mayad, igo dayon sara. To, ay, pa sara.

Ummm! Ummm!

Paaak!

Yehey, darwa run! Dayon ko ginparapitan ang darwa ka pispis nga gintirador ko. Ang sangka pispis umbok. Naigo ko sa pakpak piro buhi pa. Ang sangka pispis tikling, sa kahig igo na kag buhi pa man. Dalidali ko nga ginsulud ang darwa ka pispis sa gamay nga sako nga pirmi ko ginasudlan ka mga naigo ko. Kag gulpi lang ako may nabatian.

“Cocoo, anak ... si nanay mo dya. Maluoy kaw kanamun ni tatay mo.”

Naglibug ang ulo ko kon sa diin naghalin ang ugayung.

“Nay, diin kamo?”

“Coco, anak dya kami sa sulud ka sako.”

“Nay, ano natabo kaninyo ni Tatay? Andut nangin pispis kamo haw? Kag … kag … gintirador ko pa kamo. Aaah! Nay, ano himuon ko? Huhuhu. Pasinsya gid, Nay, Tay! Diyos ko, buligi ako. Huhuhu.”

Kag gulpi lang may naghugpa nga bahul nga pispis sa akun atubang.

“Coco, pamatii ako!”

“Ha? Pispis nga nagahambal. Sin-o kaw? Buligi ako, maluoy kaw!”

“Ako ang Diwata kang mga Kapispisan. Ginhimo ko nga pispis kag ginpatiro kanimo sanday nanay kag tatay mo agud taw-an kaw kang liksyon. Agud mabatyagan mo man kon daw ano kasakit para kanamun nga mga kapispisan ang maduraan ka ginikanan. Mga ginikanan nga ginasarigan kang mga pisu kang andang pagkaun.”

“Mahal nga Diwata, maluoy kaw. Ibalik kanakun sanday Nanay kag Tatay. Pangako indi run ako manirador liwat ka mga pispis. Maluoy kaw. Huhuhu.”

“Sigi, ibalik ko kanimo ang imong nanay kag tatay piro dapat nga tumanun mo gid ang imong ginpromisa hay kon indi gani, indi mo run sanda makita asta san-o.”

“Huud, mahal nga Diwata. Patihun ko gid ang akun promisa.”

Kag gulpi lang nadura ang Diwata kang mga Kapispisan.

“Hoy, Coco, bangon! Ay, abaw, nga bata dya. Abi ko nag-inum kaw lang dyan, nagturog gali timo liwan. Dalia, imawi ako. Manglaswa ta ka kamoti sa likod balay.”

- Katapusan -