Nagtakup ruman ang isara pa gid ka kapistahan. Kag sa kada pista nga atun ginapamunsyunan, may mga bagay gid nga atun masagamsaman kag mauyunan kag luyag natun nga balik-balikan.

Nagapamangkot ako sa akun kaugalingun, kon iwan haw nga duro gid tana ang malyag kang mga sugidanun nga kaharadlukan? Suno sa kalibutan kang sikolohiya, raku ang luyag kang pagbutyog kang adrenalin sa lawas hay nagadara dya kang iba nga pamatyagan, nga bisan nahadlukan piro wara man maiwan. Daw kaangay dya kang pagsakay sa roller coaster. Ang iba luyag lang nga magtabug ang andang mga problema paagi sa mga kalingawan nga nagaukay kang andang mga paminsarun kag baratyagun.

Kon may ginaukay, may nagaalimbukad; kon may nagaalimbukad, may nagalutaw. Nagarulutaw ang mga lagtuk nga buhay run nagrulugdang. Kuon kang sangka kilala ko kauna, patawarun ang anang mga sala hay patay run tana: “May mga nagakuon nga indi kaw magkaun kang pagkaun nga makapurukaw hay ginapukaw ang imo mga balatian. Piro mayad gani ra nga mapukaw agud maman-an mo, kondi nga mabulong.”

Basi raku man kanatun ang wara lang nakamaramad kang kinahanglanun nga mapukaw ang duro nga mga bagay sa atun kaugalingun agud nga matun-an natun kon ano ang mga butang nga dapat natun tipigan kag kon ano ang kinahanglan nga bag-uhon, duraun ukon ilisan.

Ang mga istorya sa atun pista kadya, bukut kalingawan lamang ang natugro kanatun, ukon paralagyuhan kag palipasan kang oras, kondi nagtugro man dya kanatun kang mga bagay nga kinahanglan natun matalupangdan kag matun-an sa atun kabuhi bilang indibidwal kag bilang katiringban, kag ang katungdanan kag angut kang kada isara kanatun sa katiringban.

Kon atun balikan kag sipad-sipadun ang mga istorya sa Pista kang Kaharadlukan, makita natun ang duro nga mga bagay nga masami pasapayan lang ang atun pagtamud.

Sa pangbukas nga panaysayun kang kapistahan, ginsaysay kang tagsulat ang istorya kang “Tagkaralag” kag ang kahulugan kadya kanatun kag ang atun nagapadayon nga angut sa mga pinalangga natun nga nagkaramatay.

Sa sugidanun ni Mark Anthony Q. Orquejo nga “Si Lolo Pelagio,” “Panguyang” ni Linda C. Arnaez-Lee kag ang “Ang Hulid” ni Arlene D. Nietes-Satapornvanit, nagapadumdum kanatun nga ang atun mga kabugtuan nga nagkaramatay, nagapabilin nga nagaimaw gihapon kanatun kag nagapabatyag ukon nagapakita sa mga buhi ilabi run gid sa mga marapit kananda.

Ang “Sirangan” kag ang “Masingki nga Kalag” ni Danny S. Tabuyan, nagapabutyag kanatun nga ang mga kalag nagapangayo kang bulig kang mga buhi. Kag ang pagpamalikid kag pagkangilin kang kang mga kalibutanun nga manggad, nga nagapabudlay sa kalag nga makaagum kang kalinungan, nga nabasahan man natun sa “Pihak-balay” ni Ritchie D. Pagunsan kag sa “Okupado” ni Maria Milagros C. Geremia-Lachica.

Raku ang atun naman-an sa riyalidad kang kabuhi: may mga nagakaratabo nga mabudlay ang pag-agum kang katarungan, tungud nga duro ang mga tawo nga indi natun mahimutig nga wara ti kaisug agud magpanindugan para sa katarungan, ang kabangdanan nga bisan ang mga kalag indi man maglinung kon indi maangkun ang katarungan. Mauti dya nga ginalaragway sa mga sugidanun ni Emmy L. Masola nga “Paayaw-ayaw Saot,” “Mga Litra” kag “Hustisya” kag ni Julbert R. Paloma nga “Tatay.”

Ang kahadluk sa kamatayun duna sa kada isara tungud hay kon lantawun natun, duna sa kinaugali kang kada buhi nga tinuga ang maninguha nga mabuhi kag magpadayon ang anang kabuhi, kag raad malikawan lang ang kamatayun. Amo ra nga bahul gid ang atun kahadluk kon makita natun ang mga itsura kang kamatayun kaangay kang ginalaragway sa “Oberpas” ni Arnaez-Lee, “Ang Abat” ni Pagunsan kag “Hagad” ni Tabuyan. Bisan gani ang mga pabutyag lang kang mga sarang matabo nagasala-sala kita nga kon mahimo lang raad mabalabagan. Dya nabasahan natun sa “Balay” ni Orquejo kag “Pangasa” ni Tabuyan, sa diin ang mga mga natungdan may pamatyagan run nga daan kang andang kaugalingun nga kamatayun.

May darwa ka mga makangiridlis kag makaharawat-hawat nga mga sugidanun, nga may iba nga hagyo kag sikad, ang “Balsamar” ni Rejie A. Talagtag, nga nagapahayon sa mga mitolohiya nga nagatudlo kanatun kang pagpaubus kag pagsakripisyo kang kaugalingun tungud sa pinalangga kag pamilya. Ang “Saub” ni Pagunsan nga mauti nga nagasaysay kang pagtabog kang yawa pagwa sa ginsab-an, nga nagbuul kang inspirasyon sa pagpanalawsaw sa matuod nga mga hitabo. Dya nagapamaramad kanatun nga ang gahum kang Makaako nga nagtuga kang tanan, amo sa gihapon ang madinarag-un, kag wara ti bisan ano nga gahum kang kalautan ang maglupig kag mag-uripun kanatun hay gintuga kita sa kaugalingun nga dagway kang Dyos kag ginhimo kita nga anang kaugalingun nga mga anak.

Sa pag-ukay kang atun mga pamisarun kag mga baratyagun sa dya nga kapistahan, kabay nga duro ang atun masagyap sa mga nag-alimbukad nga bagay sa atun mga kaugalingun, kag makilala pa gid natun kang labi ang atun kaugalingun kag ang atun rilasyon sa Dyos kag sa atun isigkatawo, agud nga kon mag-abot run ang tion nga magbiya kita kang dya nga kabuhi, indi kita malikupan kang kahadluk kag kahangawa sa kamatayun kang atun lawas, indi kita magburubalikid sa mga bagay nga indi kinahanglanun sa sunod nga kabuhi, kondi nga tadlungun natun ang atun pagginawi kag panurukan, kag magkakunyag kita sa paghiusa sa Dyos nga atun ginhalinan hay dyan Kanana ang wara nagakapalong nga kapawa kag ang kapupun-an kang kabuhi kag kalipay nga wara ti katapusan.

Ang tanan para sa mas bahul nga kahimayaan kang Dyos.

- Katapusan -