i Dodong kag si Neneng suud nga mag-abyanay

Halin pa kang sanda mga magagmay.

Sa iskwilahan tanda pirmi ang imaway

Kag sa mga urubrahun tanda gid gabuligay.

Ugaring sa paglipas kang panahon,

Si Neneng kay Dodong nahulog ang baratyagun.

Dayon nagbuul kang papil kag nagsulat

Kang pagtamud kay Dodong nga ana ginabatyag.

Wara na mabatyagan nga si Inday gapanilag,

Paghalin ni Neneng ginbuul ang sulat sa bag

Gani pagtamud na kay Dodong nabuking,

Amo dulang ang anang pagkangilin.

Sugod kato si Dodong wara dun gapanapak,

Kay Neneng kaugut na di hamak;

Sa mga sipal tana gid ang naglikaw,

Ang andang pag-abyanay gulpi lang natunaw.

Bisan anhun ni Neneng kapangayo kang patawad,

Kasingkasing ni Dodong daw bato ang katulad;

Asta nga sanda makagradwar sa ilimintarya

Wara man gihapon nagsapakanay ang darwa.

Kang mag-high school dun sanda

Si Dodong sa banwa nagpaamulya

Samtang si Neneng nagpabilin sa andang baryo

Kag pirmi na masugat-an si Dodong gasakay sa motorsiklo.

Kang gakolihiyo dun sanda, si Neneng aga pa maiskwila;

Nagbantay sarakyan sa binit karsada.

May gulpi nagdulog sa anang atubangan,

Motorsiklo kag si Dodong ang lulan.

Wara tana mahimo kondi ang magsakay

Wara timok-timok nihoy kag nihay.

Gapanagitlun kag ginatulun ang laway

Ginapanilagan si Dodong nga gakuriit ang dagway.

Pira man ka bis nga nagtabuay banas nanda,

Sa parkingan kang dyip rigto sa may banwa

Baw wara gid magsakay hay basi madisgrasya,

Abi na guro kay Neneng si Jonas ang kahalimbawa.

“Bahala kaw kon indi man timo magsakay,

Kon maurihi kaw sa klasi wara lang ti basulay,

Ipangamuyo ko dulang nga ikaw mag-ayadan,”

Hunahuna ni Neneng sa sulud kang dyip nga gadalagan.

Pagligad kang kapin disiotso anyos,

Tabuan amo man ang pagsikat kang Facebook.

Si Dodong nagasakay dun sa bahul nga barko,

Samtang si Neneng nagaopisina sa syudad kang Iloilo.

Sara kato ka adlaw, si Neneng ang nanguyus,

Sa ngaran kag hitsura nga ana nakita sa Facebook.

Si Dodong nagapakig-abyan liwan kana,

Butang nga wara na gid paglauma.

Kang mag-uli si Dodong para magbakasyon sa uma,

Nakita na si Neneng gapanaw sa karsada.

Anang gintawag kag ginpahapit sa andang balay

Gin-istorya kag ginpamahawan Coke kag tinapay.

“Neng, atun dulang kabigun ang mga nagligad,

Nga kabahin kang lamharun ta nga idad;

Kay ang Dodong nga dya sa imo naatubangan,

Lain dun kumpara kang una kag sa tulad.

“Wara kaso Dong,” ang simple na nga sabat

Ako nagakadlaw man sa paghanduraw kang nagligad.

Anhon ta bi kay mga bata iki pa kita kato nga tyimpo

Tanan nga dya sabat lang kang akun pag-ampo.

Sa kadya nga tyimpo ang mag-abyan liwat nga naghirup

Ang tanan nga mga klasmit nanda ang nanguyus.

“Basi bala kamo sa urihi magdayunay,”

Pabutyag nga may sakut panunlog ni Mikay.

“Marayu ra sa tigi ang imong ginapanumdum,

Kay si Dodong sa luyo kang anang nobya malipayun.

Ako man imo nga duro saralikwun kag sa daw manoglaon,”

Sabat ni Neneng sa mga klasmit kang sanda nagreunion.

Gani mga abyan ko rigya ko run lang tapuson

Ang akun binabaybay kay wara run sarang isugpon,

Bisan wara sanday Dodong kag Neneng nagdayunay,

Importante nabalik ang andang mayad nga pagtamdanay.