Hangus, lagas kang tyimpo

Basi bayaan kang eroplano

Hay ang trapik nga pirwisyo

Sa erport manimprano.

Bakwag kang mga karga

May ginaguyod, may ginabakintol pa

Ang tikit kag aydi siguroha

Basi pagsulud masablagan pa.

Sulud sa dipartyur ariya

Pungko kag magbasa-basa

Araguy rugokrok busong ko ba

Pagtimo nalipatan ko pa kaina.

Bungkras, kang malaud mangita

Abaw, dolyar ang bili na gid, ah!

Ahum, may dulsi pa man gali sa akun bulsa

Maglag-uk kang tubig kag mag-agwanta.

Ginhalin pa ang gawang nga guruwaan

Basi ang paglupad kang sarakyan mabuhayan

Kang mga karga pas-an kag bitbit ruman

Kudaw hay rayu pa ang sarayluhan.

Hay salamat inugsakay run sa eroplano

Una masaka ang rapit sa tambutso

Agud indi masangkay iba nga pasahiro

Makahulag kang tayuyon kag mahitso.

Pwisto sa purongkuan sa bintana nayon

Paha kang karig-un itakud dayon

Ay, daw ako lang haw sa hanay isaranhun?

Aw, ah, may mga dyan pa gali nga hurulatun.

Dya run guban kang magbarkada

Aguy, ingud ko gid ambung nga daraga

Sliblis, ab-ab kag manipis nga bistida

Abaw ramigan gid kar-on dya.

Suksok sanglas, antipara nga pula

Sa sulud eroplano nasilawan pa

Basi bala may blak-ay pa dya

Karadlukan pa gid basi may tigmata.

Sa kahawaan, daraga naturugan

Akun abaga kang anang ulo natangdayan

Bantay ako nga ginahadlukan

Basi polo ko nga ali-ali malawayan.

Sa pagpanguros abaga ko gapitik

Ang kadina kang rosarito nagalagatik

Nagapangadi parayu sa disgrasya

Kag panulay kang kaamyun kadyang daraga.

Kuon ko indi ko lang pagsapakun

Ugaring anang siko dyan sa akun iritukun

Abaw, Inday, indi mo gid ako pagsulayun

Hay sa kabuhi ako run may sarabtun.