Dali hapit kag magpamati

Sa mga istorya kang tyimpo lati

Istorya nga di mapatihan

Kang atun nga mga kabataan.

Kang una nga tyimpo

Suno sa akun nga Lolo

Malaka ang panimalay

Kag ang mga tawo pa gamay.

May sangka istorya parti kay Manding

Kon anda nga tawgon si Manding Kuring

Pirmi nagabagting ang talinga ni Manding

Kay ginapais-isan kang ayam ni Tonying.

Si Tonying nagtingala kang sangka gabii,

Kay ang ana nga bata nagahibi lang pirmi

Hindi magpabutang sa salug kang balay

Gusto lang ginalibang kang ana nga nanay.

Si Tonying nagabato sa ana nga kulba

Kay basi ginaaswang ang ana nga bata

Tana nagapaminsar kon sin-o ang panulay

Agud anang bata mangin mahilway.

Pagkasunod nga adlaw si Tonying nagbirada

Nag-inum ka tuba didto sa may tyinda

Nag-uli run gabii sa dulum nag-agi

Diritso sa sirong kag magpakuribung.

Sa anang paghulat ana nga nakit-an

Nagaparapit nga ayam sa ginapwistuhan

Pinsar ni Tonying nga tana run dya

Ang nagapanulay sa bata ni Maria.

Pag-abot kang ayam sa ana atubang

Dayon na ka buno sa tubug-tubugan

Nagdumuganay tanda hasta makapuyan

Ang panulay nga aswang anang napilasan.

Pagkaaga si Tonying nagtingala

Si Manding Kuring wara na makita

Gin-agtunan sa balay, dar-an na ka isda

Piro si Manding wara na makita.

Ano bala ang natabo kay Manding Kuring?

Anang pamangkutanun sa kaugalingun

Kang nabatian na ang hinuring-huring

Nga napatay run si Manding Kuring.

Ay, patawara, panulay kaw Kuring

Ikaw ang gindumog sa sirong ni Tonying

Manhaw nga nangaswang, nagbalos gid ikaw

Lantawa tulad ginadapuan kaw kang langaw.