Damul ang kadulum nga nagkunup kana. Ginpakamayad na nga magpirung gid lang. Halin sa pagbarikutot, gin-untay na amat-amat ang anang lawas nga buta ka lagub. Ginsukol na ang kalabug kag kalapad kang anang nahamtangan. Nagbagrong ang huni kang lata kang nagduut ang anang kahig kag mga tudlo sa sikwayan kag sa kilid. 

Sa sulud tana kang bahul nga dram!

Nagdasig ang anang manabaw nga pagginhawa nga nagasunod sa ragubdub kang anang dughan. Sangka hibubun-ut ang nagsungaw halin sa mara na nga tutunlan. Naghagung dya sa sulud ka dram kag nagpadumdum ka na kang anang pagkabata.

“Bitoy arikutuy, indi kasaka sa kahoy, gingus-ab ka baboy!”

Nagkirinadlaw ang mga bata nga nagakirinapol sa puno kang mangga kada hapon. Hapuon si Bitoy gani indi ka pagusto lumbayag pariho kang mga kaidad na. Husto lang tana magmusi-musi sa binit. 

“Mas aram timo. Indi sanda pagsapaka,” laygay ni nanay na.

“Batuan mo sanda sa pamaagi nga masarangan mo,” dugang ni tatay na. 

Ang kulang ni Bitoy sa lawas ginbawi gid man kang anang utok. Nalampuwasan na ang hapo kag pagkaarikutuy sa haysul. Numiro uno pirmi sa klasi gani duro ang bulig sa kolihiyo hasta nga nakatapos tana kag nangin ikspirto sa computer programming. 

Tumalagsahun ang abilidad ni Bitoy. Daw kamira anang utok. Kon ano ang anang mabasa, napagkit dya tanan sa anang utok. Ang dyang abilidad nagdara kana sa Japan, sa Amerika, kag kar-on sa binukid kang Afghanistan. Sa anang utok nasal-ut ang ditalyi kang bag-ong armas kag listahan kang manogbaligya kadya. 

“Ano liwan himuon nanda kanakun?” pamangkot ni Bitoy.

Ginsabat tana kang pag-umpisa ligid kang dram. Mapino ang ginaligidan, aspalto. Sa sulud siguro tana ka bahul nga kamarin. Nabatian na ang pag-irigut kang mga kabli kag may nagaragusros, basi gawang nga dimotor.

Nagdaguldul ang dram pagwa. Nagmukra si Bitoy kag nakita na ang pagtuhog kang kasanag sa gagmay nga mga buho sa anang uluhan. 

“Ginuo, ikaw lang maaram kanakun,” hutik ni Bitoy.

Nagginhawa tana kang dalum. Ginbutang na ang anang hunahuna sa daray-ahan kang isla nga anang binayaan. Nagkalma tana.

Naman-an ni Bitoy ang tuyo ka mga nagdakup kana. Bisan ano pa nga pagkastigo ukon pagtubluk ka mga droga, indi nanda mabuksan ang sikrito sa anang utok. Ang pinakalikum na nga abilidad amo ang pag-overwrite. Sarang na sampawan ang orihinal nga datos sa anang utok kang bag-o nga dokuminto. Sa kompyutir, sarang ma-undo ukon mabalik sa orihinal ang pag-overwrite. Ang kay Bitoy, posibli malubad ang pinakaurihi nga sampaw piro indi gid masapwan ang orihinal. Hasta tatlo ka anib ukon pagsararampaw ang masarangan na. Tanan pati ang orihinal nagapabilin sa utok na.

Ang dokuminto kang armas ginsampawan na ka mga litrato kang anang ginikanan nga ginsampawan pa gid kang anang pasaporti. Sa pinakaibabaw ang kopya kang pangamuyo ni San Francisco kang Asisi.

Nagragusrus liwan ang dram. Dungan sa pagkadura ka mga pintok kang kasanag nabatyagan na ang paghulog kang dram. Nagtimpasaw. Dalum ang awang. Nag-umpisa tana kang paranambitun.