Pagkabati ko kang balita nga wara run ikaw

Liwan nagbalik ang mga matam-is nga handurawan

Katong nakaimaw ko ikaw sa akun pagbakasyon

Rugyan sa inyo lugar sa Toronto.

Ang imo mga pagpapalangga kag pag-atipan

Akun nabatyagan sa mainit nga istorya

Nga daw pandisal nga ginasawsaw

Sa sangka tasa nga kapi kang pagkahidlaw.

Wara gid ikaw ti kinalis

Sa akun Nanay nga imo magurang

Nga matunog ang limug

Kon nagabais ukon nagalahug.

Tyoy, hidlawun gid ako kanimo

Kapin pa ang atun lagaw sa kasino

Kag pamakal sa mga mol

Kag pakodak sa Niagara Falls.

Daad, kon wara ikaw gintiplang

Kang traidor mo nga dughan

Makitaay pa kita liwan kon tugtan

Kang Makaako nga labaw sa tanan.

Duro gid nga salamat Tyoy Rudy

Nadura kaw man rugya sa kalibutan

Piro ang imo mga handurawan

Magapabilin sa akun dughan.