Nagbagting ang orasyon.

Nagpurundo haros tanan nga mga tawo.

Naghiripus.

Huni lang kang mga sirum-sirum

kag lingganay ang mabatian.

May nagapanguros bangud sa unay nga pagtuo.

Ang iba nagduyu lang hay indi malyag

kun-on nga bastos kag wara ti modo.

Ang iba nga nagadali

ginpasulabi ang tyimpo sangsa rispito

nagpadayon panaw kag wara man ti nagriklamo.

Naghipus man si Tiking

samtang nagadaguok ang anang busong.

Ang pirambilog nga mga mal-am nga bayi

nagsugod run ka rosaryo

sa sulud kang kapiya kang barangay

nga ginhayaan anay ka anang tatay nga napatay

bangud sa lastro sa atay.

Ang kada bagting nagapanaludsud

sa anang talinga kag nagasabat sa anang busong

daw pindulum kang daan nga orasan

nga ang tagsa ka labyog nagapadumdum

kang mga inoras nga naglipas

kag kaduruhon kang mga higayon

nga tana nalipasan ka gutum

samtang nagahulat sa wara maman-i

nga pag-abot kang kaluoy ukon kamatayun.

Gintangra na ang nagakiraw nga langit.

Wara ti uran nga paraabuton.

Ang gal-um niwang pa sangsa kana

ginawaslik kag ginasika-sika

kang mga tulabong nga nagainudyak sa kaburusgon.

Gulpi lang tana naima sa mga tulabong.

Ginduko na ang anang ulo.

Ginhakup na ng baras kag ginkuum.

Nadumduman na ang mga nangamusta kana

katong antis iliksyon:

priska pa sa anang huna-huna

ang ginbuy-an da nga pangako

nga tana paobrahun para makakaun.

Piro ano run to kag diin run?

Nag-untat run ang bagting kang lingganay

piro padayon ang mga mal-am

sa pagmitlang kang andang mga parangadiun:

“Maghimaya kaw Maria, buta kaw kang grasya ….”

Padayon ang pagragukrok kang anang busong.

“… matuman ang imong pagbuut 

rugya sa lupa kaangay man sa langit.

Tugrui kami kang amun karan-un sa adlaw-adlaw ….”

Nagtangra tana liwan

kag nagluhod.

Nagginhawa it madalum.

Kaangay kang uran sa tingadlaw,

nagturo ang mga luha

sa nagapirung na nga mata.

Nadumduman ang pagharuk

ni Hudas kay Hesukristo.