Abaw sa kanami gid kang Kinaray-a

Hay bisan ano, may ngaran nga ana

Kada sahi, may sampat nga tinaga

Kada huray, may sukol nga gintagna.

Ang tawag sa kabo, kaltiks

Ang ginagamit manipilyo, kolgit

Ang pang-unaw sa dapli, bitsin

Ang tawag ka sulo, plorisin.

Pag-abot sa sahi, wara ti pili

Ang subay nga gakamang, duro ti ngaran

Kon pula, lasga, kon itum, guyum

Kon bahul, pala, kon gaming, suming.

Huray sa lupa, sangka puna

Huray sa paray, sangka tugday

Baylo sa sinsoro, murugbas nga sangka trisyo

Baylo sa lumay, gugma ni Inday.

Ay, ay, ay, dali lang

Tinaga ko nagtalang

Daw libagun ang sugpon

Piro sigi lang, padayon

Bisan wara gasanto

Himuan gid pahito

Para ang mga tiko

Magsigo-sigo.

Hamakun mo ra

Bisan suruklan ang hambalan

Indi gid madura

Ang pagkutso-kutso

Ang gapamunung nga lumay

Iimaw gid kay Inday

Ti, ano to bay?

Tanda gid nagdayunay?

Amo dya ang Kinaray-a

Makarilingaw ang mga tinaga

Wara't butang nga bag-o

Wara't tawo nga istranghiro

Tanan may istorya

Langkay sa kultura.