Kaptan ang silhig, sigi ang wahig

Yab-ukon nga salug kag papil nga madanlug

Gasaprat imaw kang mga plastik sa basurahan

Akun itablug basi magrapta liwan.

Ang balhas nga nagaturo ginapahid lang sa bayo

Nagadali basi mauranan, wara dara bisan kalo

Wara man kwarta nga inogpliti

Hay ginbakal kang dapli nga tagkinsi.

Mayad lang hay ang mga bangko natumpok dun

Ang bintana akun run lang siraduhon

Kag kang lamisa ako manarapo

Pamatyun ang sulo kag gawang manarado.

Gadali-dali panaog sa madulum nga hagdanan

Patay! Anhun ta hay naabutan ka uran

Mayad hay tarithi pa lang, panawun ko run lang

Dasig ang tikang basi makursunadahan sa dalan.

Pag-abot sa balay nga ginadayunan

Mahimos pa ako para magtig-ang

Ang bugas bag-ong galing halin sa uma

Ginpadara ni Nanay imaw kang atsara.

Matuon pa ako, bisan gabii dun

May ginsiroks pa nga sauluhon

Sa rum-an ang paynal iksam

Kanami dun gid daad ibatang.

Daw mapirung dun mata ko sa Algebra

Gaparanamgo kang X kag Y nga rilimpyuhan 

Hay may P.E. nga daan sa rum-an

Ang mga istudyanti sa iskwilahan.

Bisan ano run lang gasulud sa pinsar ko

Sobra gid kakapoy dapun ang katuyo

Wara man garing ko it mahimo gapamugon lang si Tatay

Kag husto lang sa utang ang swildo ni Nanay.

Nahidlaw run gid ko mag-uli sa balay

Ugaring mahal ang pamasahi ipaiway anay

Dali run lang ang gradwasyon, gamay nga antos

Makatapos gid man sa kaluoy kang Dyos.

Makasaka gid man tanda sa intablado

Ang step-in ni Tiyay ihuramun ko

Ipasuksok ko kay Nanay para wara gasto

Ang kay Tatay pantalon kag takong ni Tiyoy.

Dayon mapakodak kami tanan

Pati akun libayun nga kalibaynan

Ipakabit sa dingding kag turuk-turukun

Kon may bisita ipahambog dayon.

Ay! Danay, may gapanapug

Sus, tinig-ang ko gali, nasunog

Sa sobra ko ka daramguhanun

Nalipatan ang sinun-ad nga yapon.