Ang tabig ginasudlan kang paray nga ginaani, ginataklus sa hawak anang kawu nga nakaposisyon sa kilid ka lawas. Nagakaput kang kayug nga nagaani, kada buta kang alima nga sangka gamul ginabutang ria sa sulud kang tabig. 

Ang manograra mga sagad gid magrara kang tabig. Amo karia andang hilig maghala ka arara kag ibaligya. May mga arti ang pag-obra ka manograra kag nagahimo ka nagakalain-lain nga disinyo. Pag-un ang andang trabaho kag pino ang pagkaobra. Ang manograra maaram magtanto sa husto sa edad kang kawayan nga ginasukdap para ihimuon nga tabig. 

Ang tabig may apat ka pamusod kag malapad ang buli. Ang kada pusod ginapadamul ka uway para may proteksyon dipinsa sa pagbungggo-bunggo mintras nga ginakamit. Ang pusod kang tabig kon wara ti pangpadamul, amo ria nga bahin dali marangga.

Natuipan nga ang pangpadamul sa pusod kang tabig nakabulig sa pagtipig ka gamit para buhay maguba. Ang uway ang ginabutang hay malig-un kag mahunit nga klasi ka balagun. May mauti nga disinyo ang ginabutang nga uway para manami lantawun.

Ang lawas kang tabig bahul kag nagapataas hasta sa tuhod nga nagapagamay paagto sa anang baba. Gamay ang baba kag may nagapabilog nga kahoy. Mauti gid katama ang pagrara kang tabig. Ang iba nagaespisyal sa pagpahimo kang andang nagustuhan nga kabahulun. Ang tabig may mga kabahulun ria kag nagadepende sa masarangan kang manogkarga. May bahul para sa mga lalaki, medyo bahul para sa mga babayi, medyo gamay, gamay kag pinakagamay ang ginahimo para sa mga bata.

Ang iba nga manograra ginabutangan nanda kang silak ang tabig para nga mangin durabli, manami ilantawun nagaidlak, may proteksyon kontra sa uran kag kon mabasa man gani indi mahumud hay ang ginrara nga kawayan pino anang sinukdapan. Ang silak nakasilyo sa pinanid kang anang sukdap nga kawayan.

Ang tabig may talinga ria nga uway bali tatlo kabilog, isara sa pinakadalum kag ang darwa sa ibabaw nga naga-antadanay rudyan sa kilid nayon sa ubus ka baba kang tabig. Rudyan karia ginasulud ang kawu sa talinga para mauribay sa abaga paagto sa aranyun, mauribay kon magtugday kag mawaklus sa hawak nga nagaani. Ang anang kawu daw paha ka lapad para nga indi maglubung sa hawak, ilabi run gid kon buta run kang inanyan ang tabig sobra ka mabug-at. 

Ang tuo nga alima nagakaput kang kayug sa pag-ani, ang tabig nga ginawaklus nakaposisyon rudyan sa wala nayon nga kilid para hulas lang sa pagbutang kang inupong nga naani.

Bahul nga inupong ang ginabutang nga nakaplastar sa dalum kang tabig, amo karia ang ginatawag nga pinakasalad. Masigi kaani, kada buta kang alima ka sangka gamul idugang ria hasta nga magbahul ang inupong. Hala sigi kaani kag maghimo liwan kang bahul nga inupong kag isampaw rudto sa pinakasalad nga nagapaikis ang pagbutang. Sigihun nga ani kag maghimo kang mga inupong kag ipaantad sa sangka upong, ang pagbutang kang inupong nagapabuyung sa sulud kang tabig ang posisyon ka uhay kang paray. 

Kon ang sulud kang tabig nagagabang run, ihuksun ang tabig sa hawak para libri ang hawak nga wara ti karga nga mabug-at. Kon indi mo ria paghuksun nga tabig nagatakilid gid kaw sa kabug-at kang paray. Pagbutang kang tabig sa dagami, magpadayon sa pag-ani, itongtong anay ang inanyan sa dagami hasta nga magbahul ang inupong, kon duro run gani ang naani, ihakwatun ang mga inupong kag dugang sa tabig hasta mabuta. Ginadasuk gid ria kamayad ang inani, ang iba gani ginalapak para duro anang uyas sa idalum ka tabig.

Andut sa ano nga ginahimo nga sangka upong ang pagsulud sa tabig? Ang rason amo nga hulas lang ihabwaun sa pagtugday ka paray kon bahul ang inupong sa sulud ka tabig. Ang sangka upong bali darwa ka gakap sa alima ang maghakwat paggwa sa tabig. Kon may pulo kang upong ang sulud kang tabig mo bali pulo man to ka kuub-kuub mintras nga nagahabwa ka inanyan. Duro gid karaku nga kuub ang mahimo mintras nga nagaani. Kon may makita kita nga ginikanan ukon pumuloyo nga indi run makauntay kang andang likod, amo karia ang resulta sa sobra nga pangabudlay sa uma. 

May rudyan nga nagaani, kon mabuta gani anang tabig gana-ani pa, ginalapak na hasta gid nga magdasuk ka husto nga nagakarauyas ang mga inuhay. Andut sa ano? Nagahingamo nga may uyas ang dalum kang anang tabig maghapon. Pasimpalad, maman-an ria sa tion nga ipartidahun ang inanyan. Ang tag-iya lang maaram kon ano ang anang mahusga. Rudyan makita ang kaluoy ukon maigud nga tag-iya kang aranyun.

Ang tabig mabug-at nga kargahun paagto sa tugdayan. Makita mo ang mga tawo nagalatay sa kahon nga may karga nga tabig: may nagapas-an, nagalukdo, ginasusuon, nagauribay, kag may nagatingga-tingga ilabi run gid kon may asawa nga imaw nga mag-ani. Rudto sa turugdayan ginadara ang paray sa pagtugday.

- Sundi ang kasugpon kang atun sugidanun