Ikatlo nga Bahin: Island Hopping sa Honda Bay

Sakay sa van, masadya ang tanan. Samtang nagadalagan ang sarakyan, nagkinantahanay kami. Gin-umpisahan ni Kelly ka kanta kag ginsugpunan man ni Yully. Nagpalakpakan ang tanan. Daw sa karaoke lang. Pati ang drayber kag si Jenn nga tourist guide nagyuhum-yuhum pamati sa front seat. Gintukso nanda nga magkanta man si Kaye kag Stephen. Patad man si Stephen kang ana disco rock nga kanta. Nga daan disc jockey tana. Si Kaye tana wara gid mapirit nga magbirit. Kang akun run turno, syempre indi magpapyerdi. Kinantahan ko sanda ka Turagsoy! Ti man, sampat gid ang timplada. Samtang nagakanta ako, bak-ap ko man sanday Kaye kag Stephen kag ang mga tukap kang mga Koreana. Bisan wara nanda naintindihan ang kanta basta nanamian sanda kang tuno. Mahilig sanda nga daan magkanta kang mga masadya kag magsaot. 

Pag-abot namun sa pantalan kon sa diin rugto nagahulat ang baruto nga amun sakyan, nagpinakodak liwan kami. Ginpasuksok kanamun ang life jacket antes kami magsaka sa baruto. Tam-an ka kalmado ang dagat. Daw lana sa kalinaw. Wara ti makita nga balud. Paagto kami sa Isla Starfish, ang una nga isla sa Honda Bay. 

Pag-abot namun sa isla, duro nga mga turista ang nagasalum sa paglantaw ka mga isda. Ginsuksok man namun ang amun nga snorkel mask. Duro ang mga koral kag mga bato gani indi malikawan nga mapilas kami samtang nagasalum sa paglantaw kang mga isda. Nagdara kami ka tinapay paraibubod sa mga isda. Ginsirib kang mga isda ang tinapay sa akun palad. Nagpisik pa ang iban sa pagduut sa akun panit. Kadya pa lang ako nakasnorkel. Daw sa aquarium lang lantawun ang mga isda. Lain-lain ang mga duag. Sa pagkanami lantawun! Nanamian man ang mga Koreana. Daw indi pa raad sanda maghalin ugaring nagahulat ang mga isla kang Luli kag Cowrie kanamun.

Pagkatapos kang pakodak, nagbalik kami sa baruto. Paagto kami sa Isla Luli. Rugto ang manami nga languyan kag daybingan. Sa baruto pa lang, nalangkag run sanda maglangoy. Samtang nagasakay sa baruto, nagpinakodak sanda dara ang posing nga sa daw nagaintra sa Lin-ay kang Antique. Bilib man ako sa mga mal-am nga dya, wara mayha-mayha magbilad ka anda lawas. May mga korte gyapon bisan medyo kurinut run.

Pag-abot namun sa Isla ka Luli, wara kami ti gin-usikan nga tyempo. Nagpaayaw-ayaw kami ka rigos. Manami hay wara gid ti bato kag malapad ang manabaw nga bahin. Puti ang baras kag wara ti daragkul nga balud. Sa unahan may daybingan. Nagdayb si Judy, sunod sanday Hera kag Kaye. Nagsaka man si Stephen. Pero pag-abot sa ibabaw, inabot ka anang katalaw. Ginpalampas na ang pira ka mga turista nga magdayb. Ginpaisug namun tana nga maglumpat run pero wara gid. Ginsakaan tana ni Judy kag ginpaisug ang buut nga maglumpat. Nakalampuwas gid man si Stephen sa ana kahadluk. Nakalumpat gid man sa daybing bord.

Nakabatyag kami kagutum. Nagpamat-ud kami nga mag-agto sa Isla ka Cowrie. Rugto nakakontrata ang amun igma sa sangka buffet nga restawran.

Mas duro ang tawo sa Cowrie kumparar sa Starfish kag Luli. Duro ang mga turista nga puti. Antes kami maglangoy liwat, nag-igma kami anay. Duro ang mga papag nga kawayan sa palibot ka restawran. Manamit ang tanan nga pagkaun. Busog gid kami tanan. Nagpahuway kami sa papag nga kawayan samtang naga-inum ka mango kag buko shake. Wara run ka parigos ang iban, nadiretsuhan ka turog. Daw ginduyan sanda sa matawhay nga dupuy-dupuy ka hangin. 

Sirum run kami nakabalik sa pension haws. Nagbakal liwat sanda ka mangga kag kapayas nga luto sa prutasan sa binit ka karsada pag-uli namun. Pagkaaga, naglain ang pamatyag ni Cherry. Siguro namag-o ang busong sa mangga kag kapayas nga ginkaun. Wara run tana nagpamahaw.

Kadya nga aga, maagto kami sa Underground River. Ang labi nga ginakalangkagan kang tanan.

- Sundi ang kasugpon kang atun sugidanun