Gindawu kanakun ni Stephen ang kartolina nga may printa nga “Welcome Judy and company.” Man si Judy ang mangulo kananda nga siyam. Anad run dya sa byahe kag pinakasagad kananda mag-Ingles. Mataas, seksi, kag pasyonista dyang si Judy. Sais syenta anyos run ang edad pero indi mo makita sa itsura na.

Nanukduk man kami sa mga tawo nga nagahulat sa gwa kang arrival area. Rugto gid kami sa unahan nagplastar para makita namun dayon ang pag-abot nanda. Mga sangka oras man gawa ang hulat namun. Pasado run ala-una sa kasanagun kang maggwa si Judy nga ginaguyod ang maleta.

Siyam sanda nag-abot halin sa Pusan: sanday Judy, Azalea, Yully, Kelly, Audrey, Hera, Rose, Cherry, kag Sylvia. Amo dya ang mga Ingles nanda nga ngaran. Ginpanghimuan ko sanda. Kabudlay abi magsaulo kag magmitlang kang mga orig nanda nga ngaran. Daw naga-tongue twister timo. Halin sa sais syenta hasta sitenta anyos ang mga edad nanda. Pero mapagsik gihapon bangud mayad sanda magsagod kang andang mga lawas.

Pagkatapos kang pira ka oras nga pahuway sa hotel, naglupad kami paagto sa Palawan kang mga alas otso kinse sa aga. Pasado alas nuwebe kami maghugpa sa Puerto Princesa, ang banwa kag pinakasentro kang Palawan. Nagdiretso kami sa pensyon haws nga amun istaran. Rugto kami maturog sa sulod ka tatlo ka adlaw nga tiner namun sa Palawan.

Bangud kapoy tanan sa byahe, sa una nga adlaw ginapakamayad namun nga maglagaw anay sa syudad. Pagkatapos namun igma sa Seafront, sangka restawran sa binit ka baybay, nagsakay kami sa van paagto sa Baywalk. Nagapurutika lang ka iningles ang tourist guide nga amun imaw. Bata pa dya pero anad run kag saulado na ang mga detalye kang lugar nga amun ginaagtunan. Sa baywalk, nakita namun ang mga daw higante ka daragkul nga mga krismas tri nga puro himo halin sa plastik nga botelya kang softdrink kag ang iban himo sa newspaper. Kon gabii mas nami kuno lantawun ang Baywalk bangud sa mga ipot-ipot nga nagalinupad nga nagpadugang kang kaambung kang kagab-ihun ilabi run gid sa mga naganobyahanay. Pero bangud kulang kami sa oras, wara namun masaburan ang dya nga ralantawun. Nagdiretso kami sa Plaza Cuartel. Nagaatubang dya sa dagat. Rugya sa idalum ka lupa ginpangsunog ang indi magkubus-sobra sa mga siyento singkwenta nga mga suldado nga mga Kano nga bihag kang mga Hapon katong tiyempo giyera. Nasulat sa saway nga monyumento ang mga ngaran kang onse nga nakaluwas paagi sa paglangoy sa dagat paagto sa Iwahig. Pagkatapos kang pakodak nagbalik kami sakay sa van diretso sa Crocodile Farm.

Labug ang pila sa Crocodile Farm. Indi basta-basta makasulud kon indi magpamati anay kang mga paandam. Nakita namun ang tul-an kang pinakamal-am nga buaya. Nakita man namun ang halin sa pinakabata ukon pinakagamay nga buaya hasta sa pinakamal-am ukon pinakabahul. Naglatay kami sa tulay para malantaw kamayad ang mga buaya nga nagalantaw kanamun sa anda mga kurong sa idalum. May naglahug pa nga, “Dya gali duro senador!” Nagkaradlaw ang mga nakabati. Nagpakodak man kami nga ginakaptan ang sangka bata nga buaya. Daw hadluk pa raad magkaput ang iban pero kang mag-klik run ang kamera, nagkuhit man.

Pagkatapos sa Crocodile Farm, nagdiretso kami sa Mitra’s Ranch kag Baker’s Hill. Malapad kag barabanglidun ang Mitra’s Ranch. Kag kon magtungtong ikaw sa ibabaw ka banglid, makita mo sa idalum ang kalapadan kang ranso. Matawhay kag mahangin-hangin sa naibabaw nga bahin, butang nga duro ang nagaagto kag magpuropungko. Pagkatapos kang pira ka pakodak, nagdulhog kami sa Baker’s Hill. Rugto namun nakita ang hopia nga may lain-lain nga sabor. Duro man mga turista ang nagabakal kag nagapinakodak. Nadumduman ko ang Antique. Kon raad ginataw-an man kang pagtalupangud ang turismo, duro man ang lugar sa atun nga pwede mapabugal.

Naghapit kami sa souvenir shop kag sa prutasan antes kami mag-uli sa pensyon haws. Nagbakal si Cherry kang aritos nga perlas kag si Kelly kag Hera nagbakal ka lima ka kilo nga mangga. Pag-abot sa pensyon haws, amo to gin-udakan nanda. Pagkagabii tapos yapon, ginmasahe sanda ni Stephen. May abilidad man gali si Toto Stephen maghilot. Nagatagaktak ang balhas nga nagahilot samtang sige ang istorya. Kaluyag lang kang mga pirot-mata nga dya nga mahasa ang anda Ingles. Pagkatapos ka masahe, mahamuuk ang anda turog para pa gid sa masunod nga lagaw sa rum-an, ang island hopping sa Honda Bay.

- Sundi ang kasugpon kang atun sugidanun -