Sangka semana antes ang Septyembre 18, nangayo run si Omoni (nanay) kang budget para sa Chuseok. Ang Chuseok amo ang Thanksgiving Day ukon Harvest Festival sa Korea. Tatlo ka adlaw nga bakasyon kag pagsaulog sa bilog nga nasyon kang Korea.

Gintaw-an ko si Omoni kang 300,000 won ($300) halin sa bonus ni Bruce nga bana ko para ipamakal kang isda, prutas, kag mga laswa. Dapat antes ang Chuseok, nakapamakal run hay sigurado sarado run ang mga tindahan sa amo nga adlaw.

Sa una nga adlaw, magaabot ang tanan nga miyembro kang pamilya (magluwas sa bayi nga bata nga nakapamana hay rugto ria tana maagto sa pamilya kang anang bana). Mahimus kag magraha kang mga pagkaun pareho kang ginpausbungan (steamed) nga isda, tangsokuk (beaf soup), mga laswa, songpyeon (traditional rice cake), kag thuigim ukon pinirito nga kamote ukon lukos para sa miryenda. Kon kaisa, ginabakal run lang sa tindahan ang songpyeon hay mabudlay kag mauti ang paghimo.

Sa ikarwa nga adlaw, amo ang mismo ang adlaw kang selebrasyon kon sa diin antes magkaun, nagahiwat anay ang pamilya kang Chesa- sangka ritwal nga paghalad kang pagkaun sa mga patay. Naghalin dya sa tradisyon kang Buddhism gani wara nagahiwat kang Chesa ang mga Kristyano kapin pa ang mga Presbyterian. Isara run dyan kara ang amun pamilya.

Ssa ikarwa nga adlaw, pagkatapos kang pamahaw, mauli ang mga manugang (daughter-in-law) sa anda probinsya. Si Hyeongnim (manang) una pa lang nga adlaw nag-uli run. Nahadluk ka trapiko kon sa sunod pa nga adlaw mapanaw.

Sa ikatlo nga adlaw, amo ang pagbalik ruman kang mga nag-uruli sa anda probinsya. Para sa mga wara nag-uli kag wara it ulian pareho ko, naghagaday kami ni Bruce nga maglagaw. Plano namun ilagaw ang mga bata sa Taejongdae, sangka bantog nga tourist spot sa Busan, South Korea, kon sa diin makita mo ang sangka isla kang Japan kon maghunas ang tubig sa dagat. Wara kami kaabot sa amun destinasyon bangud sa sobra nga trapiko. Nagaigud lang mga sarakyan. Nagbalik kami para maglantaw ka sine sa Nampodong. Pero wara hingan, ubos run ang purungkuan para sa amo nga adlaw. Nagdesisyon run lang kami nga magkaun sa Pastahan antes mag-uli.

Makapoy man ang tatlo ka adlaw nga Chuseok ilabi run gid sa mga nagasunod gid ka dyang tradisyon. Kapin pa sa mga naga-Chesa kag sa mga nagauli pa gid sa anda probinsya. Siguro mabudlay kag makapoy ria para kananda. Pero para kanakun bilang pangayaw nga manugang, Kristyano, kag wara it probinsya nga ulian, sangka matawhay nga pagsaulog ang dyang tatlo ka adlaw nga pahuway. Pahuway halin sa matag-adlaw nga ritwal kang pagpangabuhi.