Ginkahuya ko ang imo dagway

Panit nga nabulad sa init

Sa pagtaris sa mga kabalayan

Sa pagpangutang kang akun inogbakal lipstik

Kag pradyik sa eskwelahan

Gintapi ko ang mga alima mo nga pasmuhon

Nga tuyo magpuhap sa akun uyahun

Nangil-ad sa mga daw lago nga ugat

Kag sagapra nga kibol nga naglitik

Sa imo mga palad

Andut wara ko makita?

Ang pagpalangga sa imo mga mata

Ang kabalaka sa imo limug

Ang kabudlay sa imo lawas

Kag huyhoy nga mga abaga?

Tulad rugya ako

Sa atubang kang ispiho

Kag nakita ko ang imong laragway

Mismo sa akun pagkatawo

Bangud ako sangka Nanay run parehas mo.