Ikalima kag Katapusan nga Bahin: Boracay

Guyod ang maleta kag uribay ang bag, nangita kami kang amun sarang maistambayan sa airport. Nagsugtanay kami nga indi maghotel bangud aga pa sa rum-an ang amun flight pa-Boracay. Nag-istambay kami sa sangka café sa unahan ka arrival area. Para patinirun kami kang malawid, nag-order kami kang kape kag sandwich bisan wara pa kami nagutum. Kami lang nag-ukupar kang lugar. Nagpangabay lamang kami sa manager nga kon pwede matinir kami hasta ala-una sa kasanagun.

Pagkaala-una, nagsaka kami sa ibabaw para magtsek-in pa-Boracay. Gamay ang eroplano gani pulo lang ka kilo ang pwede ma tsek-in. Nagbayad kami para sa sobra kang amun dara.

Pag-abot namun sa airport kang Caticlan, naga-uran. Nagkabalaka kami tanan. Basi indi madayon ang amun island hopping kon mag-amo kadya ang tyempo. Pero hambal ni Anne, ang tourist guidenga nag-alaw-alaw kanamun, madura lang man kuno ria kar-on paglampas kang alas nwebe sa aga. Daw sa ginlabo sa bato ang hambal ni Anne, pagkalampas alas nwebe nag-untat ang uran. Kang amo nga tyempo rugto run kami nagasakay sa baruto paagto sa Boracay.

Sa Zone 1 kami nagdayon. Duro nga mga turista ang amun nasug-alaw kag nakita. Daw pyesta lang sa karakuun kang tawo. Pagkatapos kami nakaplastar kang amun dara, nagdesisyon kami nga magpahuway anay kag sa rum-an run lang ma-island hopping. Nagpatawag kami kang manogmasahe sa hotel nga amun ginadayunan. Kanami magbatang sa malum-uk nga kama nga ginamasahe ang bug-os nga kalawasan. Nahamuukan kami ka turog. Pagbugtaw namun sirum run. Wara run kami kaigma, nadiretsuhan kami ka turog. Naghimus kami para magyapon sa sangka buffet nga restawran sa unahan ka hotel nga amun ginaistaran.

Kalabanan nga ginkaun kang mga Koreana seafoods. Wara sanda ti problema sa dapli. Ang wara nanda nauyunan amo ang kan-un. Baskug kag daw mapalid kuno kang hangin kon huyupun. Naanad sanda sa kan-un nga maragkut sa Korea. Wara nanda matulupangdi kon andut. Ria bangud nga ang anda ginagamit chopsticks gani kinahanglan nga maragkut ang kan-un. Rugya sa Pilipinas, kutsara ang ginagamit gani pabor man nga rupsak ang kan-un.

Nagpabilin sanda nga mga Koreana sa binit ka baybay nga nagapungko sa bangko kang restawran. Gusto nanda mag-istoryahanay nga tanda lang. Nag-una kami uli nga apat. Ako, si Stephen, Kaye, kagAnne. Sa sobra ko nga kakapoy, gusto ko run lang maghaplak sa katre. Sanday Stephen, Anne, kag kaye, nagrigos pa sa baybay katong gabii.

Pagkaaga, tapos pamahaw, naghagaday kami nga maglibot sa isla. Bangud mabalud, nagsakay sa multikab. 

Tatlo ka tourist spot ang amun gin-agtunan. Nanamian sanda kang ralantawun. Kanami kang dagat. Puti ang baras kag malapad ang manabaw nga bahin. Bukut kantilado gani nami rigusan. Nag-alok-alok ang iban samtang ang iban nagpabilin sa binit kag magpinakodak sa manami nga view kang dagat. Pagkaburubhay nanawag si Anne nga maagto kami sa Puka Beach. Rugto duro ang mga baraklun nga pangsubinir. 

Nagsakay liwan kami sa multikab paagto sa Puka Beach. Duro ang mga gagmay nga tindahan kang mga bayo kag subinir nga himo sa pakinhasun. Namakal kami antes mag-igma.

Kanamit kang mga dapli sa restawran nga amun gin-igmaan sa Puka Beach. Binuog nga baboy, tinola nga manok nga may lakut nga kapayas kag dahon ka katumbal, binuog nga isda nga may sawsawan nga sinamak, kalamares, kag iban pa. Prutas kag softdrink ang ginpadalundun kanamun. Busog gid ang tanan. Nagbalik kami sa hotel nga amun ginadayunan. 

Pagkahapon-hapon, nag-sailing sanda sakay sa baruto. Tabuan gid nga nagahinalup ang adlaw, gani ang sirak na nagpapula kang tubig kag gal-um sa langit. Nagnganga ang mga baba nanda sa pagdayaw kang katahum nga anda nakita. Dya tanan akun lamang nabatian kananda. Nangusul ako kon andut nagpabilin ako sa hotel. 

Katapusan namun nga gabii sa Boracay. Sa rum-an sa aga, mapanaw kami pa-Antique. Bangud sa kakapoy bilog nga adlaw, timprano pa nagturog ang iban kag ang iban nagpamasahe liwan. Kami nga apat, ako, Stephen, Kaye, kag Anne nagwa para maglagaw. Naghapit kami kag magpungko sa sangka diskohan. Nag-order si Stephen kang beer. Nagsaot sanda ni Anne, kami ni Kaye naglantaw lang. Pagkatapos kang pira ka botelya nga lab-ok, naghinay-hinay kami pauli sa hotel. Naagyan pa gid namun ang nagasilapid kang buhok. Nagpasilapid ako. Butang nga ginkaimahan kang mga Koreana pagkaaga.

Sakay sa darwa ka van paagto sa Antique, naghapit kami sa Tibiao fish spa. Samtang nagadalagan ang sarakyan, naagyan namun ang mga pamalay nga naguba kang bagyo nga Yolanda. Naluoy ang mga Koreana sa anda nakita. Nadumduman nanda kon andut ako nangolekta kang mga relief goods kato. 

Pag-abot namun sa fish spa, nasugpunan ang topiko parte sa bagyo. Nga ang andang nakita, amo ang nabilin kang bagyo nga Yolanda. Gamay lamang ang mga isda kag daw ginpabay-an ang amo nga spa. Ginpaathag kang tag-iya nga nagaplano sanda nga magsaylo kang lugar.

Nagpungko kami tanan sa spa. Nakabatyag kami kang katawhay samtang nagabatang sa banig kag ang amun mga kahig nagakaway sa tubig. Ang iban nakalaman sa sirib kag kitkit kang mga magagmay nga isda. Pagkatapos kang sangka oras, nagtakas kami para mag-igma sa balay kang sangka kakilala kang akun magurang. Nagsakay kami liwan sa van pag-agto rugto.Tatlo lang ka minutos nakaabot dayon kami. Nakaplastar run ang pagkaun sa malabug nga lamesa. Solb ang igma antes kami magsakay liwan paagto sa San Jose.

Ginhapit ko sa sanda sa hotel antes ako mag-uli sa balay. Nagahulat run si Nene. Sangka semana nga ginbilin ko sanda kay Dadang nga akun magurang. Pagkaabot ko, nagturo ang akun luha sa paghakus kag pagharuk sa akun mga bata. Nahidlaw gid ako kananda. Amo dya ang kabaylo kang akun sangka semana nga lagaw sa Palawan kag Boracay. Ang mahamulag sa akun mga bata.

Pagkaalas kwatro sa hapon, ginhulat ko sanda sa SAC, para maglagaw kami rugto. Tabuan ngaPRISSA Meet. May mga booth sa palibot. Wara kami maglawid sa SAC, nagdiretso kami sa Gaisano para mamakal. Nagpabakal si Kelly kang chopsticks nga kahoy para kuno iregalo na sa anang bayaw, kag si Azalea nagapabakal kang ointment para sa ana pilas sa batiis. Pag-abot namun sa Gaisano, buko juice nga nasulod sa plastic nga botelya ang anda ginbakal. Wara run nabakal ang tuyo hay kulang run sa oras, manog-alas sais run. Nagdiretso kami sa balay para magyapon.

Ginpakilala ko sanda sa akun mga kabugtuan. Nalipay man sanda nga nagkilalahay. Pagkatapos yapon, ginpahatud ko sanda kay Kaye. Sa rum-an sa aga ang anda byahe pa Iloilo-Manila pabalik sa Busan.

Kon ano man ang anda baratyagun sa amun nga lagaw sa Palawan kag Boracay, maman-an ko pagkatapos kang akun sangka bulan nga bakasyon rugya sa Pilipinas.