Pagturuok ka manok sa pihak-balay

Amo man ang pagbugtaw ni Nanay

Nagpabukal ka ininit para sa sara-sara

Namit isamo sa kan-un kon aga.

Nakamukra ako sa akun binatangan

Basa ang banig akun nakapkapan

Nangihi gali si Ajing sa sobra ka dalagan

Sipal ka taksi kag lantay-lantay sa dalan.

Wara dun si Tatay pagnaog ko sa kusina

Nagpanaw sa banwa nangita ka kwarta

Basi sa bata ni Pol makahuram kaluy-an

Barayad ko sa balay nga ginadayunan.

Sigi lang Beboy, antusa lang anay

Basi makaswildo si Tatay mo sa sunod bulan

Mabaydan ta gid ang mga kautangan

Kag ang promisa mo sa iskwilahan.

Ikaw lang anay tig-ang ka irigma-un nyo

Rugto sa Libuton mananum pa ako

Ang gin-init ko nga orang kag dagmay

Amo ang idapli ninyo anay.

Basi pagbalik ni Tatay mo may dara nga linaga

Makautang sa banwa, dugang sa lista

Makahigup lang kamo kang mainit nga sabaw

Malipay run kami kaninyo maglantaw.

Mabalik kaw kadya?

Dara ka bugas, bag-ong galing ria

Ginaraban namun kay Pato Nato

Panglaswa dun didto sa likod-balay ka turulaun

Lakti lang ka ginisa mix ukon balingon.

Hulat-hulata lang si Tatay mo

Kar-on burubhay rudya dun to

Si Lolo mo gali pabahawi

Kag ang imong mga libayun parigosi.

Sakay kaw dun lang sa dyip

Mahal ang pamasahi kang Siris

Imo mga bayo didto lang da ibulad, dar-a

Daw mauran dun, indi rugya da magmara.

Halong ikaw didto pirmi

Indi sagi lagaw kon gabii

Ang alawans mo kini-kinia

Hasta sa liwan nga pagpadara.

Tuon ka mayad kag indi paglipati

Ang pagpangamuyo pirmi sa Dyos.