Sino ang tinatawag ninyong bobotante?

Kayo talagang mapang-api walang pasintabi

Dahil ba nakapag-aral o kaya'y makapal ang inyong bulsa

Kaya nagkaroon ng karapatan ang inyong pagmumukha

Pagmumukhang mapanglait sa inyong kapwa

Dahil lamang karamiha'y di sang-ayon sa inyong itatala

Ang paglukluk ng prinsepe'y karapatan nati'y tig-iisa

Kaya nararapat lamang igalang ang boses ng iba

At sa inyong dahilan na kung paano n'yo di tatawagin

Itong mga may sapatos na butas na ipinagbili sa limang daan ang damdamin

Marahil tama kayo sa isang banda

Ngunit dapat bang bumitaw ng lait upang sila ay magtanda

Masakit isipin na sa magaganap na halalan kailangan ng iba ang manglait

Ang pumukaw ng puso ng iba sa mapagkumbabang paraan ano pa nga ba ang hihigit

Ang imulat ang kanilang isip habang sila'y niyayakap

Sa ganitong paraan lamang natin makakamit ang pagbabagong pinapangarap

Sino ang tinatawag ninyong bobotante

Kayo, kayo riyang di kayang yumuko kaya mas pinili ang magmalaki

Mga mahihirap, ang mga magsasaka, mangingisda't manggagawa

Di ba't ang mga itinatanim namin at inaani ay umaabot din sa inyong bituka

Written: August, 2015

Mysterious Aries