Siya nga'y siya nga, ngunit hindi

Ang yuming aking minahal

Mula noong pag-ibig nami'y nasawi

At di natupad aming dasal

Ako'y ako, ako pa rin

Magulang mo'y putik nilang tignan

Sa pag-iirog natin mata nila'y piring

Agad nila itong pinapaslang

Sila'y sila, sila na nga

Ang pinili mong sundin

Humanap ng prinsipeng puno ang banga

At pinatuto sa'yong mahalin

Siya nga'y siya nga, ngunit hindi

Masisisi n'yo ba akong mabanggit

Tuwing makita ko s'yang nakangiti

Tila sa puso niya'y ako'y winaglit

Ako'y ako, ako pa rin

Ang sumisinta sa'yo ng wagas

Ngunit walang magagawa kundi pilitin

Pagmamahal ko sa iyo'y magwakas

Sila'y sila, sila na nga

Mga kaibigang nag-udyok sa'kin

Ibinaling pagtingin ko sa iba

Labag sa kalooba'y, bagay na narapat lang gawin

Siya nga'y siya nga, ngunit hindi

Bakit hindi s'ya tuluyang nagpakasal

Isang sulat sa aki'y nagpaintindi

Nagsasabing.... "Ikaw at ikaw lamang, ang una't huling minahal".

Written: June 7, 2015 @ 12:00 pm

Mysterious Aries