Naaalala mo pa ba

Kung pa'no tayo nagsimula

Ating mga binuong mga pangarap

Kay ganda

Ngunit 'di madali

Abutin itong ulap

Dahil marikit at busilak

Nating panaginip

Yumuyuko sa ihip

Ng hanging makulit pa

Sa'ting mga larong

Simple lamang

Ang buhay noon

Di tulad ngayong

Panay ang kayod

Kabayong pagod

Na sa pagtakbo

Ngunit pilit

Inihakhakbang itong paa

Marating lamang ang dulo

Nitong palaisipan

Ang buhay ay

Talaga bang gan'to

Maraming liko-liko

Nagkandahilo na

Sa pagsakay sa tsubibo

Ngunit sige pa

Halika lang pagsubok

Lalampasan kita

Upang pangarap naming dal'way

Matupad

Aking kaibigan

Naaalala mo pa ba

Pangako natin sa isa't isa

Walang iwanan

Iaahon ang nadapa

Tapang nati'y kulay pula

Kahit asul pa

Ang pilit na

Ibinibigay ng tadhana

Ang hirap makawala

Sa tanikala ng kapalaran

Paano ba

Kasi tayong dal'way

Malayo na sa isa't-isa

Ikaw ay napunta

Sa itaas

Ngayo'y parang

Nalimot mo na

Sumpa nating dal'wa

Tutulungan bawat isa

Hindi pala

Ika'y kumawala

Naabot ang iyong pangarap

Ngayon ako'y mag-isa

Sarili kinakausap

Pati mga alitaptap at mga kulisap

Ito ang nalasap

Dulot ng ating pangarap

At muling nakita kita

Pero wala na sa'yong mata

Pangarap nating dal'wa

Natunaw na parang bula

At biglang sinabi mo

"Kung alam mo lang

Kung ano aking hinakbang

Marating ko lang

Ang nasumpungan"

"Mabuti kang kaibigan

Di ko nais na ika'y masaktan

O kaya'y dalhin kita

Sa aking kinahinatnan

Kaluluwa ko'y isinanla

Natutong dayain ang iba"

"Kung maibabalik ko lang

Dahon ng panahon

Oo, naaalala ko pa

Pangarap nating dalawa

Kay ganda"

"Ngunit heto ako

Halos di na

Makaharap sa'yo

Hilong-hilo

Sa pagsakay

Sa maling tsubibo"

"Pitaka ko nga'y napuno

Ngunit buhay na sinira ko'y

Di na makaya ng puso

Mabigat pa sa hirap

Na nadarama mo"

"Oo, nakalaya ako

Sa tanikala ng kahirapan

Ngunit mata ko'y luhaan

Ipinalit ang kaluluwa

Upang naisi'y mapunan"

"Makakaya mo bang

Lunukin ang tulong

Na galing sa masama

Malayo sa panaginip nating

Marikit at busilak"

"Kaibigan ko,

Nawala ako

Sa tamang daan

Sana iyong maunawaan

Dahil ngayo'y pagkakasala ko'y

Handa ko nang pagsisihan

Naparito lamang ako

Upang magpaalam

Sa'yo natatangi kong kaibigan"

"Oo, naaalala ko pa

Kung pa'no tayo nagsimula

Ating mga binuong mga pangarap

Kay ganda"

"Patuloy mong ligawan kaibigan

Alam kong masikap ka

Puso mo'y busilak

Balang araw

Magandang kapalara'y

Sasagutin ka"

"At kung dumating

Yaong araw

Pangarap mo'y matupad

Nawa'y huwag mo akong

Kalimutan"

"Ang iyong kaibigang

Minsang

Kasama mong

Nangarap..."

10-26-2017