Sino ka'y sadyang may kahirapang ipares

Malalim pa sa pinakaibuturan ang iyong kawangis

Isa kang salamangkerong kapangyariha'y magmulat ng isip

Diyos kang gumagawa ng mundo, mundo ng panaginip

Iginuhit mo sa papel kung paano nagmahalan

Ang mga taong pagita'y kalangitan at kalupaan

Nagawa mong ang simpleng nilalang ay paliparin

Bigyang lakas at ang kasamaa'y kanyang puksain

Sa pamamagitan ng lapis nagawa mong sirain ang oras

Ilang ulit mo ng nilakbay ang kinabukasan at binalikan ang nakalipas

Makapangyarihang tunay mga pumanaw ay kayang muling bigyang buhay

Sadyang kapanipaniwala ang iyong salaysay

Manunulat ano nga ba ang tunay na dahilan?

Gumawa ka ng kwento na laman ay samut saring kaharian

Lumikha ka ng mundo na kailanma'y di nangyari

At sa tunay mong buhay ay sadyang walang nangyayari

Sino ka'y sadyang may kahirapang ipares

Malalim pa sa pinakaibuturan ang iyong kawangis

Isa kang salamangkerong kapangyariha'y magmulat ng isip

Diyos kang gumagawa ng mundo, mundo ng panaginip