من كتابه الكاتب المبدع : Mohamed Abdel Mohsen

لينك بروفايله : https://www.facebook.com/Anathemaniac

-------------------

في أغلب الفولكلور الغربي عمومًا، مصّاصي الدماء مبيظهروش في المرايات .. زيّ اللّقطة الشهيرة اللّي فالصورة تحت دي .. من فيلم من أفلامي المُفضّلة Van Helsing لمّا كان هيو چاكمان في قصر دراكيولا وكان رايح عشان ينقذ كايت باكينسايل ودراكيولا كان بيرقص معاها قدّام المرايا الضخمة ومكنش باين غيرها هي بس اللّي بتتمايل وهو مش باين خالص بالرغم من إنّه باين للعيان عادي ..

السبب في دا إن زمان، أيام العصور المُظلمة في أوروبا كدة .. المرايات كان بيتم صقلها وإضافة طبقة من الفضة السايلة في ضهر ولما بتتصلّب بتبقى هي الطبقة العاكسة اللّي الناس بتبان فيها، وكون الفضّة في الفولكلور الغربي عُنصر نقي، غير طبيعة مصّاصي الدماء (غير النقيّة) فعشان كدة مكنتش بتعكسهم ومكنش بيبان ليهم أثر عليها وفي نفس الوقت كانوا بيخافوا منها ف نفس الوقت لنفس السبب، عشان كانت قادرة تقتلهم ..

الفكرة بقى إن المرايات الحالية مبقتش بتتعمل خلفيتها من الفضّة زيّ زمان، عشان الفضّة دلوقتي بقت عنصر قليل عن الأول وقيمتها زادت فبقوا بيعوّضوا عنها بالألومينيوم اللّي بيأدّي نفس الغرض .. فدا معناه إن مرايات دلوقتي مُختلفة عن المرايات القديمة، في إن مبقاش فيها العُنصر النقي اللّي كان بيشتغل كجهاز كشف مصّاصي الدماء ويخوّفهم كدة زيّ الأول ..

يعني وإنت واقف في وسط البلد، ناحية قويدر كدة ولا في طلعت حرب بتتفرّج على إنعكاسات الناس في ڤاترينات المحلّات .. مبقتش تقدر تحدّد مين فيهم مصّاص دماء من مين لأ ..

قولتلك مش هتخاف ..
خوفت ..؟
آني آسف ..