❄YEJIN❄

Mabilis kong inalis ang tingin sa Mahal na Prinsipe at yumuko kina Zainah. Huli man ang paggalang pero nararapat lang na gawin ko ito.

Pag-angat ko ng tingin ay akmang hahawakan ako sa braso ni Zainah pero tinawag siya dahil magbibigay ng talumpati ang kanyang magulang at maging sya bilang pasasalamat sa mga dumalo.

Nakahinga ako ng maluwag dahil doon. Naupo na kami ni Lia na hindi ko alam ang dahilan pero tulala. Tinapik ko pa siya bago siya bumalik sa huwisyo.

"Ang gwapo nila sa malapitan!" Impit na tili niya. Napa-iling na lamang ako.

Nawala na rin ang kaba ko nung umalis sila at bumalik sa gitnang bahagi ng bulwagan. Naupo ang grupo sa pinakaunahang mesa at malapit sa gitna. Sinulyapan ko ang Mahal na Prinsipe. Naka-pokus lamang ito sa harap niya. Napunta ang tingin ko sa katabi niya. Parehas sila ng awra, tindig, at syempre gwapo!

Sa tingin ko yung katabi ng Mahal na Prinsipe ay pinsan niya. At siya yung tinutukoy ng isang babae kanina na bumili. Si Kaden.

Natigil ako sa pagpapalit-palit ng tingin sa dalawa nang pumunta sa harap ang ama ni Zainah.

"Magandang gabi sa inyong lahat. Nais kong malaman nyo na labis na ikinagalak ng aking pamilya ang pagdalo nyo sa pagdiriwang ng ika-labing walong kaarawan ng aking nag-iisang anak na babae. Isa ring malaking bagay para sa amin ang pagdalo ng Mahal na Prinsipe. Sana ay maging maayos at masiyahan kayo sa gabing ito." Itinaas nito ang kopita at umusbong naman ang masigabong palakpak mula sa amin.

Nang ibinigay kay Zainah ang pagkakataon na magsalita ay ngumiti ito sa amin.

"Magandang gabi! Ako ay nasisiyahan sa okasyong ito. Nagpapasalamat sa presensya, pagbati at regalo ninyo. Tulad ng sabi ni ama ay magsaya tayo!" Yumuko ito at tumabi sa kanyang ina.

Nagsimula ring maghain ang mga tagapagsilbi ng pagkain sa bawat mesa. Nang maihanda na sa mesa namin ay kumain na kami ni Lia. Lumakas at nag-iba rin ang himig ng tugtog, naging buhay at mabilis ang tiyempo.

"Pakiramdam ko kapag pumunta sila ulit dito ay hihimatayin na ako."

Natawa ako at mahinang hinampas si Lia. Sa palagay ko ay ako rin. Pero sana talaga huwag na, napapansin ko kasing gusto ni Zainah ang presensya ko at hindi rin nakakatulong na ang isa niyang kapatid ay Elitian at malapit sya sa grupo.

"Pagkatapos ng hapunang ito ay may sayawan. Maari kayong humanap ng makakapareha nyo sa sayaw."

Napalunok kami pareho ni Lia at napatingin kay Lady Lorraine na nakangiti.

"Wala naman sigurong makikipagsayaw sa amin, Lady Lorraine." Sumangayon ako sa sinabi ni Lia.

"Hindi nyo napapansin pero kanina nyo pa nakuha ang atensyon ng ibang mga binata na narito haha. Baka mamaya ay lapitan na kayo at ayain." Tumawa pa ito.

"Kahit si Lia na lang po Lady Lorraine ang sumayaw." Sabi ko.

"Hindi! Kasama ka. Sasayaw tayong dalawa. Tayo na lang kaya ang magkapareha noh!" Tumawa ako at uminom ng tubig.

"Sige haha."

"Alam mo, Yejin. Hindi ka palangiti pero kapag tumawa ka ay sumisingkit lalo ang mga mata mo at lalo kang gumaganda."

Napanguso ako. Napunta na naman sa mukha ko ang usapan. 

Nakarami kami ng kain at naiwan kaming dalawa sa mesa nang matapos si Lady Lorraine at pumunta sa kakilala. Maya maya rin ay nagsimula nang magsitayuan ang mga panauhin. Oras na pala isayaw ang may kaarawan.

Ang unang sayaw ni Zainah ay ang kanyang ama, ang kanyang kapatid sa Elitian, ang mga kasama nito at ang Mahal na Prinsipe. Sa sayaw nila ng Mahal na Prinsipe ay hindi ko inalis ang tingin sa mukha nito.

Ang mga Aquarian ay kilala sa mga ugali nilang masigla, masiyahin, madaling mabasa ang emosyon ngunit siya ay naiiba. Para syang yelo na laging malamig ang ipinapakita, tahimik at seryoso. Napakalakas din ang dating. Ganyan siguro kapag pinagsama talaga ang dalawang angkan.

Napansin kong kanina pa, puring puri ang Mahal na Prinsipe sa isip ko. Hindi ko naman maitatanggi dahil katangian talaga ng Prinsepe ay napakaperpekto. Napakaswerte siguro ng kanyang mapapangasawa.

Napapansin ko ang maraming Ician na gustong mapansin ng Prinsipe matapos ang sayaw nila ni Zainah. Nakaupo siya ngayon sa kanyang upuan kasama ang Elitian.

"Kanina pa tunaw ang Mahal na Prinsipe sa titig mo."

Naging mabilis ang pag-iwas ko ng tingin sa Prinsipe at mahinang hinampas si Lia. Palagay ko ay namumula ako sa sinabi niya.

"Bagay kayo ng Mahal na Prinsipe, parehong malamig." Aniya at nagbigay pa ng ekspresyon na nilalamig. Sinamaan ko naman siya ng tingin.

"Magtigil ka nga sa kasasabi ng ganyan. Hindi magandang pakinggan."

"Yung? Bagay kayo? Totoo naman a! Liban pala sa katayuan nyo sa buhay hahahaha!"
Kita mo na. Napa-iling na lamang ako.

"Uhm...Hi?"

Napalingon kami ni Lia sa sumingit. Isang Aquarian na lalaki. May itsura ito at nakangiti lamang sa amin. Tiningnan ko siya at ramdam ko ang pagkailang niya.

"Helloo!" Magiliw na balik na bati ni Lia sa kanya.

Naglahad siya ng kamay kay Lia na ikinagulat naman nito.

"Maari ba kitang isayaw?"

Bumaling sa akin si Lia at humihingi ng permiso na hindi naman kailangan pa pero tumango ako. Lumihis ang tingin ko at napansin ko ang ibang Aquarian at Ician na mga lalaki na sa amin ang atensyon. Isama na rin pala ang mga babae na iba ang pinapahiwatig ng pagtitig.

"Oo." Inabot ni Lia ang kamay ng lalaki at nagpaalam siya sa akin. Tumango naman ako at ngumiti ng maliit.

Naiwan akong nakatayo sa gilid at ramdam ko pa rin ang tingin sa akin. Pinagkrus ko ang dalawang braso sa tiyan ko at pinukos na lamang ang paningin sa sumasayaw sa gitna.

Pakiramdam ko ay may nais lumapit sa akin pero nagdadalawang isip. Kung may umaya man sa akin hindi ko naman tatanggihan ngunit hindi kaming pweding magtagal.

Isang tira ng maliit na matalas na yelo sa kung saan ay ramdam ko ang pagputol ng tali sa buhok ko. Nakababa na ang mahabang buhok ko. Mukhang yung tali ko ang puntirya para pahiyain ako. Hinawi ko ang buhok na napunta sa mukha ko at inipit sa tainga ko.

Umikot ang tingin ko at pinakiramdaman ang paligid. Palagay ko ay mula iyon sa babaeng Ician. Huminto ang tingin ko sa pamilyar na grupo. Yung pumasok sa tindahan kanina. Masama ang tingin ng mga ito sa akin pero umangat lamang ang labi ko para bigyan sila ng isang ngisi.

Sa ginawa nila ay mas dumami pa ang tumingin sa akin. Maging ang ibang sa tingin ko ay magulang ay nagawi rin ang tingin sa akin.

"Yejin, ayos ka lang?"

Nilingon ko si Lia na nag-a-alalang nakatitig sa akin habang sa likod niya ang lalaking nag-aya sa kanya. Tumango naman ako.

"Mukhang mas bagay na nakababa ang mga buhok mo kesa sa nakapusod ito."

"Ganun ba. Pero ayos lang talaga ako. Ituloy nyo na ang pagsayaw." Natawa ako nang mamula siya at yung lalaking nasa likod niya. Umalis sila at kumuha ako ng kopita at uminom.

Nalasahan ko ang pait pero hindi ko pinahalatang naibahan ako. Ganito pala ang lasa ng alak. Ibinaba ko ang kopita at isang tawag ang nagpalingon sa akin sa gilid ko. Si Zainah.

"Ang ganda mo talaga! Halika!" Nabigla ako ng kumapit ito sa braso ko at hinila ako.

Nakakaagaw kami ng atensyon at sa hiya ay hinayaan kong matakpan ang gilid ng mukha ko ng buhok ko. Nakaramdam ako ng kaba nang mapagtanto ko kung saan kami papunta. Sa pwesto ng Elitian!

"Sandali, Zainah." Hindi niya ako pinansin at tuloy-tuloy pa rin. Wala na akong nagawa kung hindi ang magpatianod at mapabuntong hininga ng nakarating na kami.

Ramdam ko ang titig sa akin ng mga nasa mesa pero sa iba ako nakatingin at inayos ang buhok. Binalingan ako ni Zainah at ngumiti ng malaki. Nang tumingin siya sa Elitian ay sumunod ako pero agad na yumuko.

"Nakita ko ang ginawa sayo ng babaeng iyon kaya dinala kita rito. Hindi ko mapapalampas ang ginawa niya kaya hindi siya makakaalis mamaya hangga't hindi ko pinapahintulutan."

Napalingon ako kay Zainah.

"A-ayos lang ako." Sambit ko. Nabigla sa sinabi niya. Agad naman akong napalingon sa Elitian.

"Magandang gabi po." Bati ko at yumuko bilang paggalang lalo na sa Mahal na Prinsipe.

"Napansin kong hindi ka pa sumasayaw kanina pa. Pansin ko din ang kanina pang mga lalaki na gusto kang lapitan pero ayaw ko naman ang unang sayaw mo ay sa kanila at hindi sa Elitian."

"Huh?" Gulat na tiningnan ko si Zainah. Hindi makapaniwala sa narinig.

"Kaya rin dinala kita rito para pumili sa kanila ng maging kasayaw. Hindi pweding hindi nila maisayaw ang isa sa pinakamaganda ngayong gabi."

"H-hala!" Natataranta ako sa sinasabi ni Zainah. Hindi ko alam ang i-a-akto pa. Nahihiya ako sa sinasabi niya. Isa pa, iisipin ko pa lang ang mangyayari kapag nagkita kami ulit na naka-bihis tagapagsilbi ako ay gusto ko na lamang maging yelo, matunaw at mawala.

"Pasensya na, Zainah ngunit hindi kita mapapagbigyan."

*****
-btgkoorin