Se konsa yon rèl pete anndan. Tout moun pantan. Bon fout sa ki gen la, sak do gen la ankò. O o o o o! Mezanmi tande de problèm... Tout moun ki te deyò a kouri al gade sèlman Perla ak Babas ki rete sou plas, bon youn nan kòd lot la mouri kòman yo tap fè al gade la menm, pòv.

         **********************
Lè tout moun rive anndan, yo jwenn manman Perla kap kimen se kòmsi li pral rann dènye souf li. Medam yo ki te la, madan Semira, Tante Da, Méprila, youn kenbe tèt li, lòt la ap voye dlo nan figi l epi youn ap bal santi kanpe lwen pou yo wè si yo te ka sove l'. Malerezman aprè tan goumen, tan jefò pou li rete an vi, li trepase, li mouri je kale epi de rigòl dlo ap kou koule sou figi l.

Gen moun ki di depi yon moun mouri de grenn je l rete kale sa vle di li mouri ak regrè. Domaj li pap ka di si se ak regrè vre ou non. Antouka, traka pou wouze kay tè.

Jij la, polisye yo, doktè a vin ale. Kounya medanm yo kòmanse debarase kay la, yo deside kite sa yo rele lasal lan vid pou yo ka enstale mò yo. Mwen di lasal paske mwen pa wè yon lot non pou m ta ba li nan ti kounouk lan. Nan devan pot saa, gen twa grenn chèz ki tou paka genbe kò yo, yon ti tab, ak yon kwen ki preske di l' pa kapab ankò ki gen yon ti tele sou li, ak yon radyo depi sou tonton makout, kèk  nounous tou lèd tou mal ranje sèvi dekarasyon. O papa, nan non w gen mizerikod! Ala pasay pou kretyen vivan.

Mezanmi lavi saa gen sipriz wi, bon kou move menm si move yo pi frekan. Sak ta di kounya pou wap parle de Babas ak Manman Perla pou w ta di pòv defen. Moun pa anyen tande, m pa anyen tou non, nou pa frenk anyen anba syèl ble saa. Se souf lan nou genyen ki fè nap pouse kò nou wi, se salopri vyann nou ye wi, kou 24h nou fin pase se vè nap kale, dekonpoze, degaje vye lòdè. Viv non, profite non, mwen di w viv byen, mache nan dwati, pa imilye moun, pou lè w mouri pou w ka jwenn yon moun di pou ou si entèl te la, pou non w pa fini ansanm ak kò w.

Yo fin debarase kay la, yo leve babas atè a, mete yon lot rad sou li... Epi yo mete l sou yon nat atè a, yo mete dra blan kouvri l, yo mare zòtèy li ansanm ak yon ti kod rouj, de dwèt pous yo wi souple, yo mare yo ansanm, pa mande m pouki paske mwen pa konen tou. Yon sèl bagay map plede sè ke si yon makanda oubyen malfèktè pran ti bout kòd saa lap ka touye tout moun nan ras lan. Yon ti lanp tèt gridap nan pye l, yo fè saa pou manman an tou. Yo mete yo nan menm pyès, chak sou nat pa yo nan kwen pa yo. Ala traka papa! Kounya yo prè pou fè veye ya.

Pou depi syèk map pale la, Perla ap kraze yon dòmi. Dòmi pran l atè a wi anba doub kod la. Yo gen rezon di dòmi pa konn mizè a.

Naël menm tankou yon pipirit, li pi djanm pase Perla, li a goch, li a dwat, tout saa yo bezwen, se li ki pou bay li, mande, mande prete, mande lwe, mande achte kredi, tout sou kont li pou veye a ka fèt. Pa gen veye san te, san kafe, ni san kleren, sinon yap di w ou pa te ka kriye pa fè lèd oubyen si se foli moun mouri ou te genyen, atche.

Yon limen de gwo flanbo dife epi yo mete de gwo chodyè la familya sou li plen dlo pou fè te ak kafe. Tout moun bay sa yo genyen menm jonas fè Naël kado yo galon asowosi, demi ka bourik chaje pou veye a. Naël ki te toujou ap joure l tafyatè sezi pou jan li reyaji. Li pi granmoun pase l men sa pa te anpeche l konn mande Naël fanm e manzè toujou kase met nan men l tèlman li di l saa kasayòl te di bèf lan.

Se konsa moun ap soti pa si pa la vin nan veye. Gentan gen yon bann rara ki ap voye konpa monte. Ayayay! Lè m di w sa tanbou, tyatya, po lanbi, graj, banbou, po lanbi, bout mamit pèdi lavi yo anba mizisyen. Tout moun nan katye a e nan lòt katye vwazinaj te vini, granmoun kou timoun, sa kap kriye, sa ki ap bwè tafya, vagabon kòmanse gwòg yap pale tenten. Mezanmi problèm pou Perla ak Naël, se yo ki pèdi.

Perla vin reveye, li pa ka rele ankò, pandan lap jigote pou l wè si l' ka lage kod lan. Se konsa Sara vin ap parèt , li kouri vin ede perla...

- Gade radòt! Poukisa yo mare tifi a konsa tankou bèf ka nodye, ap joure Sara

- Anmweyy! Apa fanm nan soti pou li touye m. M pa tap ri pou tout bon men map ri pou rans. Vouzan tande machè reponn Perla.

- Anh! Map ede se ranse wap ranse avè m limena kole ak krache reponn Sara tankou yon moun ki fache.

- Padon limena kole ak dlo beni.

Li fin di saa li tonbe ri pou la pli bel epi yon lonbraj lapèn pati ak souri a epi li komanse kriye sou Sara, menm Sara tonbe kriye tou, lap pase men nan tèt Perla eseye konsole l'.

- Perla pitit, ou pa ka lage ko w konsa non, se fanm ou ye wi, fanm komba ou ye wi pitit, ou se pi gran e ou pi gran net, se pou w leve ui fanm, mare senti w sere ak de doub kod pou w djanm pou w tere manman w ak fre w.

- Ah! Ou resi pale tankou yon nègès. Wi fout! Ou gen rezon w, map mete fanm nan fanm pou m tere yo, yo fin mouri deja menm si dou a di.

Mèsi madanm, mèsi sè m pandan lap seche dlo kap soti nan je l. Doulè a rèd wi, kou a di. Mmmmmh!!! Kichòy fè w jodi demen wa pinga

Mwen espere nou te byen li e ke nou te konprann tou. Randevou a kase pou lòt samdi. Pa ezite banm avi w, di m saw panse, saw komprann. Ou ka prive m si w vle. Mwen la pou ou.

Granmoun di kouto te met file jan l file a li pa ka grate manch li pou kò l.

Mwen renmen nou😘😍😘💕💓