The Pig, este, Frog Prince 

************************************************************************************ 

“Hi, my Princess.”

          Agad kumunot ang noo ko pagkarinig nang boses na iyon. At wala nang mas ikukunot pa ang noo ko nang malingunan ko nga ang lalaking iyon. Ang nakakainis pa, nakangising- aso baboy pa.

          “Na-miss kita, my Princess.”

          Umugong yung asaran sa buong section namin.

          “Ayeeee... ang sweet naman.”

          “Push mo yan, ‘dre.”

          “Babae na si Cess ngayon.”

          Mas lalo akong nainis. Bad trip pa naman ako ngayon. Kung anu-ano ang kamalasan ang nangyari sa akin kanina. Nawalan ako ng pera, nasiraan yung jeep ko papunta sa university, at nabengga pa ng nanay ko.

          “Gago ka, Eric! ‘Wag mo ako simulan ngayon, ah. Makakatikim ka sa akin,” sagot ko.

          “Ayan, galit na si Cess.”

          “Mananapak na yan.”

          “Wala ka pala, Eric. Takot ka pala kay Cess.”

          “Gusto ko ‘yan, my Princess. Gusto ko ‘yan na ipapatikim mo. Masarap ba?” sagot sa akin ni Eric na mas lalong nagpakulo sa akin.

          Tatayo na sana ako pero agad naman kumaripas ng takbo si Eric palabas ng room namin.

          “Bye, my lovely Princess,” habol nito sabay flying kiss pa.

          Yuck! Kadiri naman! sabi ko sa isip ko. Akala naman niya kung sino siyang gwapo. Eh hindi naman. Kahit pa “macho” ako at lalaki kumilos, marunong naman akong pumili ng lalaki. Katulad ni...

************************************************************************************

“Sus, a-aura ka lang, eh.”

          “Uy, hindi ah,” tanggi ko, kahit na totoo. Niyaya ko kasi sila madam (president ng klase namin) na bumaba. May gwapo daw kasi doon. Minsan na nga lang makatisod ng gwapo, palalagpasin ko pa ba?

          “Sus, kunyare pa si Cess,” tukso niya.

          Napangiti na lang ako. Makaka-deny pa ba ako, eh, kita naman sa mga ngitian ko? Sa huli sumama naman sa baba si madam. Bibili kami ng pananghalian namin, at sabay na rin ang pagsilay. Hehe...

          Sakto naman na pagbaba namin nakasalubong ko si Darwin. Yung shiftee sa course namin. Ngumiti nang makita kami. Siyempre kilig-kiligan ang lola niyo ngayon.

          “May meeting daw sa Saturday,” sabi ni madam kay Darwin. Parehong officer kasi sila ni darwin sa student organization ng course namin. Sabay pasimpleng siniko ako ni madam. “Mga alas-dyes daw.”

          “Okay, no problem. Sige, madam.” Tumingin siya sa akin. “Sige, Cess,” sabay tapik sa braso ko.

          Mas lalong kinilig lola niyo. Dinadamdam ko pa moment nang may marinig kaming sigaw.

          “Tabiiiiii!”

          Nakita namin si kuya na hinahabol yung push cart niya na mag-isang tumatakbo pababa sa amin. May karga yun na kahon-kahon na palagay ko libro.

          Nataranta naman kami ni madam, pati na rin si Darwin kung saan kami magsusuot dahil kapag nabangga kami niyon, sabay-sabay kaming magpapagulong paikot at pababa sa ground floor, eh nasa fourth floor kami.

          Napapikit na lang kami at hinintay yung pagsagasa ng push cart sa katawan namin. Pero pagkatapos ng ilang segundo, wala namang nagyari.

          Nakita ko si Eric na nakangiti sa akin habang pinipigilan ng katawan niya ang pagtakbo ng push cart. Napangiti din ako. Bigla-bigla naging iba yung pagtingin ko kay Eric.

          Nandoon pa din si Darwin. Pero ewan ko ba, sa oras na ‘yun sa tingin ko mas gwapo si Eric kumpara kay Darwin. Mas may dating. Mas lamang. Hindi ko siya nakikita ngayon as nakakainis. O kaya naman ay mataba.

          Nakikita ko siya ngayon bilang isang magiting na lalaki na kayang gawin ang lahat para sa kanyang prinsesa.

          “Okay ka lang ba? You’re safe now, my Princess.”         

************************************************************************************