Season II - Chapter 4

"Hy maizbaani ka yeh taqaza hy k ai mehman toh muskura do, mgar tabiyat yeh chahti hy k galy milo or gala daba do."

Yeh mehman nwazi krwane ka konsa haq hy k aik dm se apny aany ki itlaa di jai or phir apny gandy se boothy utha kr kisi k ghar mein ghuss jaein. Aik baar mashwary ki zehmat bhi na smjhi bs ailaan kr dia hy tum log jao bhaar mein hum toh aaein gy hi aaein gy sirf tumhary ghar. Yeh kysa jabr o tashaddud kia jaa rha hy hm pr?

Saaf saaf maan na mein tera mehman wala hisab ho gia yeh toh.

Mojuda halaat kuxh yunh hyn k sb ko akheer qism ki maut pari hui hy or apne woh woh gunah yaad aa rhy hyn jo shayed pichli sadii se na kiyay hon.

"Ammi reham kr dein, mery haathon ne jwaab de dia hy," Taemoor roti hui halat mein bola. "Tumhary munh se awaaz na nikly ab. Chup kr k kaam kro!" Ammi ne bhrak kr kaha.

"Ghar ki sfai theek hy woh toh Y/n or baqi lrkiyan kr dein gi. Mgar yeh kia fanoos or pankhon ki sfai krwa rhi hyn? Konsa apki behn or unky miyan bachon ne ghar k fanoos or pankhon mein jaa kr ghusna hy?" Huzaifa Bhai boly. "Yeh meine thaika nhi uthaya hua ghar ki sfaiyan krne ka. Khud agr thori se sfai kr do gy toh azaab nhi aa jai ga," Mein jhaaru se mitti aik traf kr k boli.

"Thora sa kaam!? Hmari Ammi jaan ka dil kre toh woh har roz hm se yeh itna bara Zoo saaf krwaein," Jameel ne kaha jo Taemoor k saath mil kr fanoos saaf kr rha tha. "Or us zoo k langoor aap ho," Jahangeer apni hansi rokty huy bola. "Afsos! Sharam naam ki koi cheez nhi tum mein. Yehi tawaqquh rkhi jaa skti hy tum se," Jameel bola.

"Maryam tum bhi kuxh krlo, sb kaam kr rhy hyn or aik tum shehzadiyon ki trhan pury ghar mein mandla rhi ho," Najam Bhai ne kaha. "Apna kaam ho nhi rha dusron pr twajjah rkhi hui hy. Tai Amma dekh lein Najam Bhai ko keh rhy hyn mery se kaam nhi ho rha," Maryam foran shikayat lgaty huy boli.

"NAJAM!!" "AMMI ALLAH KI QASAM JHOOT BOL RHI HY YEH, KR TOH RHA HUN KAAM!"

Maraym ky kalejy mein Najam Bhai ki shikayt lga kr thand pr gai mgar hmary kalejy, dil, dmaag, gurdy, phaipry, aantriyan harr jgha aag lgi hui hy k yeh hmara ghar hy koi Five Star Hotel nhi jisko har choty se choty mauqy pr chamkaya jai.

Koi aa rha hy; sfai krlo. Itwaar hy; sfai krlo. Eid hy; sfai krlo. Shaadi hy; sfai krlo. Ammi ka dil kr rha hy; sfai krlo. Ghar saaf hy; SFAI KRLO. Ghar mein izzat toh hy nhi, sfaiyan kr kr k mil jai to bari mehrbani.

"Ammi kb tk aana hy Amreeki makhoolqon ne?" Shehzad Bhai puchny lgy. "Buri baat khala hyn tumhari! Rwana hony se pehly keh rhi thi k airport pr utar kr phone kr de gi. Phone ai ga toh tum mein se jaa kr koi le ana unhe," Ammi ne kaha. "Ghar saaf krwane tk toh theek tha mgar yeh airport hm mein se koi lene nhi jai ga," Huzaifa Bhai ne foran kaha.

"Tumhara baap bhi jai ga lene! Kaam chorr ho tum sb k sb! Abhi faisla krlo kon lene jai ga kiun k mujhy baad mein koi roly nhi sun ne."

"Meine toh bilkul nhi jaun ga," Jameel ne saaf munh pr inkaar kia. "Mery haathon m dard ho gia hy sfai kr kr k issi la mein araam krun ga thori dair," Taemoor ne kaha. "Mein toh rehta hi nhi is ghar mein, mujhy sirf sfai k lia bulwaya gia hy," Jahangeer ne aakhir mein sb se karak jwaab dia.

"Or yeh kaam wala baba apk ghar bhi aa skta hy, koi paisy nhi leta sara ghar saaf kr deta hy," Maryam Jahangeeer ko charity huy boli. "Or is laccho bandri ko bhi apne saath lata hun sirf washroom dhulwany k lia." "Choti behn hun tumhari aesy koi kehta hy bhala!?" Maryam ne kaha. "BARA bhai hun tumhara AESY KOI KEHTA HY BHALA?" Jahangeer bhi utna hi jazby se bola.

"Khuda ka wasta hy chup rho or mery bechary kaano ko sukoon bakhsho. Zara sharam-" "Zara lehaz, zara tameez nhi hy," Jahangeer or Maryam mera jumla pura krty huy boly. "Sau badtameez or jahil log mary hon gy toh yeh do namuny paida huy hongy. Shakal ghum kro dono awaaz na ai mujhy tum dono ki," Shehzad Bhai ne kaha or yeh dono yeh ja or woh jaa.

"Y/n Aapaa avaen ap apna gala in pr cheekh cheekh kr halkaan krti rehti ho. Shehzad Bhai ki aik awaaz inhe bandy ka puttar bna deti hy," Namra ne kaha jo abhi abhi kitchen mein se bartan dho kr ai thi. "Choro inhe, yeh btao handi ke neechy se choolha halka kia k nhi?" meine pucha.

"Ufff! Mein toh bhool gai!' "LAA HAULA WALA KUWWATA! NAMRA KI BACHI!"

Phir bgair koi ao ya tao dekhy mein kitchen mein hawa k ghory pr swaar hui taizi se apni mehnat ko bachane bhag gai. Pehly itni mehnat se masaly tyaar kro, phir gosht ko bhunny k lia rkho or aakhir mein jb itni takeed k baad bhi choolha halka na kia jai te menu dasso k banda gussa na kre te hor ki kre?

Jaldi se choolha band kia or dhakkan kol kr dekha k kahein meri handi ka satiya naas na ho gia ho. Pateely k neechy saalan thora sa lg gia tha mgar shukkar hy ziada nuksaan nhi hua. "Meine tumhe koi pachaas baar toh kaha tha k Namra bibi choolha dekh lena handi na sarr jai. Mijaal ho tumhe meri baat smjh ai ho," meine kaha.

"Bartan dhony k chakkar mein mein waqai bhool gai thi. Maaf kr dein na or wysy bhi thori si lgi hy handi neechy konsa sara saalan jala hy," Namra ne kaha. "Pateela baad mein tum manjo gi kia?" "Mein marr jaun gi mgar yeh itna bara pateela nhi dhoun gi," Namra kehny lgi. "Haan toh dramebaaz yeh tumhe pehly sochna chahiyay tha. Ab toh bahana nhi chaly ga. Pateela tum hi dho gi. Baat khtam!"

"Kis baat ka shor ho rha hy?" Jannat Bhabhi ne pucha jo abhi abhi utar kr neechy ai thein. "Namra madam ne pateely k neechy handi lga di or ab dhony se mnah kr rhi hyn," meine btaya. "Sirf thori si lgi hy..." Namra kehny lgi. "Thori lgi ya ziada, lgi toh hy na?" "Abhi Jahangeer or Maryam ka phadda khtam hua hy or ab tum dono lar lo," Jannat Bhabhi ne kaha.

"JANNAT MERA TRACKSUIT NHI MIL RHA!" Junaid Bhai ki upar se cheekhny ki awaaz ai. "Aik toh inhe subah se museebat pari hui hy. Kbhi yeh nhi mil rha toh kbhi woh nhi mil rha. Jysy in ky halaat nazar aa rhy hyn na mujhy shak ho rha hy apna dmaag bhi na yahein bhool jaein gy," Jannat Bhabhi tang aa kr kehny lgein.

"Jannatttttt!" "JUNAID YAAR NEECHY AA KR BAAT KR LEIN MEIN NHI AA RHI UPAR!"

"Dekha ap sb ne love marriage ka nateeja?" Laraib ne kaha or dispenser se paani bharne lgi. "Tum toh chup kro Laraib. Tumhari hogi na shaadi phir puchun gi mein tumse," Bhabhi ne kaha. "Yaar wysy suna hy yeh tumhari choti khala sau fsadi aurton k barabar hyn?" Laraib ne araam se mery kaan mein bola.

"Sau kia duniya ki tmaam fsadi aurtein ink muqably mein kuxh nhi," meine kaha. "Mein btaun ap log choti khala ki chuglein kr rhy ho kitchen mein" Jahangeer ne kaha. "Tum hmari baatein sun rhy thy!?" Namra ne pucha. "Mein nhi HUM sun rhy thy apki baatein." Or peechy se Jameel or Taemoor bhi samne aa khary huy.

"Hanji farmao?" meine pucha. "Aapaa zara side mein toh ao na baat krni hy," Jameel ne kaha.

"Kiun bhai aesi kia baa thy hmein bhi btao," Bhabhi ne pucha. "Koi khaas baat nhi hy....Aapaa ap toh idhar aein na!" Taemoor n mujhy mery baazu se pakra or kitchen k bahir ghaseet laya. "Mein yahan tumhe koi aaty ki bori lg rhi hun jo kheenchi jaa rhy ho. Agly lamhe pta chale mera baazu tumhary haathon mein ho. Kia baat hy jaldi bolo,"

"Bs Aapaa akhri baar dedo paisy agly maheeny nhi lein gy," Jahangeer bola.

"Meine yhan darakht ugaya hua hy paison ka? Ya itni ameer lgti hun mein tumhe? Abbu ne mujhy abhi tk kharchy k paisy nhi diyay," meine kaha. "Acha? Woh jo apki Maths ki book mein 500 ruppay rkhy huy hyn woh toh de dein?" Jameel ne pucha. "Tum log mery bag ki talashi le rhy thy!?" "Nhi kal apko us mein paisy rkhty huy dekha tha," Taemoor bola. "Qasam se isk ilawa mery paas koi chaarny nhi hyn. Mery paison se apny nazarein hata lo or Abbu se jaa kr lo."

"Taya Abba se zalalat k baad hi apk paas ap ke haath phailane ai hyn," Maryam ne kaha.

"Aapaa de do na...bhai nhi hm apky?" Taemoor ne kaha. "Acha toh majburi yhan tk aa gai hy k behn ko blaickmiling kr k ussi k bchai huy paisy lene k chakkar mein ho hainn?" "Astagfirullah Aapaa ap toh hmein aesy dekh rhi ho jysy koi molvi kisi be namazi musalman ko dekhta hy," Jahangeer kehny lga. "Tum apny roly band kro or shakalein ghum kro teeno. Koi paisy waisy nhi hyn mery paas!"

"Hyn na woh 500 ruppay," Jameel phir kehny lga. "Bht hi na...krna kia hy tumne?" meine tang aa kr pucha.

"Meine woh apne phone ka protector badalna tha, Taemoor ne aik adad memory card bhi lena hy or Jahangeer ki ball toh Tariq shb ne rkh li thi, aik hard ball bhi le kr aani hy. Khali bat ka toh Ammi faida utha rhi hyn. Nhi kuxh milta hmein thokne ko toh ussi se hmari littar parade ho jati hy," Jameel apna frmaishi khata kholty huy bola.

"Phone ka protector, memory card or hard ball tumhe kia lgta hy 500 ruppay mein mil jai ga? Memory card bhi 1500 se km ka nhi ata. Konsi duniya mein reh rho bhai shb?" meine dubara pucha. "Woh hm dekh lein gy mgar 500 ruppay de dein mehrbaani kr dein hm pr," Taemoor ne kaha.

"Jao lelo tum khush ho jao- oye kidhar bhaag rhy ho?" "Ab kia hua?" Jahangeer ne pucha. "Aati baar yaad se mery lia andy-shami wala burger lety ana," meine kaha. "Paisy nhi hmary paas itny. Agai Ammi se mar mar k 1500 ruppay lia hyn," Jameel ne kaha. "Lao mery paisy wapis kro! Behn ko burger nhi laa kr de skty or paisy lene k lia tumhary munh band nhi hoty." "Acha dantein toh nhi na hmein. Ammi Abbu se aik din daant nhi prti woh kasar ap or Shehzad Bhai puri kr dety ho," Taemoor ne kaha.

"Mera mazeed dmaag khrab krne ki koi zarurat nhi hy, aati baar burger lety ana or JALDI aana Amreeki makhlooq aa jai gi takreeban 4 bjy tk ussy pehly pehly wapis aa jana," meine teeno ko smjhane ki koshish ki or yeh unki mehrbani hogi k meri baaton ko apne dmaag mein bithane ki zehmat kr lein.

"Y/n! Jao zara Shehzad ko usk kamry se bula kr lao!" Abbu ki awaaz mery kaano mein pari or mein bgair kisi dair k Shehzad Bhai k kamry mein puhanch gai.

Darwaza khola toh andar aik aesa nazara dekha jisko dekhny ki mein har roz aadi hun. Shehzad Bhai apni pehli muhabbat ko aagosh mein lia so rhy thy. Or yeh pehli muhabbat koi or nhi balky inka araam-deh bistar hy. Apny bistar se kon nhi muhabbat krta? Mgar Shehzad Bhai ka meyaar hi kuxh or hy. 24 ghanty is pr chimry rehty hyn phir bhi inki needain or nasha pura nhi hotein. Na jaane konsy khwaab hyn jo inhe issi pr laet laet kr pury krny hyn.

"Shehzad Bhai...Shehzad Bhai! Shehzad Bhai so rhy hyn?"

"Nhi bistar pr leta naach rha hun. Do minute se pehly kamry se niklo mery or mujhy araam krne do. Jb tk mehman na aa jaein mujhy uthana mt," Shahzad Bhai ne kaha or karwat le kr sony lgy. "Abba bula rhy hyn apko neechy. Ab ap faisla kr lein k sona hy k Abbu ki baat na sunne pr bist hona hy," meine kaha.

"Tchhh! Acha aa rha hun!" "Yeh cheez mery azeez!"

Shehzad Bhai k kamry se nikal kr socha aik daffa Junaid Bhai k kamry ka bhi doraah kr lia jai. Subah se nashty k baad mujhy mery foji bhaiya nazar nhi ai. Kia itna sadma lg gia hy mery bhai ko PMA jaane se pehly Allah se nwafil prh kr duaein kr rhein hyn k whan unk saath zulam na ho?

"Junaid Bhai kia kr rhy hyn ap?" "Packing kr rha hun or kia?" Junaid Bhai ne kaha.

"Hui nhi packing abhi tk!? Bhabhi bta rhi thein k subah se ap apna suitcase lia kamry mein chakkar lga rhy hyn. Yeh kia chakkar hy bhai shb?" "Kuxh nhi yaar, dil nhi kr rha jaany ka. Jannat ko bhi Rawalpindi jaane mein do hafty hyn." "Saaf saaf kahein na k Bhabhi ghar pr hyn do hafta hmary saath hm moj masti krein gi or ap jaa rhy hyn PMA....hyeeee Junaid Bhai mein apk lia duaein krun gi," meine unhe charity huy boli.

"Aesi koi baat nhi hy!" "Phir kysi baat hy? Hmein bhi pata chaly."

"Tang na kro tum mujhy Y/n or neechy se zara Jannat ko bula kr lao. Aik do baat krni hy meine us se," Junaid Bhai kehny lgy. "Bs mein issi kaam k lia reh gai hun. Isko uppar se bula lao or usko neechy se bula lao issi lia paida hui hun na? Kisi din upar bhejne walon ko meine upar puhncha dena hy or neechy bhajny walon ko zameen mein gaarh dena hy, " "Acha sarriyal toti mt bano Y/n Bhatti or yeh kis baat pr meter shoot hua wa hy tumhara "Koi meter nhi shoot hua bs tanng aa gai hun or ap bhi mujhy taane na dein Junaid Bhatti."

"Jao na waqt zaya kiyay jaa rhi ho mera Jannat ko bula kr lao," Junaid Bhai hukam chlaty huy boly or mein neechy chali gai Bhabhi ko paigam puhnchany. Bs yehi zindagi hy hmari. Isko bula lao usko bula lao, issi chakkar mein Allah ne mujhy kisi din upar bulwa lena hy.
-
-

(Waqt uchalta hy...mera mtlb time skip...)

"Ammi choti khala kiun aa rhi hyn ghar..." Jameel bola jo aadhi neend mein sofy pr gira para tha. "Apna ghar acha nhi lgta jo hmary haan aa rhi hyn?" Taemoor kehny lga. "Yeh jysy aik din pehly bta kr aa rhy hyn na, inka khandaan koi na koi gand zaroor kre ga ghar mein," Jahangeer ne kaha. "Ab btao chuglein kon kr rha hy khala ki pehly mujhy bol rhy thy," meine kaha.

"Shehzad ko utha kr lao, mehmaan aty hi hongy," Ammi ne kaha. "Ap toh apni tmaam aulad ki munh dikhai kr rhi hyn khala ko. Paisy toh dein gi na woh?" Jahangeer ne kaha. "Apni shakal dekho or baatein dekho. Jis sabun se munh dhoty ho gy woh bhi kala seyah ho jata hoga," Maryam boli, jisko toh phadda krne ka koi mauqa chahiyay hota hy.

"Tum toh apna munh dhoti hi gatar k paani sy ho, sabun toh tumhe dekh kr ki kala ho jai ga." "Allah aesi aulad kisi ko naseeb na kre!" Ammi or Abbu dono saath hi boly. Kuxh waqt guzra or darwazy pr bell hui. Bell kia bajj gai ghar mein kohraam uth gia. Jysy k hmari khala nhi FBI aa gai hon.

"Jao kholo darwaza jaa kr!" Ammi hmein ghooriyan dene lgein. "Apki behn hyn ap jaein unko khush aamdeed krein. Hmari kiun beech mein mudakhlat krwa rhi hyn?" Najam bhai ne kaha or Ammi chali jaati hyn apni Amreeki makhlooq ka istaqbaal krne.

Darwaza khulny ki der thi or sb se pehly toh aik aunty andar aein jo foran Ammi se galy milein. Yeh hyn hmari Khala Afshan jo apni shaadi ky foran baad America chalein gai thein apny shohar k saath. Sunne mein aya tha k honeymoon mnany gaein thien of phir wapisi ka raasta aesy bhool gaein thi jysy washroom se wapsi pr hm class ka rasta bhool jaty hyn.

Khair saanu ki?

"Kysi ho Afshan? Kysa rha safar?" Ammi khala se jhappiyan milne k baad bolein. Woh aleda baad hy Firdos Aashiq Awan ne bola tha k no jhappiyan te no pappiyan pr hm hyn Pakistani awaam. Dheetpany k saary record hm ne tory hyn or In Sha Allah torty rhein gy.

"Hm toh plane se ai hyn na toh safar toh acha hi spend hua hoga. Ap toh janti hyn na Awais k kitny business hyn wahan issi lia Business class toh hmary lia kitni affordable hy. No issues, just perfect," khala shoki bnty huy bolein. Business class toh hmein aesy bta rhi hyn jysy hm toh jahil anny log hyn hm safar hi nhi kr skty.

"Or beta beti nhi ai tumhary?" "Ohh how can I leave them? Mery liver ka tukra hyn woh. Children!! Apni aunt se milo aa kr!"

"Yeh konsi aurat ghuss ai hy hmary ghar?" Shehzad Bhai ne kaha jo apna soya hua munh utha kr neechy tashreef lai thy. "Afshan Khala hyn yaar. Akhein khol kr dekho," Huzaifa Bhai ne kaha. "Inki angrezi sun sun kr na khair se meri angrezi ka kal tk muakmmal satiya naas ho jana hy," Laraib ne kaha. "Inko dekh kr ab yaqeen ho gia hy k ghar ka mahaul khair se khrab ho jai ga agly channd hafton mein," Namra kehny lgi. "Ap logon ki khala nhi blky Hitler ki chatti copy lg rhi hyn," Maryam boli.

"Y/n! Kahan ho sb idhar ao!" Abbu ne kaha or hm sb majburi se line bna kr khala sy milny chaly gai. Sb ne unhe baari baari salam kia. "In mein se tumhara kid kon hy?" Khala ne pucha Ammi se. "Hm sb kids inhi k hyn," Shehzad Bhai ne kaha or ussi waqt aik larki apna bag uthai sari hui boothi k saath andar aa gai. "Mum! Meine Gulzaar ko kaha k mera bag andar chorr ai and he said that do it yourself STUPID. Tell him to fix his attitude!"

Larki ne andar aa kr bomb zaroor phora tha mgar usko dekh kr yehi kaha jaa skta tha k na muh na matha jin phaaron lattha. "Behave right now! Hm kisi k ghar ai huy hyn..uhh...yeh meri choti daughter hy. Introduce kro beta." "Hi everyone! I'm Gultash," larki ne kaha.

Naam bechari ka acha tha mgar harkatein bilkul bandaron wali kr rhi thi.

"Itny log kiun hyn ghar mein?" Gultash ne pucha. "Hm apny ghar mein nhi rhein gy toh koi bahir se aa kr rhy ga?" Jahangeer ne kaha. "What do you mean? Cousins ho sb?" "Behn bhai hyn hm clean your eyes please," Taemoor ne kaha or us waqt mera hansny ko bht jee chah rha tha. Ammi toh wysy ussy ghoor rhi thein peechy se udhar Abbu bhi hansi rok kr khary huy thy.

"1, 2, 3,4,5,6,7! OMG! 7 children Mum dekh rhi hyn ap? Such ka big population in one house!" Gultash hairani se boli. "Ma sha allah bolty hyn OMG nhi," Najam Bhai ne kaha. Such a big population toh aesy bol rhi hy jysy duniya ki 90% abaadi toh hmary wjha se hy na.

"Kahan reh baqi do?" Ammi ne pucha. "Gultash beta jaein bahir se call kr k aein apny siblings ko," Khala ne kaha or woh bhaag gai apni dusri qoum ko bulany. Issy dekh kr kr toh bilkul acha nhi lga pta nhi isk behn behn konsi anokhi makhlooq hon gi.

Phir andar ai teen or log. Aik toh ho gai Khala k so called crorpati shohar Awais Khalu. Baqi do jo bachy thy woh khair bary lg rhy thy Gultash se. "Hello I'm Gulzaar, 23 years old. Nice to meet you," 23 k lamby khamby larky ne kaha. Dikhny mein woh bhi Gultash ki trhan English mummy daddy bacha lg rha tha lekin dusri larki thori chup aik taraf khari thi.

Dikhny mein khush posh thi or saleeqy mand lg rhi thi aagy kia pa yehi masumiyat sb ko khajjal khwar krwaye...khair sirf aik mafrooza tha kia pta yeh in dono se achi nikly.

"Assalam O Alaikum, Gulnaaz naam hy mera." Pichly 10-15 minute mein yeh wahid insaan thi jis ne salam krne ki taufeeq ki thi warna jo aya, hello hi kia or paasy ho gia. Abbu or Khalu toh pehly dining room mein chaly gai thy taa k yeh rola dekhna na pary or phir hm bhi samaan aik traf rkhwa kr ussi kamry mein chale gai.

Gultash ka toh aleda hi scene tha. Ghar ko aesy dekh rhi thi jysy koi banda pehli baar ajaaib ghar ka dorah kr rha ho. Gulzaar ne toh pehly hi apny bag se phone tootiyan nikal liein thi or woh toh phir yeh jaa or woh jaa. Khair Gulnaaz hm sb k saath bethi hui thi. Maryam, Laraib or Namra ta taaruf bhi ho gia tha mehmano se.

"Jameel beta jao zara upar se apny Bhai or Bhabhi ko bulao," Ammi ne kaha or Jameel dorhta hua upar se Junaid Bhai or Jannat Bhabhi ko bulne chala gia. Do minute jo iss khamoshi mein bethy do ghanty lg rhy thy k woh dono bhi neechy aa gai.

"Yeh dono kon hyn?" Khala ne pucha. "Yeh mera sb se bara beta Junaid or meri bahu Jannat," Abbu ne btaya. "Ma sha allah! Lekin...marriage kb hui hmein toh bulaya hi nhi...?" Khala apny gily shikwon ka khaaty khol kr beth gaein. "Khala woh na Pakistan mein badamon k rate thory sasty huy wy hyn aj mein apko dilwaunga, sunna hy America mein qeemat thori ziada hy," Junaid Bhai ne kaha or udar Shehzad or Huzaifa Bhai hansni rokny k lia khansny lgy.

Yeh meethi meethi be izzat krne ka talent shayed hm behn bhaiyon mein paida hoty waqt hi rajj bass gia tha. Allah Taalaah ko pta tha k kysy kysy manhoos logon se hmara paala prna hy issi lia is sifat se nwaaz kr duniya mein bheja.

"Y/n ana zara khana lgao mery saath mil kr," Laraib ne kaha or mujhy ghaseet kr kitchen mein le gai or phir mujhy pta tha k Abbu ne chai ki frmaish kr deni hy issi lia Namra ko us hwale se saath le gai. "Yeh tumhari Khala ka khandaan hy k pagal khany k mareez?" Laraib ne pucha. "Unki harkaten dekh kr mera dil or shakal dono khrab hua hy," Namra kehny lgi. "Yeh toh agaaz hy, picture abhi baqi hy mery dost."

Maiz pr khana lgaya or phir sb ko bulaya. "What's this mum?" Gultash salan ko dekh kr kehny lgi. "Yeh Qourma hy jahil," Gulnaaz ne kaha. "Woh actually Pakistan mein mein first time ai hun na so I barely know anything. Api knows, she's been here last year," Gultash btany lgi. "Khiriyat tum Pakistan ai thein pichly saal?" Jannat Bhabhi ne pucha. "Student exchange program tha hmary issi lia mery ko ana pra."

"University khtam ho gai apki?" Huzaifa Bhai aakhir kaar boly jo kb se chup bethy kuxh soch rhy thy. "Nhi mera dusra semester shuru hua tha Canada mein ab Lahore mein lockdown k baad phir ussy jaari rkhun gi jis university mein student exchange program k lia ai thi."

Yunh baatein shaatein hoti rhein, aik dusry ko jaany mein lgy rhy. Gultash or Gulzaar ko dekh kr ab tk yeh andaza lgaya k yeh or inki Ammi jaan koi na koi gul zroor khilaein gy. Khalu bechary in sb se masoom, sirf baat ki jaye toh bolty hyn. Albatta, Gulnaaz in sb mein se bht behtar thi.

Yeh mujhy maloom hy ghar ka kuxh dino mein mahaul bera-garak or zindagi azaab hony wali hy meri, mgar phir bhi lab pe aati hy dua bn k tamanna meri.

----
(4000+ words)

Assalam O Alaikum! Umeed h ap sb theek hyn, khairiyat se hyn or is pheli hui waba se mehfooz hyn.

Yeh chapter do wjuhat ki wjha se der hua;

Pehla toh mery pury September m exams thy issi lia masroofiyat or waqt ko kami k bais kuxh likh na pai kiun k is kahani ka har chapter takreeban 5 se 7 ghanty mangta hy. Woh iss lia kiun k jo kuxh dialoges hyn woh pehly se tyaar nhi huy wy woh mujhy ussi waqt soch kr likhny prty hyn.

Dusri wjha yeh thi k meine yeh chapter parson post krna tha yaani 5 Oct ko. Raat tk kr dena tha mgar jb dekha k sb mujhy mery khaas din pr bhool gai hyn toh mera likhny ka hosla thora kam ho gia tha. M apni saalgirah pr ap sbko yeh chapter tohfy k tor pr dena chahti thi taa k ap bhi meri khushi m shareek hon pr kar na pai.

Mgar phir bhi meine woh din pura lga kr is chapter ko thora or lamba likha or raat k is pehr (1:00 am) mein yeh chapter ap ki kidmat m haazir krti hun.

I hope so k sb ko psand aya hoga. VOTE or COMMENT Allah ka wasta hy kr dena.

Or aik or cheez jo bht zaruri hy k is kahani mein season II mein aik or bht ehm lead ko sb se milwana chahun gi ap sb se or woh hy gulnaaz_Khan753 jo is kahani m Gulnaaz ka hi kirdaar ada krein gi.

Un k baary m btati chalun k India se taaluq rkhti hyn or Musalman hyn issi lia inki framosh pr meine inhe apni kahani ka hissa bnana chaha. I hope k ap sb inhe bhi utna hi pyaar dein gy, utni hi izzat dein gy jitni baqi kirdaron ko do rhy hyn.

Or please aik baat, meri saalgirah guzar chuki hy is baat pr bilkul sharminda mt hona k ap ne wish nhi kia kiun k kuxh ko meine kbhi btaya hi nhi apni saalgirah k baary mein Issi lia chill krein ap sb, mein kisi se naraz nhi hoti na ho skti hun I love you all with the same care and respect.

Khush rhein, khush rkhein, hansty rhein, muskuraty rhein or prhty rhein BTS Ramadan Special

Mujhy yaani Sumaira do dein ijazat, mulaqat hogi agly chapter mein. Shab Bkhair! Allah Hafiz!

----