#belikememo
#رتال 7

________
هذك اليوم زين مخلنيش نطلع من الحوش هو حرفياً دس المفتاح و قعد في الحوش و معدش للعمل عشان بس يتأكد اني
مش حنمشي لحوش بابا

زين"لبستي!" هزيتله راسي و هو طبس يفتح درج الكيمودينو و هو يتمتم في كلام عرفتش

رِتَــــالٌّ"كنك فيش تدور!" سالته و هو قال حاجه بس مسمعتش

اليوم ماشيين للمستشفي عشان نعرفو نتيجة اخر تحاليل درناها نبي نعرف صحيت من المرض او مزال و اخره
عشان يحددو موعد عشان يحولو التوبو الي في رقبتي

زين طلع الملف و بحت فيا مبتسم بالجنب انا كورت فمي و هو مد يده الثانيه شوري مسكتها و حسّيت بيها دافيه

زين طول عمره و لمسته دافيه حنونه لما يمسكك تحس فعلاً انه مايبيش يسيبك مهما كان الظرف و فعلاً اختياري اني حبيته ماكانش غلط كان صح ميه في الميه

في طريقنا للمستشفي وصلتني  رساله من رقم ماما مكتوب فيها
-السلام عليكم حبيت نطمن شن صار معاك -

هذا كان حد الرساله و قلبي قرصني عليها يعني اوكي اكيد مش قرصه حزن لاني فرحت برسالتها البسيطه هذي و ابتسامه كبيره ارتسمت علي وجهي صوابعي تحركن علي الكيبورد و كتبت
:انا الحمدلله في طريقي للمستشفي عشان نعرف نتيجة التحاليل دعواتك:

زين تكى علي حوش عمي و حط العيال غادي و رد و وجهه مضايق و اول حاجه قالها كانت"متساليش كني الله يربحك"

بطريقه او بأخرى عرفت ان امه السبب و لذلك انا سكرت فمي
نص ساعه و انا كنت في غرفه فاضيه مع زين مقمعزين علي السرير نستنو في الدكتور

زين"بعدها نمشو نجيبو العيال بس " هزيت راسي ل زين الي كان يخطط ان نطلعو نحتفلو لما النتيجه تطلع ايجابيه

انا و عشان قصيره و كرعيا مش لامسات الوطى كنت نحرك فيهن في ألهوا و زين يسفتر عليا

ثواني كانت لما خش الدكتور و في يده الملف انا صبيت و مسكت في يد زين بالقوه كرعيا رجفن و خفت

"انتي محظوظه لأنك في مستشفي فيها دكاتره قدرو يساهمو في اكتشاف مرضك ابكر و شفاءك اخره مبروك عليكم النتيجه طلعت ايجابيه الجسم خالي من خلايه سرطانية تقدرو تجو بعد ست شهور للمراجعة و إزاله الانبوب حتكون بعد اسبوعين "

عيوني امتلن دموع و كان اجمل خبر نسمعه في حياتي زين اندفع بقوه و اضبط الدكتور و هو يتمتم ب شكراً

الدكتور طلع و انا استأذنت و مشيت شور الحمام بكيت بفرح كنت فرحانه اليوم انكتبلي عمر جديد ابتسمت في مرايه الحمام و طلعت و بالصدفة لقيت الممرضه الي انا سميتها حنش قدامي

رِتَــــالٌّ"هيي استني"انا قلت  و هي وقفت تبحت فيا من فوق لي لوطى

رِتَــــالٌّ  '' تذكري لما قتلك قولي بعد مش لو؟ اهو صحيت و قدرت نهزم السرطان قدرت نفوز عليه و غصبن علي كل حد أحبطني "ابتسمت ب انتصار في وجهها و سيبتها و عديت لزين في السياره

زين كان حتي هو فرحان و كان مش عارف كيف يعبر عن فرحته هو اتصل بكل حد في حياتنا و قاله و انا بدروي دزيت لماما رساله 

زين شالني لمطعم كلينا غادي و بعدها جابلي باقه ورد جوري حمرا بعدها نحن عدينا جبنا العيال و روحنا الحوش كان يوم مثالي بالنسبهً ليا و يا رب تدوم سعادتنا.